މާޝިއަލްއަށް ސީޒަންގެ ބާކީ ބައި ނުކުޅެވިދާނެ: ކޯޗު

މެންޗެސްޓަ ޔުނައިޓެޑްގެ ފޯވަޑް މާޝިއަލް: އޭނާއަށް އަނިިޔާވީ ޔުކްރެއިންއާ ދެކޮޅަށް ފްރާންސުން ކުޅުނު މެޗުގައި

05 އެޕްރީލް 2021 - 10:58

މިދިއަ ހަފުތާގައި އޮތް ވޯލްޑް ކަޕް ކޮލިފައިންގައި ފްރާންސްގެ ފޯވަޑް އެންތަނީ މާޝިއަލްއަށް ލިބުނު އަނިޔާގެ ސަބަބުން ސީޒަންގެ ބާކީ މެޗުތަކުގައި އޭނާއަށް ނުކުޅެވިދާނެ ކަމަށް މެންޗެސްޓަ ޔުނައިޓެޑްގެ ކޯޗު އޮލެ ގުނަ ސޯލްޝެއާ ރޭ ބުނެފި އެވެ.

އުމުރުން 25 އަހަރުގެ މާޝިއަލްގެ ކަކުލަށް އަނިޔާވީ ޔުކްރެއިންއާ ދެކޮޅަށް ފްރާންސް ކުޅުނު މެޗުގަ އެވެ.

"ސީޒަންގެ ކުރިއަށް އޮތް ބައިގައި އެންތަނީއަށް ނުކުޅެވުމަކީ ވަރަށް ބޮޑު ހިތާމަައެއް،" ސޯލްޝެއާ ބުންޏެވެ.

އޭނާ ބުނި ގޮތުގައި ފްރާންސުން ފޯރުކޮށްދިން މައުލޫމާތުތަކުން އެނގެނީ އަނިޔާ އެހާ ސީރިއަސް ނުވިޔަސް، އެއީ އެހާ ކުޑަ ކަމެއް ވެސް ނޫން ކަމެވެ.

މީޑިއާއާ ވާހަކަ ދައްކަމުން ފަހުން އޭނާ ބުނީ އުއްމީދުކުރަނީ ސީޒަން ނިމުމުގެ ކުރިން މާޝިއަލް ދަނޑަށް އަނބުރާ ގެނެވޭނެ ކަމަށެވެ.

"އެކަމަކު އެއެއް ޔަގީނެއް ނޫން،" ސޯލްޝެއާ ބުންޏެވެ.

މި ސީޒަންގައި މާޝިއަލް ވަނީ މެންޗެސްޓަ ޔުނައިޓެޑަށް ހަތް ގޯލް ޖަހައިދީފަ އެވެ. އެކަމަކު މި އަހަރު އޭނާ ކުޅުނު 19 މެޗުގައި ކާމިޔާބުކުރެވުނީ އެންމެ ތިން ލަނޑެވެ.

ޔޫރޮޕާ ލީގުގެ ކްއާޓާ ފައިނަލްގައި އަންނަ ބުރާސްފަތިދުވަހު ގްރެނާޑާއާ ދެކޮޅަށް ޔުނައިޓެޑް ނުކުންނާނެ އެވެ. އަދި އަންނަ އާދިއްތަދުވަހު ޕްރެމިއަ ލީގުގައި ކުރިމަތިލާނީ ޓޮޓެމްހަމްއާ އެވެ.