ތިނަދޫގައި ގިނަ އަދަދެއްގެ މަޝްރޫއުތަކެއް ދަނީ ހިންގަމުން. އެ ރަށުގައި މިހާރު އެންމެ ބޮޑު މަޝްރޫއެއްގެ ގޮތުގައި ހިންގަނީ ބިން ހިއްކުން. އަދި އެ ރަށުގެ ނުވަ މަގެއްގައި 8 ކިލޯމީޓަރުގެ ދިގުމިނަށް ތާރު އެޅުމަށް ވަނީ ހަމަޖެހިފައި.
ތިނަދޫގައި 100 އަށް ވުރެ ގިނަ ފްލެޓްގެ މަސައްކަތް ކުރަނީ. އަންނަ އޮގަސްޓް މަހުގެ ތެރޭގައި ހުރިހާ ފްލެޓެއްގެ މަސައްކަތެއް ނިމޭނެ ކަމަށް ސަރުކާރުން ބުނޭ. -މިހާރު ފޮޓޯ
02 ޖޫން 2016 - 17:06
11 comments
ގދ. ތިނަދޫގައި، ސިޓީއަކަށް ބަދަލުވާ ފަދަ ބޮޑެތި ޕްރޮޖެކްޓްތަކެއް ފެށިގެން ހިނގަމުންދާ ކަމަށް ފިނޭންސް މިނިސްޓަރު އަބްދުﷲ ޖިހާދު އިއްޔެ ވިދާޅުވެއްޖެ އެވެ.
"މިހާރު" އާ ވާހަކަ ދައްކަވަމުން މިނިސްޓަރު ޖިހާދު ވިދާޅުވި ގޮތުގައި ތިނަދޫގެ ކޮންމެ ދިމާލަކަށް ބެލި ކަމުގައިވިޔަސް ފެންނަނީ ސިޓީއެއްގެ ސިފަތަކެކެވެ. އެގޮތުން ތިނަދޫގައި 55 ހެކްޓަރުގެ ބޮޑު ބިމެއް ހިއްކަން ފެށުން މިނިސްޓަރު ފާހަގަކުރެއްވި އެވެ.
ތިނަދޫގެ މަގު ރަނގަޅު ފެންވަރަކަށް ހެދުމުގެ މަސައްކަތް ކުރަނީ. - މިހާރު ފޮޓޯ
ތިނަދޫ ބިން ބޮޑު ކުރުމުގެ ބޭނުމަކީ ރަށުގެ އާބާދީ ބޮޑުކޮށް ސިޓީއެއްގައި ހުންނަން ޖެހޭ ވަރަށް މީހުން އިތުރު ކުރުން ކަމަށް އޭނާ ވިދާޅުވި އެވެ. ޖިހާދު ވިދާޅުވި ގޮތުގައި މިހާރު ވެސް ރަށުގައި ގާތްގަނޑަކަށް 10،000 މީހުން ދިރިއުޅެމުން އެބަދެ އެވެ. އަދި ތިނަދޫން ހިދުމަތް ހޯދަން ބޭނުންވެގެން ކައިރި ރަށް ރަށުން 2000 އަށް ވުރެ ގިނަ މީހުން އެ ރަށަށް އާދެ އެވެ.
ބިން ހިއްކުމުގެ އިތުރުން ތިނަދޫގެ ބައެއް މަގުތަކުގައި އަށް ކިލޯމީޓަރުގެ ދިގުމިނަށް ތާރު އެޅުމާއި 100 އަށް ވުރެ ގިނަ ފްލެޓު އެޅުން ފަދަ މަޝްރޫއުތައް ހިމެނެ އެވެ. މީގެ ތެރެއިން ގިނަ މަޝްރޫއުތައް ނިންމުމަށް ކަނޑައަޅާފައި ވަނީ މި އަހަރުގެ އޮގަސްޓް މަހުގެ ކުރިންނެވެ.
ތިނަދޫ މަގެއް. ރަށުގައި ގިނަ މަޝްރޫއުތަކެއް ހުއްޓުމެއް ނެތި ކުރިއަށް އެބަދޭ. --މިހާރު ފޮޓޯ
ތިނަދޫގައި ފެށުމަށް ތައްޔާރުވާ މަޝްރޫއުތަކުގެ ތެރޭގައި ގޭސް ޕްލާންޓެއް ހެދުމާއި މިއުޒިއަމް ޕާކެއް ހެދުމާއި އިސްލާމީ މަރުކަޒެއް ބިނާ ކުރުން ހިމެނެ އެވެ.
