ކޮވިޑް-19: އައްޑޫގެ ކޭސްތައް 14 އަށް ދަށްވެއްޖެ

މި ވަގުތު އެޑްމިޓްކޮށްގެން ފަރުވާދޭ މީހަކު ވެސް އައްޑޫގައި ނެތް

އަހުމަދު އަދްޝަން، މިހާރު

10 މާޗް 2021 - 09:18

އައްޑޫން ކޮވިޑް-19 އަށް ޕޮޒިޓިވް މީހުންގެ ތެރެއިން 78 މީހަކު މިހާރު ބަލިން ރަނގަޅުވެފައި ވާތީ އެކްޓިވް ކޭސްތަކުގެ އަދަދު 14 އަށް ދަށްވެއްޖެ އެވެ.

އައްޑޫ އިމަޖެންސީ އޮޕަރޭޝަން (އީއޯސީ) އިން ބުނީ، އައްޑޫން މިހާތަނަށް ކޮވިޑް ޖެހުނު މީހުންގެ ޖުމުލަ އަދަދަކީ 92 ކަމަށެވެ. އޭގެ ތެރެއިން ފަސް މީހަކު ހޮސްޕިޓަލްގައި އެޑްމިޓްކޮށްގެން ފަރުވާދިން ނަމަވެސް އެންމެން ވެސް ބަލިން ރަނގަޅުވެ، މިހާރު އެޑްމިޓްކޮށްގެން ފަރުވާދޭ މީހަކު ނެތެވެ.

މިދިޔަ މަހުގެ ކުރީކޮޅު އައްޑޫން ކޮވިޑް ކޭސްތަކެއް ފެނުނު ފަހުން މިހާތަނަށް ދެ އަވަށެއް ފިޔަވައި ހުރިހާ އަވަށަކުން މީހުން ބައްޔަށް ޕޮޒިޓިވްވެފައިވެ އެވެ. އެއީ ހިތަދޫން 22، ފޭދޫން 17، މީދޫން 14 އަދި މަރަދޫފޭދޫން ހަތަރު މީހެކެވެ. މިއީ ދިވެހިން ކަމަށް ވިޔަސް ހުޅުމީދޫ އެމްޓީސީސީ ކްލަސްޓާ އިން ޕޮޒިޓިވްވި 35 މީހުންނަކީ ބިދޭސީންނެވެ.

Case Update (Addu City) as of 09 March 2021, 1800hrs pic.twitter.com/L3tQsaOI5N
— Addu Emergency Operations Center (@EOCaddu) March 9, 2021

ބަލިން ރަނގަޅުވި މީހުންގެ ތެރޭގައި ބިދޭސީންގެ އަދަދު ވެސް ގިނަ އެވެ.

މިހާތަނަށް ކޮވިޑްގެ އެއްވެސް ކޭހެއް ފެނިފައި ނުވަނީ މަރަދު އާއި ހުޅުދޫންނެވެ.

Covid19 Vaccine update 09.03.2021 pic.twitter.com/KcZVhGeZPb
— Addu Emergency Operations Center (@EOCaddu) March 9, 2021

މިދިޔަ މަހުގެ 1 އިން ފެށިގެން އައްޑޫގައި ކޮވިޑް ވެކްސިން ވެސް ދެމުން އަންނަ އިރު އިއްޔެގެ ނިޔަލަށް 10،900 މީހުން ވެކްސިން ޖަހާފައިވެ އެވެ. އެވްރެޖްކޮށް ދުވާލެއްގެ މައްޗަށް 400 އެއްހާ މީހުން ވެކްސިން ޖަހަ އެވެ.

އީއޯސީން ކުރިން ބުނެފައިވާ ގޮތުގައި އަމާޒަކީ ދުވާލަކު ވެކްސިން ޖަހާ އަދަދު 1،000 އަށް އިތުރުކުރުމެވެ. ނަމަވެސް މިހާތަނަށް އަދި އެ އަމާޒަށް ވާސިލެއް ނުވެ އެވެ.