"ފަރީ" ގެ ޑިޖިޓަލް ޕްރިމިއާ މިއަދު

އަހުމަދު އަދްޝަން، މިހާރު

29 މާޗް 2021 - 08:15

މި އަހަރު ބަލައިލަން ލިބޭ ފުރަތަމަ އާ ދިވެހި ފިލްމު "ފަރީ" މިއަދު ބައިސްކޯފުން މިރޭ ޕްރިމިއާކުރާ ގޮތަށް ހަމަޖެހިއްޖެ އެވެ.

މި ފިލްމަކީ ކުރިން މިދިޔަ އަހަރުގެ އެޕްރީލް މަހުގެ ކުރީކޮޅު އޮލިމްޕަސް ސިނަމާ އަށް ގެންނަން އުޅުނު ފިލްމެކެވެ. އެކަމަކު ކޮވިޑް-19 އާ ހެދި އެކަން ނުވެ، ފިލްމު ގެނެސްނުދެވި ދިގުލައިގެން ގޮސްފައި ވަނިކޮށް ބައިސްކޯފުން "ފަރީ" ސްޓްރީމްކުރަން ނިންމިކަން އިއުލާންކުރީ މި މަހުގެ 8 ގަ އެވެ. އޭގެ ފަހުން ވަރަށް ގިނަ ބަޔަކު ފިލްމަށް އިންތިޒާރުކޮށް، އެ ބަލައިލަން ކެތްމަދުވެފައިވާ ކަމަށް ބުނެ ޓްވީޓް ވެސް ކޮށްފައިވެ އެވެ.

"ފަރީ" އަކީ އެކަނިވެރި މައެއްގެ ވާހަކަ ކިޔައިދޭ ޑްރާމާ ފިލްމެކެވެ. މީގެ ޓައިޓްލް ރޯލު ކުޅެފައި ވަނީ ފިލްމީ ދާއިރާގައި މިހާރު ހުރި އެންމެ އުންމީދީ އެއް ބަތަލާ ކަމަށްވާ ނުޒުހަތު ޝުއައިބް (ނުޒޫ) އެވެ.

'Faree' mirrors societal expectation of women and social stigmatization of women in the society.

Stream 'Faree' on 29th March, only on #Baiskoafu @kuhnaaru @ehkaafmv @madhoship pic.twitter.com/xnNqAy15LG
— Baiskoafu (@baiskoafu) March 23, 2021

އިތުރު ކާސްޓުންގެ ތެރޭގައި ރަވީ ފާރޫގާއި ފައުޒިއްޔާ ހަސަނާއި އަހުމަދު އީސަ (އާނަންދު) އާއި "ބޮސް" ކުޅުނު މުހައްމަދު ޔުނާންގެ އިތުރުން "ގޮށްރާޅު" އިން ތައާރަފުވި ތަސްނީމާ ހިމެނެ އެވެ.

"ފަރީ" އަކީ އަލަށް ޑައިރެކްޝަނަށް ނުކުތް އަހުމަދު ހިޝާމް ސައީދު (އަންދު) ލިޔެ، ޑައިރެކްޓްކޮށްފައިވާ ފިލްމެކެވެ.

މި އަހަރު ޑިޖިޓަލް ޕްރިމިއާއަކަށް ދާން ނިންމި އަނެއް ފިލްމަކީ އެއް ކާފުގެ ޕޮލިޓިކަލް ތުރިލާ "މަރްޔަމް" އެވެ. އިބްރާހީމް ވިސާން (ކަނޑި) ޑައިރެކްޓްކޮށްފައިވާ ފިލްމު އެހެން ޕްލެޓްފޯމަކުން ޕްރިމިއާކުރާނީ އަންނަ މަހުގެ 8 ގަ އެވެ. "މަރްޔަމް" ގެ ޓައިޓްލް ރޯލު ކުޅެފައި ވަނީ މަރިޔަމް މަޖުދާ (މަޖޫ) އެވެ.