ޖިހާދު ވިދާޅުވި ގޮތުގައި ރަށްރަށުގައި ހުރި ބަނދަރުތަކުގެ ތެރެއިން އެންމެ ބޮޑު އެއް ބަނދަރު އޮތީ ތިނަދޫގަ އެވެ. އަދި ތިނަދޫގައި ކުރި އަށް ދާ މަޝްރޫއުތައް ނިމުމުން ރަށުގެ މީހުންނަށް ހިތްފަސޭހަ ކަމާ އެކު ދިރިއުޅެވޭ ތަނަކަށް އެ ރަށް ވާނެ ކަމަށް ވެސް އޭނާ ވިދާޅުވި އެވެ.
"ރާއްޖޭގެ ނިސްބަތުން ސިޓީއަކަށް ބޭނުންވާ ގިނަ ކަންކަން ތިނަދޫގައި ހުންނާނެ. ތިނަދު އަށް އެ އަންނަނީ ސިޓީއެއްގެ ސިފަ ޖެހެމުން." މިނިސްޓަރު ވިދާޅުވި އެވެ.
ތިނަދޫގައި ހަދާ ފްލެޓުގެ އަމަލީ މަސައްކަތް ކުރަނީ. މި މަސައްކަތް ނިންމާލުމަށް ކަނޑައަޅާފައި ވަނީ މި އަހަރުގެ އޮގަސްޓް މަހު. -- މިހާރު ފޮޓޯ
ރާއްޖޭގެ ނިސްބަތުން ކުރިއަރާފައިވާ އެއް ރަށަށް ވާނެ ތިނަދޫ، ހުރިހާ ޕްރޮޖެކްޓެއް ނިމޭއިރު. -- ޖިހާދު
ތިނަދޫގައި ފެށި މަޝްރޫއުތަކަކީ ރައީސް އަބްދުﷲ ޔާމީންގެ އިސް ނެންގެވުމުގެ މަތިން ތިނަދޫ ސިޓީއަކަށް ހެދުމަށް ފެށި މަޝްރޫއުތަކެއް ކަމަށާއި އެ މަޝްރޫއުތައް ފުރިހަމަ ކުރެވިއްޖެ ނަމަ ތިނަދޫ ސިޓީއަކަށް ބަދަލުނުވާނެ އެއްވެސް ސަބަބެއް ނެތް ކަމަށް މިނިސްޓަރު ވިދާޅުވި އެވެ.
ތިނަދޫ ބިން ހިއްކުމަށް ހޮލޭންޑް ކުންފުނިން ގެނައި ޑްރެޖަރު އެ ރަށު ފަޅު ތެރޭގައި. ތިނަދޫގެ ބިން ހިއްކަން ވަނީ ފަށާފައި. -މިހާރު ފޮޓޯ
އެމްޑީޕީގެ ހަތް ކައުންސިލަރުން ހިމެނޭ ތިނަދޫ ކައުންސިލުން ބުނީ ސަރުކާރުން ތިނަދޫގައި ހިންގާ މަޝްރޫއުތަކަށް ފުރިހަމަ އެއްބާރުލުން ދޭނެ ކަމަށެވެ. އަދި ތަރައްގީގެ އެއްވެސް މަޝްރޫއަކަށް ހުރަސް އަޅާފައި ނުވާނެ ކަމަށް ކައުންސިލުން ބުންޏެވެ. ތިނަދޫ ކައުންސިލުން ވެސް ބޭނުންވަނީ އެ ރަށަށް ސިޓީއެއްގެ ދަރަޖަ ލިބުމެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
ހަވަރުތިނަދޫ
03 June 2016
މީހުންނަށް ނޭނގި އޮތް ކަމަކީ ތިނަދޫ ސްކުލްގެ ކޮންމެ 4 ކުއްޖެއްގެ ތެރެއިން 1 ކުއްޖަކީ އެރަށުން ބޭރު ކުއްޖެއްކަން. އެރަށަށް ހިޖުރަކުރަ މީހުން އެރަށުން އާއްމުދަނީ ހޯދާ މިންވަރުގެ ތަނަވަސްކަން. އެރަށުގައި އެހާ މަދު އާބަދީއެއް އޮތްއިރު ވެސް ރައްޔިތުންގެ މަޖިލީހުން 2 ގޮނޑި ގަނޫނީ ހަމަތަކުގެ މަތީން އެރަށަށް ދީފައި ހުންނަކަން. ޕީޕީއެމްގެ ޕާލިމެންޓީ ގްރޫޕްގެ ލީޑަރަކީ އެރަށު މީހެއްކަން. މިހާރު އެއީ ޕީޕީއެމްގެ މެޖޯރިޓީ ލިބިފައިވާ އަދި ޔާމީނުގެ ވެރިކަން ދަމަހައްޓަން މަސައްކަތްކުރާ ރަށެއްކަން.
