ކުރީގެ ރައީސް މުހައްމަދު ނަޝީދު އަވަހާރަކޮށްލަން ޓެރަރިސްޓް ހަމަލާދިނުމުގައި އެންމެ އިސް ދައުރެއް އަދާކުރި ކަމަށް ތުހުމަތުކުރާ، އެންމެ މުހިންމު މީހާ މިއަދު ހެނދުނު ހުޅުމާލެ އިން ހައްޔަރުކޮށްފި އެވެ.
އޭނާ ހައްޔަރުކުރީ، ރޭ ފަތިހުން ފެށިގެން ފުލުހުންގެ ސްވަޓް ޓީމާއި އެސްއޯ ފުލުހުން ހިންގި ހާއްސަ އޮޕަރޭޝަނެއްގަ އެވެ.
އެއީ މިދިޔަ ބުރާސްފަތި ދުވަހުގެ ރޭ ނަޝީދަށް ހަމަލަދިން މައްސަލައިގައި ފުލުހުން އެންމެ ބޮޑަށް ހޯދަން ބޭނުންވި މީހާ ކަން ފުލުހުން ކަށަވަރު ކޮށްދިނެވެ. ނަމަވެސް އެ މީހާއާ ގުޅޭ އެއްވެސް މައުލޫމާތެއް އަދި ފުލުހުން ހާމައެއް ނުކުރެ އެވެ.
އެ މީހާ ހުޅުމާލޭގައި ދިރިއުޅޭ އެޕާޓްމަންޓް ކައިރިން ހައްޔަރު ކޮށްގެން ގެންދާ ފޮޓޯއެއް ސޯޝަލް މީޑިއާގައި ވަނީ އާންމު ވެފަ އެވެ. ހައްޔަރުކޮށްގެން ގެންދާއިރު އޭނާގެ ވަށައިގެން ސްވަޓް ޓީމާއި އެސްއޯ ފުލުހުން ފެނެ އެވެ.
އިއްޔެ ހަވީރު ބޭއްވި މީޑިއާ ބްރީފިންގައި ފުލުހުން ވަނީ އެ މީހާ މާސްކް އަޅައިގެން، ނަޝީދަށް ހަމަލަދިން ސަރަހައްދުގައި އުޅޭ ފޮޓޯތަކެއް އާންމުކޮށްފަ އެވެ. ފުލުހުން ތުހުމަތު ކުރާ ގޮތުގައި މިއީ ނަޝީދު އަވަހާރަ ކޮށްލަން އައިއީޑީ ގޮއްވާލި މީހާ އެވެ.
އޭނާ ހޯދަން ފުލުހުން އާންމުންގެ އެހީތެރިކަމަށް ވެސް އިއްޔެ އޮތީ އެދިފަ އެވެ.
ނަޝީދަށް ހަމަލަދިން މައްސަަލައިގައި ދެން ހައްޔަރުކޮށްފައި ވަނީ މއ. ފޭރުގެ، މުޖާޒް އަހުމަދު 21، އާއި ގއ. ކޮނޑޭ، ފޮޅޭމާ، ތަހުމީނު އަހުމަދު 32، އެވެ.
ފުލުހުން ބުނެފައިވާ ގޮތުގައި ނަޝީދަށް ހަމަލަ ދިނުމަށް ބޭނުންކުރި އައިއީޑީ ހަރުކޮށްފައި ވަނީ ތަހުމީނުގެ ސައިކަލުގަ އެވެ. ނަމަވެސް ހަމަލަދިނުމުގެ ބޭނުމުގައި އޭނާގެ އެ ސައިކަލްގެ ނަމްބަރު ބަދަލުކޮށް، އިންޖީނުގެ ނަމްބަރު ހުރީ ފޮހެލައިފަ އެވެ. ނަމަވެސް ފުލުހުންގެ ފޮރެންސިކް ޓީމުގެ މަސައްކަތުން އިންޖީނުގެ ނަމްބަރު ދެނެގަނެ ސައިކަލްގެ ވެރިމީހާ އަކީ ވެސް ތަހުމީނުކަން ވަނީ ހޯދައިފަ އެވެ.
