ޕްރައިމަރީ ޓީޗަރުން ތަމްރީނު ކުރަން އެޑިއުކޭޝަން މިނިސްޓްރީން ތައާރަފުކުރި 15 ސްކޮލާޝިޕަކަށް ކުރިމަތިލުމުގެ ފުރުސަތު އިއްޔެ ހުޅުވާލައިފި އެވެ.
މި ކަމަށް ކުރިމަތިލުމުގެ އެންމެ ފަހު ތާރީޚަކީ އަންނަ މަހުގެ 18 ވަނަ ދުވަހުގެ މެންދުރު 2:00 އެވެ.
އެޑިއުކޭޝަން މިނިސްޓްރީން އިއްޔެ ބުނީ މިއީ ޕްރައިމަރީ ޓީޗަރުން މަދު ރަށްރަށަށް އަމާޒު ކޮށްގެން ކުރިއަށް ގެންދާ ސްކޮލާޝިޕް ސްކީމެއް ކަމަށެވެ.
"ބެޗެލާ އޮފް ޕްރައިމެރީ އެޑިއުކޭޝަން" ކޯހުން ސްކޮލާޝިޕްތަކެއް ތައާރަފްކުރީ ފެންވަރު ރަނގަޅު ޓީޗަރުން އުފައްދަން ކަމަށާއި މިއީ ދިވެހިރާއްޖޭގެ ގައުމީ ޔުނިވާސިޓީ (އެމްއެންޔޫ) އާ ގުޅިގެން ކުރިއަށް ގެންދާ ކަމެއް ކަމަށް މިނިސްޓްރީން ބުންޏެވެ.
ހަފުތާއަކު 20 ގަޑިއިރަށް ވުރެ މަދުން މަސައްކަތް ކުރަން ޖެހޭ ވަޒީފާއެއްގައި އުޅުމަކީ ޝަރުތަކީ އެޑިއުކޭޝަން މިނިސްޓްރީގެ ޝަރުތެކެވެ.
މި ސްކޮލާޝިޕް ހާއްސަކޮށްފައިވާ 60 ރަށް މިނިސްޓްރީން ކުރި އިއުލާނުގައި ބަޔާންކޮށްފައި ވެ އެވެ.
މި ސްކޮލާޝިޕަށް ހޮވާ ދަރިވަރުންނަށް ކޮންމެ މަހަކު އިނާޔަތެއްގެ ގޮތުގައި 5،000ރ. ދޭނެ އެވެ. ކިޔެވުމަށް ބޭނުންވާ ފޮތާއި އެހެނިހެން ތަކެތި ހޯދަން އިތުރު 5،000ރ. ސެމެސްޓާއަކު އެއް ފަހަރު ދޭނެ އެވެ. ދަރިވަރުންގެ އެކޮމޮޑޭޝަން އެމްއެންޔޫގެ ދަނާލުގައި ހަމަޖައްސައި ދޭނެ އެވެ.
މިއީ މިނިސްޓްރީގެ އެޑިއުކޭޝަން ޑިވެލޮޕްމެންޓް ފަންޑުން ސްޕޮންސާކޮށްގެން ކުރިއަށް ގެންދާ ސްކޮލާޝިޕެކެވެ. މި 15 ސްކޮލާޝިޕްގެ އިތުރުން އެމްއެންޔޫ އިން ވެސް މި ކޯހަށް 15 ސްކޮލާޝިޕް ތައާރަފުކޮށްފައި ވެ އެވެ.