މާކެއުޅު
03 June 2016
ކަލޭނޭ ސަރުކާރުން ބޭނުންވެއްޖެ ހިނދެއްގައި ރަށް އަނދައި އަޅިޔަށް ހަދައި މީހުން ބާލައި ފަޅުކުރި ފަދައިން ސީޓީއަކަށް ވެސް ހަދައިލެވިދާނެކަން އެ އެނގެނީ.
އިބްރާހިމް
03 June 2016
އެރަށުގެ އާބާދީ ބެއްލެވުމަށް ބޯހިމެނުން 2014 ގެ ރިޕޯޓް ބައްލަވާފައި ވާހަކަފުޅު ދައްކަވާ. ބޯހިމެނުން 2014 ގެ ރިޕޯޓްގައި ވާގޮތުން ގދ.ތިނަދޫގައި ދިރިއުޅޭމީހުންގެ އާބާދީއަކީ 5230 މީހުން އަދި އަތޮޅުގެ ޖުމްލަ އާބާދީއަކީ 10835 މީހުން. ތަފާސް ހިސާބާއި ބެހޭ މިފަދަ މައުލޫމާތުގެ ބޭނުން ނުހިފައި، ތަރައްޤީގެ ޕްލޭންތައް ރާވާކަމީ ލަދުވެތިކަމެއް. ކީއްކުރަންތޯ އެތައް މިލިޔަން ރުފިޔާއެއް ހޭދަކޮށްގެން ބޯހިމަނަނީ އޭގެ ބޭނުމެއް ނުކުރާއިރު. އަންނިގެ ވެރިކަމުގައި ބޯހިމެނުން ނުބޭއްވީ، އެއަކީ ސިޔާސަތު ކަނޑައަޅާފަރާތްތަކުން އެއްވެސް ބޭނުމެއްނުކުރާ އެއްޗަކަށްވާތީ ކަމަށް ގަބޫލުކުރެވެނީ. އެއްވެސް ސަރުކާރަކުން ތަފާސް ހިސާބަށް ބިނާކޮށް ރާއްޖެތަރައްޤީކުރަން ވިސްނާތަނެއް ނުފެނޭ. މުޅިންވެސް ސިޔާސީ ބޭނުމުގައި ކަންކަންކޮށްއުޅެނީ. މެންބަރުގެ ރަށަށް، ޕާޓީގެ ސަޕޯޓް ބޮޑުރަށަށް، ވަޒީރުގެ ރަށަށް، ކަންކަން ކޮށްދޭތަން މިފެންނަނީ.
ދަންޑެހެލު ފުރޮމް ދުވާފަރު
03 June 2016
އެންމެ ފަހުގެ ތަފާސް ހިސާބު. ސ.ހިތަދޫ 15000 ޏ.ފުވައްމުލައް 12000 ހދ.ކުޅުދުއްފުށި 9300 ގދ.ތިނަދޫ 6900 ޅ.ނައިފަރު 5300 ސ.ފޭދޫ 5200 ލ.ގަން 4500، އެއްފަސްކޮށް އޮތް ފޮނަދޫއާއެކު 7000 ރ.ދުވާފަރު 4400 ޅ.ހިންނަވަރު 4700 ހއ. ދިއްދޫ 4000 މިއީ ހަތަރު ހާހުން މަތީގެ ރަށްތައް. އެހެންވީމާ ކުޅުދުއްފުއްޓާއި، ފުވައްމުލައް އަދި ލ.ގަން- ފޮނަދޫއަށް ނުދޭ ސިޓީވަންތަކަން ތިނަދޫއަށް ދީގެން ނުވާނެ ނޫންތޯ؟
މުނިޔަތުއް ނުފޫޒު
03 June 2016
ޖިހާދު އިތުރުފުޅު ނުހައްދަވާ. ފިނޭންސް މިނިސްޓްރީގެ ދަށުން ހިންގަމުން އަންނަ ނޭޝަނަލް ބިއުރޯ އޮފް ސްޓެޓިސްޓިކުން އާންމުކޮށްފައިވާ އެންމެ ފަހުގެ ތަފާސް ހިސާބު ދައްކާގޮތުން، 2014 ވަނަ އަހަރުގެ ސެޕްޓެމްބަރުގެ ނިޔަލަށް ތިނަދޫގެ ރިޖިސްޓެޑް އާބާދީއަކީ 6900 އެއްހާ މީހުން. ބޯހިމެނުމުން ދައްކާގޮތުގައި ބިދޭސީންނާއެކު ދިރިއުޅޭ އާބާދީ އަކީ 5000 މީހުން. މިއަށްވުރެ މާރަގަޅެއްނުން ފުވައްމުލައް 12000 އަދި ކުޅުދުއްފުށި 9300، މި ދެެރަށް ތަރައްޤީކޮށް ސިޓީއާއި ބިޓީގެ ދަރަޖަ ދިނިއްޔާ.
