19 އޮކްޓޯބަރ 2020 - 12:33
8 comments
ކޮވިޑް-19އާ ގުޅިގެން ސްކޫލް ބަންދުކުރިތާ ހަތް މަސް ފަހުން މިއަދު ޣިޔާސުއްދީން އިންޓަނޭޝަނަލް ސްކޫލްގެ މަތީ ގްރޭޑްތަކުގެ ދަރިވަރުން ފުރަތަމަ ފަހަރަށް ކްލާސްތަކަށް ހާޒިރުވެއްޖެ އެވެ.
މާލެ ސަރަހައްދުގެ ސްކޫލްތައް، މާޗު މަހު ބަންދުކޮށް ޖުލައި މަހު 9-12ގެ ދަރިވަރުން ސްކޫލަށް ގެންދަން ފެށި އިރު ވެސް ޣިޔާސުއްދީން ސްކޫލުން ކިޔެވުން ބޭއްވީ އޮންލައިންކޮށެވެ. އަދި މާލޭގައި ކޮވިޑް ކޭސްތައް ގިނަވާން ފެށުމުން އަލުން ބަންދުކޮށް، މި މަހު 2 ގައި އަނެއްކާ ސްކޫލްތައް ހުޅުވައިގެން މަތީ ގްރޭޑްތަކުގެ ކިޔެވުން ކުރިއަށް ގެންދިޔަ ނަމަވެސް ޣިޔާސުއްދީން ސްކޫލަށް ދަރިވަރުން ގެންގޮސްފައެއް ނުވެ އެވެ.
މާލޭގައި ހިންގާ ޕްރައިވެޓް އަނެއް ސްކޫލް ކަމަށްވާ ބިލަބޮންގުން ދަރިވަރުން ސްކޫލަށް ގެންދަނީ ބައެއް އިމްތިހާނުތަކުގެ އަމަލީ ބައިގެ ކަންކަން ފުރިހަމަކުރުމަށެވެ. އެގޮތުން މިހާތަނަށް ދެ ފަހަރަކަށް މަތީ ގްރޭޑްތަކުގެ ދަރިވަރުން ސްކޫލަށް ގެންގޮސްފައިވާ ކަމަށް، ބިލަބޮންގްގެ އޮފިޝަލަކު ވިދާޅުވި އެވެ.
ޣިޔާސުއްދީންގެ ޕްރިންސިޕަލް އަލީ މުސްތަފާ ވިދާޅުވީ ސްކޫލަށް ގެންގޮސްގެން ކިޔަވައިދޭން ފެށީ ގްރޭޑް އަށަކުން މަތީގެ ދަރިވަރުންނަށް ކަމަށެވެ. އެ ސްކޫލް ވެސް ހުޅުވީ ރައްކާތެރިކަމުގެ ފިޔަވަޅުތައް ވަރަށް ވަރުގަދަކޮށްގެން ކަމަށް، މި އަހަރު ޣިޔާސުއްދީނާ ހަވާލުވެވަޑައިގެންނެވި ޕްރިންސިޕަލް ވިދާޅުވި އެވެ.
"ސްކޫލް ތެރޭގައި އެއްފަހަރާ ދެ ގްރޭޑެއްގެ ދަރިވަރުންނެއް ނޫޅޭނެ. މިސާލަކަށް މިއަދު ހެނދުނު ނުވައެއް ޖެހިއިރު އަޅުގަނޑުމެން މި ފެށީ. ދެން އެ ގަޑީގައި އަންނަ ކުދިން ގާތްގަނޑަކަށް 12 ޖަހަންދެން އުޅޭނީ،" މުސްތަފާ ވިދާޅުވި އެވެ.
"ހަފްތާގެ ކޮންމެ ދުވަހަކު ހުރިހާ ގްރޭޑެއްގެ ކުދިން އަންނާކަށް ވެސް ނުޖެހޭނެ. ގްރޭޑްތައް އެކި ދުވަހަށް ބަހާލައިފައި އޮންނާނީ."
އޭނާ ވިދާޅުވި ގޮތުގައި މިހާރު ހަމަޖައްސާފައިވާ ގޮތުން ކޮންމެ ގްރޭޑަކުން ވެސް ގާތްގަނޑަކަށް ތިން ގަޑި އިރު ވަރު ސްކޫލުގައި ހޭދަކުރާނެ އެވެ.
މެނޭޖްމަންޓުން ހީކުރި ވަރަށް ވުރެ މިއަދުގެ އެޓެންޑެންސް ރަނގަޅު ކަމަށް، މުސްތަފާ ވިދާޅުވި އެވެ. އެގޮތުން ކިޔެވުން ކުރިއަށް ގެންދާ ގްރޭޑްތަކުގެ 97 ޕަސެންޓް ދަރިވަރުން ހާޒިރުވި ކަމަށް އޭނާ ވިދާޅުވި އެވެ.
