ބޭންކު އޮފް މޯލްޑިވްސް (ބީއެމްއެލް)ގެ މުވައްޒަފުންގެ އަދަދު ކުރިއަށް އޮތް އަހަރުދުވަހުގެ ތެރޭގައި 1،000 އަށް އިތުރުކުރަން ނިންމައިފި އެވެ.
ސަރުކާރާއި ރައްޔިތުން ހިއްސާވާ ބީއެމްއެލްގެ ތިން ވަނަ ކުއާޓަރު (ޖުލައި މަހުން ސެޕްޓެމްބަރު މަހުގެ ނިޔަލަށް ހޭދަވި މުއްދަތު) ގެ މާލީ ބަޔާން ނެރުމަށް މިއަދު ބޭއްވި ރަސްމިއްޔާތެއްގައި އެ ބޭންކުގެ ސީއީއޯ އަދި މެނޭޖިން ޑިރެކްޓަރު އެންޑްރޫ ހީލީ ވިދާޅުވި ގޮތުގައި ކުރިއަށް އޮތް އަހަރުދުވަހުގެ ތެރޭގައި އިތުރު 150 ވަޒީފާ އުފައްދަން ބޭންކުން ވަނީ ނިންމައިފަ އެވެ. އެއާ އެކު، ބޭންކުގެ މުވައްޒަފުންގެ އަދަދު 850 އިން 1،000 އަށް އިތުރުވާނެކަން އޭނާ ފާހަގަކުރެއްވި އެވެ.
އަލަށް އުފައްދާ ވަޒީފާތަކުގެ ތެރޭން 75 ވަޒީފާ ހާއްސަކޮށްފައި ވަނީ، އެންޑްރޫ ވިދާޅުވި ގޮތުގައި، އަތޮޅުތަކަށެވެ. ބާކީ ބައި ހުޅުވާލާނީ މާލެ އާއި ވިލިމާލެ އަދި ހުޅުމާލެ ހިމެނޭ ގޮތަށް މާލެ ސަރަހައްދަށް ކަމަށް އޭނާ ވިދާޅުވި އެވެ.
ބީއެމްއެލްގެ ހިދުމަތްތައް ފުޅާކުރުމަށް ހިންގާ މަޝްރޫއުގައި ހިމަނައިގެން މުވައްޒަފުންގެ އަދަދު އިތުރުކުރަނީ، އެންޑްރޫ ވިދާޅުވި ގޮތުގައި، އާއްމުން ބޭނުންވާ ފަދަ ހިދުމަތްތަކެއް ދިނުމަށެވެ. ޓެކްނޮލޮޖީގެ ގޮތުން ބޭންކިންގެ ދާއިރާ ކިތަންމެ ކުރިއަރަމުން އަޔަސް، އާއްމުން ބޭނުންވާ ފަދަ ރަނގަޅު ހިދުމަތްތަކެއް ދިނުމަށް މީހުންނާއި އިންވެސްޓްމަންޓް ބޭނުންވާކަން އޭނާ ފާހަގަކުރެއްވި އެވެ.
"ބޭންކު އޮފް މޯލްޑިވްސް އިން މީހުންނާއި ހިދުމަތްތަކުގެ އިތުރަށް އިންވެސްޓްމަންޓް ވެސް ފާރުކޮށް ދޭނަން،" ބީއެމްއެލްގެ މައި އޮފީހުގައި ބޭއްވި ރަސްމިއްޔާތުގައި އެންޑްރޫ ވިދާޅުވި އެވެ.
ބީއެމްއެލްގެ ހިދުމަތް ފުޅާކުރުމުގެ މަޝްރޫއު:
- 150 އާ ވަޒީފާ (75 އަތޮޅުތެރޭގައި، ބާކީ މާލެ ސަރަހައްދުގައި)
- އާ ހަތް ބްރާންޗް
- ހަތަރު ވިޔަފާރި މަރުކަޒު
- 20 އޭޓީއެމް
- ކަސްޓަމާ ސާވިސް ސެންޓަރެއް (މާލޭގައި)
- ކޯލް ސެންޓަރެއް (އައްޑޫގައި)
- 10 އާ ސީއެސްއާރު ޕްރޮގްރާމް
ރާއްޖޭގެ މައި ބޭންކުން މުވައްޒަފުންގެ އަދަދު އިތުރުކުރަން ނިންމިއިރު، އެ ބޭންކުގެ މުވައްޒަފުންގެ 99 ޕަސެންޓަކީ ދިވެހިންނެވެ. އޭގެ ތެރޭން ގާތްގަނޑަކަށް ތިން ބައިކުޅަ އެއް ބައި މީހުން ހަރަކާތްތެރި ވަނީ އަތޮޅުތެރޭގަ އެވެ.
ބީއެމްއެލް އިން 20 އަތޮޅުގައި 29 ބްރާންޗާއި 76 އޭޓީއެމް އާއި ޕީއޯއެސް ބޭނުން ކުރެވޭ 3،900 ތަނަކާއި 177 ކޭޝް އޭޖެންޓުން އަދި 16 ސެލްފް ސާވިސް ބޭންކިން ސެންޓަރު ވަނީ ގާއިމްކޮށްފަ އެވެ. އަދި ބްރާންްޗް ނުހުންނަ ރަށްރަށަށް ގޮސް ބޭންކިންގެ ހިދުމަތް ދިނުމަށް ފަސް ދޯނި ބޭންކިން ޔުނިޓުގެ އިތުރުން، އޮންލައިން އަދި މޮބައިލް ބޭންކިންގެ ހިދުމަތް ވެސް ދެމުން ގެންދެ އެވެ.