ފަލަކު
03 June 2016
އެހެން ރަށްރަށަށްވެސް ސަރުކާރުގެ ޕްރޮޖެކްޓް ގެންދަންޏާ ހަމަ ތަރައްގީވާނެ. ތިނަދުއަށް މިހާރަކު ނުދާނެ 2000 މީހުންނެއް. އަތޮޅު ހޮސްޕިޓަލާއި ބޭންކް ހުންނާތީ މަޖުބޫރު ވެގެންދާ ބަޔަކު އުޅޭނެ. އަތޮޅުގެ އެހެންރަށަކަށް ކަމެއް ކޮށްދޭން ޖެހުނީމާ ބަޖެޓެއް ނޯވޭ. އެކަމަކު ތިނަދުއަށް ވިއްޔާ ހަބޭސް. 2018 ގައި ތިކަން ފެންނާނެ.
ިއިއްބެ
30 October 2016
ކިތަންމެ ހަސަދަ ވެރިވިޔަސް ޖެހޭނީ ތިނަދޫ އަށް އަންނަން.
ގޮހޮޑާ
02 June 2016
ރުޙްވަނީ ތިނަދޫގައެވެ!
ބޭސިކްސް
02 June 2016
ތިނަދޫ ތަރައްގީ ކޮށް ތިނަދޫ އަށް ސިޓީ އެއްގެ ދަރަޖަ ދޭން ޖެހޭނީ ވަކި ސްޓޭންޑަރޑް އަކަށް އެތަން ތަރައްގީ ވުމުންނެވެ. ދެން ހަމަ އައްޑޫ މީހުން މާލޭގެ މަގުމަތީގައި މުޒާހަރާ ކޮށްގެން އެމީހުން އައްޑޫ އަށް ސިޓީގެ ދަރަޖަ ގަދަ ކަމުން މާލެ އާއި ވާދަ ކުރަން ހޯދި ގޮތަށް އެކަން ކޮށްގެން ނުވާނެއެވެ. މިރުނުވެ ގޮބޮޅި ކާށިވެގެން ނުވާނެއެވެ. ތިނަދޫ އަށް ސިޓީގެ ދަރަޖަ ދޭން ޖެހޭނީ ތިނަދޫގެ އާބާދީ އަކީ އެއީ މަދުވެގެން 50 ހާހަށް އެރުމުންނެވެ. ރަށުގައި ދިރިއުޅެން ޖެހޭނެ 50 ހާސް މީހުން. އެނޫން ނަމަ ސިޓީ ގެ ދަރަޖަ ނުދެވޭނެއެވެ. އެއީ ބޭސިކް ސްޓޭންޑަރޑް އަކީ.
އައްޑޫ މީހާ
03 June 2016
އެހެންވީމާ ސިޓީގެ ދަރަޖަ ބޭސިކްސް ގެންދަންވީނު. އަހަރަމެން ބޭނުމެއް ނޫން. ކީއްކުރާ ސިޓީ އެއްތަ. ލަދެއް ނުގަނޭތަ މާލެއަށް ސިޓީ ކިޔަން. ގޮނޑު ސިޓީ.
ކޮސް
03 June 2016
ކެކެކެކެ. "އައްޑޫ މީހާ" ވާނުވާ ނޭންގުނަސް ކޮމެންޓް ކުރަންވާނެ. ސިޓީ މީ މާ ތާހިރުވެގެން ދޭނަމެއް ނޫނޭ.ހަ ފޫޓް ކޮޓަރިއެއްގައި 20 މީހުން ނިދަން ޖެހުނަސް ސިޓީ ވާނީ ސިޓީއަށް. ތިމާ މެން ގެ އަތޮޅަށް ސިޓީގެ ދަރަޖަ ދިންއިރު ހިދުމަތްތައް ލިބެން ނެތުމުން ވަރަށް ހިތުގައިޖެހިފަ ދޯ ތިތބީ.