އިސްކަންދަރު ސްކޫލްގެ ދަރިވަރަކު ސްކޫލަށް ވަންނަނީ: ޖުލައި މަހު ސަރުކާރު ސްކޫލްތައް ހުޅުވީ ރައްކާތެރިކަމުގެ ފިޔަވަޅުތައް އަޅައިގެން
ސްކޫލަށް ކުދިން ގެންގޮސްގެން ކިޔެވުން ފެށީ، މުސްތަފާ ވިދާޅުވި ގޮތުގައި، ދެ ހަފްތާއެއްހާ ދުވަހުގެ ތެރޭގައި ފަށަން އޮތް އިމްތިހާނުތަކަށް ވެސް އަމާޒުކޮށްގެންނެވެ. ގްރޭޑް އަށަކުން މަތީގެ ދަރިވަރުންނަށް އިމްތިހާން އޮންނާނީ ސްކޫލްގަ އެވެ. އެކަމަކު ތަފާތު ސަބަބުތަކާ ހެދި ސްކޫލަށް ހާޒިރުނުވެވޭ ދަރިވަރުންނަށް އޮންލައިންކޮށް އިމްތިހާނުގައި ބައިވެރިވުމުގެ ފުރުސަތު އޮންނާނެ ކަމަށް، މުސްތަފާ ވިދާޅުވި އެވެ.
އޭނާ ވިދާޅުވީ ކޮވިޑް-19ގެ ބަލިމަޑުކަން ދެމިގެންދާ ގޮތަށް ބަލާއިރު، ދަރިވަރުން ސްކޫލަށް ގެނެސްގެން ކިޔަވައިދޭން ތައްޔާރުވާން ވެސް ޖެހޭ ކަމަށެވެ.
"އަންނަ އަހަރު ވެސް އަދި ކުރީގެ އެންމެ ނޯމަލް އަށް ދެވޭނެ ކަމަކަށް ލަފައެއް ނުކުރެވޭ. އެހެންވީމަ އަޅުގަނޑުމެން އެބަ ޖެހޭ ދަރިވަރުން ވެސް މިކަމަށް ހާނަން. އަބަދު އޮންލައިން ކްލާސް ނެގުމަކީ ވެސް ހައްލެއް ނޫން،" މުސްތަފާ ވިދާޅުވި އެވެ.
"އެގްޒާމް ވެސް މި ބާއްވަނީ އެހެންވެ. އަންނަ އަހަރަށް ޕްލޭން ހަދާއިރު މިހާރު ދަރިވަރުންގެ ލެވަލް ހުރި ވަރު ބަލާފައި އަޅުގަނޑުމެންނަށް ޕްލޭން ހަދައި ތައްޔާރުވެވޭނީ."
މާލޭގެ ސަރުކާރު ސްކޫލްތަކުގެ ގްރޭޑް އަށެއްގެ ދަރިވަރުން މިއަދު ވަނީ ސްކޫލަށް ދާން ފަށައިފަ އެވެ. އަދި އެޑިޔުކޭޝަން މިނިސްޓްރީން ހަމަޖައްސާފައިވާ ގޮތުން ނަމަ މި މަހު 25ގައި ގްރޭޑް ހަތެއްގެ ދަރިވަރުން ވެސް ސްކޫލަށް ގެންގޮސްގެން ކިޔަވައިދޭން ފަށާނެ އެވެ. އެކަމަކު ގްރޭޑް ހަޔަކުން ފެށިގެން ދަށުގެ ދަރިވަރުން ސްކޫލަށް ހާޒިރުކޮށްގެން މި އަހަރު ކިޔަވައިދެވޭނެހާ ވަގުތު ނެތް ކަމަށް، އެޑިޔުކޭޝަން މިނިސްޓްރީން ބުނެ އެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
ާަަަފާތި
20 October 2020
900 އެއްހާ ކުދިންނަށް މާލޭގެ އެންމެ ބޮޑު ސްކޫލް ސްޕޭސް ދީގެން އުޅޭއިރު ތިހާ ވަރު ރަގަޅު، އަދި އެންމެ ކުޑަ ސްޕޭސްގައި ހިންގާ ޕްރަިވެޓް ޕަބްލިކް އަހްމަދިއްޔާ އަށްވެސް ހަމަ ސާބަސް. ގަވަރމަންޓް ސްކޫލްތައްވެސް މިދަޑިވަޅު މިދައްކާހިތްވަރަށް ސާބަސް ދެން، މިރޮގުން ޖަމާލުއްދީން ސްކޫލް ފާހަގަ ކުރެވޭތީ ޝުކުރިއްޔާ އައްސަރިބަސްް
ލޯބި އާންޓީ
19 October 2020
އައިޝާ އާންޓީ ވަރަށް ބެސްޓް
ހާމިދު ޝާހިދު
19 October 2020
ޣިޔާސުއްދީން ސްކޫލްގެ އޮންލައިން ޕްރޮގްރާމްތަކަކީ ރާއްޖޭގެ އެހެން ހުރިހާ ސްކޫލްތަކާ ނުބައްދަލުވަރުގެ ރަނގަޅު ޕްރޮގްރާމްތަކެއް. އެމީހުންވަނީ ވަރޗުއަލްޓާމެއް ނިންމާ ފޯމުވެސް ދީފައި. ހަފްތާއެއްގެ ހުރިހާ ދުވަހަކު ކިޔަވައިދިނުން ކުރިއަށް ގެންދާއިރު، ކުދިން ގިނަ ކްލާސްތަކުގައި އޮންލައިން ކްލާސްގެންދަނީ 2 ބަޔަށް ބަހައިގެން ޓީޗަރަށް ފަސޭހައިން ކިޔަވާދެވޭގޮތައް. މިއާ ހިލާފަށް އިއްޒުއްދީން ސްކޫލްފަދަ ޕަބްލިކް ސްކޫލްތަކުގައި އޮންލައިންކިޔެވުން ހަމަ ސުމެއް.
