ޖިންސީ ގޯނާގެ މައްސަލައެއްގައި މުހިިންމު ލިޔުމެއް ނެތުމުން ކަމަށް ބުނެ ހައި ކޯޓާއި ކްރިމިނަލް ކޯޓުން ބޭރުކޮށްލި މައްސަލަ ސުޕްރީމް ކޯޓުގައި ދައުލަތުން އިސްތިއުނާފްކޮށްފި އެވެ.
ނަފްސާނީ ނުކުޅެދުންތެރިކަން ހުންނަ މީހަކަށް ޖިންސީ ގޯނާކުރުމުގެ ތުހުމަތުގައި މީހެއްގެ މައްޗަށް ކްރިމިނަލް ކޯޓުގައި ކުރި ދައުވާ އެ ކޯޓުން ބޭރުކޮށްލީ އެ މީހާއަކީ ބުއްދީގެ ތަސައްރަފު ނުފުދޭ މީހެއް ކަން ސާބިތުވާ ފަދަ ސަރުކާރު ގަބޫލުކުރާ ލިޔުމެއް ހުށަހަޅާފައި ނެތުމުން ކަމަށް ބުނެ އެވެ. ކުޑަކުދިންނަށް ޖިންސީ ގޯނާކުރާ މީހުންނާ މެދު ޚާއްސަ އުސޫލުތަކަށް އަމަލު ކުރުމުގެ ގާނޫނުގެ ދަށުން އުމުރުން 18 އަހަރު ފުރިފައި ވިޔަސް، ބުއްދީގެ ތަސައްރަފު ނުފެދޭ މީހުންނަށް ޖިންސީ ގޯނާ ކުރުމަކީ ކުޑަކުދިންނަށް ޖިންސީ ގޯނާކުރުން ކަމަށް ގާނޫނު ބަލަ އެވެ.
އެ ނިންމުން ދައުލަތުން އިސްތިއުނާފް ކުރުމުން ހައި ކޯޓުން ވެސް މިދިޔަ ހަފުތާގައި ނިންމީ އެ މައްސަލަ ބޭރުކޮށްލީ ރަނގަޅަށް ކަމަށެވެ. އަދި ޖިންސީ ގޯނާ ލިބުނީ ނަފްސާނީ އުނިކަން ހުންނަ މީހަކަށް ކަން ސާބިތުވާ ރިޕޯޓެއް ދައުލަތުން ހުށަހެޅިޔަސް، އެ ރިޕޯޓް ތައްޔާރުކުރި ފަރާތަކީ އެކަމަށް ސަރުކާރުން ގަބޫލުކުރާ ފަރާތެއް ކަން ކަށަވަރުވާ ލިޔުމެއް ހުށަހަޅާފައި ނެތް ކަމަށް ހައި ކޯޓުގެ ހުކުމުގައިވެ އެވެ.
ޕްރޮސެކިއުޓާ ޖެނެރަލް ހުސައިން ޝަމީމް ރޭ ކުރެއްވި ޓްވީޓެއްގައި ވަނީ ދައުލަތުން ހުށަހެޅި ލިޔުމާ ބެހޭގޮތުން ދެބަސްވުންތަކެއް އޮތް ކަމަށާއި އަދި ހައި ކޯޓުން އެ މައްސަލަ ނިންމި ގޮތާ މެދު ހިތްހަމަނުޖެހޭތީ އެ މައްސަލަ ސުޕްރީމް ކޯޓަށް ހުށަހެޅުއްވީ ކަމަށެވެ.
ހައި ކޯޓުގެ ހުކުމުގައިވާ ގޮތުން ބުއްދީގެ ތަސައްރަފު ނުފުދޭ މީހުންނަށް ޖިންސީ ގޯނާކުރާ މައްސަލަތަކުގައި އެކަން ސާބިތުވާ ފަދަ ސަރުކާރު ގަބޫލުކުރާ އިދާރާއެއްގެ ލިޔުމެއް ހުށަހަޅަން ޖެހޭނެ ކަމަށް އެ ކޯޓުން ކުރިން ނިންމާފައި ވެ އެވެ. އެ ނިންމުން ވެސް ދައުލަތުން އޭރު އިސްތިއުނާފް ކޮށްފައިވާ ކަމަށާއި އެކަމަކު އެ ނިންމުން ބާތިލް ނުކުރާހާ ހިނދަކު އެއަށް ދައުލަތުން އަމަލު ކުރަން ޖެހޭނެ ކަމަށް ހުކުމުގައިވެ އެވެ.