ހާމިދު ޝާހިދު
19 October 2020
ޣިޔާސުއްދީން ސްކޫލްގެ އޮންލައިން ޕްރޮގްރާމްތަކަކީ ރާއްޖޭގެ އެހެން ހުރިހާ ސްކޫލްތަކާ ނުބައްދަލުވަރުގެ ރަނގަޅު ޕްރޮގްރާމްތަކެއް. އެމީހުންވަނީ ވަރޗުއަލްޓާމެއް ނިންމާ ފޯމުވެސް ދީފައި. ހަފްތާއެއްގެ ހުރިހާ ދުވަހަކު ކިޔަވައިދިނުން ކުރިއަށް ގެންދާއިރު، ކުދިން ގިނަ ކްލާސްތަކުގައި އޮންލައިން ކްލާސްގެންދަނީ 2 ބަޔަށް ބަހައިގެން ޓީޗަރަށް ފަސޭހައިން ކިޔަވާދެވޭގޮތައް. މިއާ ހިލާފަށް އިއްޒުއްދީން ސްކޫލްފަދަ ޕަބްލިކް ސްކޫލްތަކުގައި އޮންލައިންކިޔެވުން ހަމަ ސުމެއް.
އެބަޖެހޭ
19 October 2020
މާލެ ސަރަހައްދުގެ ސްކޫލް ތައް ވީހާވެސް އަވަހަށް ހުޅުވާ އަދި ހުޅުމާލޭގައި އެބަޖެހޭ ހުޅުމާލެ ދޭއްގެ އިރުން އޮތް ބޮޑު ބިން ހިއްކައިގެން އެތަނުގައި 200 ފޫޓް 200 ފޫޓް 100 ގޯތި ނަގާ އެތަން ތަނުގައި މާލެ ސަރަހައްދުގެ ހުރިހާ ކޮލެޖްސް ތަކަށް ބިން ހިލޭ 100 އަހަރަށް ދީގެން 100 ޔުނިވަރސިޓީ އެތަނުގައި ހެދޭތޯ ބަލާ ރާއްޖެތެރޭ ސްކޫލް ތަކުގެ އަދަދު 10 އަށް ތިރި ކޮށް 5000 އިން ދަށުގެ ހުރިހާ އާބާދީ ތައް މާލެ ސަރަހައްދަށް ބަދަލު ކޮށް މާލެ އަތޮޅު ވެސް ހުސްކޮށްލަން
ޛިމް2
19 October 2020
ކިޔަވާ ދިނަސް ނުދިނަސް ގެންދަނީ ހާހުން ހާހުން ފައިސާ ނަގަމުން މި ޕުރައިވެޓް ސްކޫލްތަކުން. އަހުމަދިއްޔާ ޕްރީ ސްކޫލުން ހަފްތައަކު ދެ ފަހަރު ކޮށްލަނީ ވައިބަރ މެސެޖެއް ދެން އެ ނިމުނީ. މަހުން މަހަށް ބަރާބަރަށް ފީ ނަގާ
ފާތުނާ
19 October 2020
ޣިޔާސުްދީން ސްކޫލްގެ އޮންލައިން ކްލާސްތައް ބަރާބަރަށް ކުރިއަށްގެންދިއަ. އަދި ކޮންމެ މަހަކު ފީއިން ޑިސްކައުންޓްވެސް ދެމުން ގެންދަނީ
ތަރި
19 October 2020
އަޙްމަދިއްޔާ އަކީ އެންމެ ބަރާބަރަށް ކިޔަވައިދޭ ސްކޫލް. މިހާތަނަށްވެސް ނަތީޖާ ދައްކައިދީފައިވަނީ އަޙްމަދިއްޔާއިން. ހުރިހާ މަރުހަލާއެއްގައިވެސް. އިންޓަނޭޝަނަލް ސްކޫލް ތަކުން އެންމެ ކުޑަ ފީއެއްގައި އެންމެ ފުރިހަމައަށް ޕްރީ ސްކޫލްގައިވެސް ކިޔަވައިދެނީ ވެސް އަޙްމަދިއްޔާއިން. މިކަން ހުރިހާ ބެލެނިވެރިންވެސް ފާހަގަކުރޭ. ޛިމް2 ރަނގަޅަށް މަޢުލޫމާތު ހޯދައިގެން ކޮމެންޓް ކޮށްބަލަ.