ކަންޑިންމަ ރިސޯޓު: ދައުލަތަށް އެންމެ ގިނައިން ގްރީން ޓެކްސް ލިބެނީ ރިސޯޓުތަކުން
30 މެއި 2021 - 11:50
1 comments
މި އަހަރުގެ ފުރަތަމަ ކުއާޓާގައި ޓޫރިޒަމްގެ ހިދުމަތް ދޭ ތަންތަނުން ގްރީން ޓެކްސް އަށް 214 މިލިއަން ރުފިޔާ ލިބިއްޖެ އެވެ.
ފިނޭންސް މިނިސްޓްރީގެ ތަފާސްހިސާބުތަކުން ދައްކާ ގޮތުން އެންމެ ގިނައިން ގްރީން ޓެކްސްގެ ގޮތުގައި އާމްދަނީ ލިބުނީ މާލެ އަތޮޅުންނެވެ. މާލެ އަތޮޅަކީ އެންމެ ގިނަ ރިސޯޓުތަކާއި ގެސްޓްހައުސްތައް ވެސް ހިންގަމުން އަންނަ އަތޮޅެވެ.
ގްރީން ޓެކްސްގެ ގޮތުގައި ރިސޯޓުތަކުން 203 މިލިއަން ރުފިޔާ ލިބުނު އިރު ގެސްޓްހައުސްތަކުން ލިބުނީ ހަތަރު މިލިއަން ރުފިޔާ އެވެ. ބާކީ އާމްދަނީ ލިބުނީ ސަފާރީތަކާއި ހޮޓާތަކުންނެވެ.
ގްރީން ޓެކްސް އިން ލިބޭ އާމްދަނީ ސަރުކާރުން ހޭދަކުރަނީ ތިމާވެށި ރައްކާތެރިކުރުމަށް ހިންގާ ޕްރޮޖެކްޓްތަކަށެވެ. މީގެ ތެރޭގައި ނަރުދަމާގެ މަޝްރޫއުތަކާއި ގޮނޑުދޮށް ހިމާޔަތްކުރުމާއި ފެނުގެ ހިދުމަތް ދިނުމުގެ ޕްރޮޖެކްޓްތައް ހިމެނެ އެވެ. މިދިޔަ ޖެނުއަރީ މަހު ގްރީން ޓެކުހުން ލިބުނު އާމްދަނީގެ ތެރެއިން 12.8 މިލިއަން ރުފިޔާ ޕްރޮޖެކްޓްތަކަށް ހޭދަކުރި އިރު ފެބްރުއަރީ މަހު 58 މިލިއަން ޕްރޮޖެކްޓްތަކަށް ހޭދަކޮށްފައިވެ އެވެ. އަދި މާޗު މަހު 31 މިލިއަން ރުފިޔާ ޕްރޮޖެކްޓްތަކަށް ހޭދަކުރި އެވެ.
ގްރީން ޓެކްސް ނަގަން އެންމެ ފުރަތަމަ ފެށީ 2015 ވަނަ އަހަރު އެވެ. އެންމެ ފުރަތަމަ ނަގަން ފެށީ ރިސޯޓުތަކާއި ހޮޓާތަކުގެ އިތުރަށް ސަފާރީތަކުގައި ތިބޭ ބޭރުގެ ޓޫރިސްޓުންގެ އަތުންނެވެ. ދިވެހިންނާއި ރެޒިޑެންޓް ވިސާގައި ރާއްޖޭގައި ތިބޭ ބޭރު މީހުން ފިޔަވައި އެހެން ބިދޭސީންގެ އަތުން ދުވާލަކަށް ހަ ޑޮލަރުގެ މަގުން ނަގާ މި ޓެކްސް ގެސްޓް ހައުސްތަކުން ނަގަން ފެށީ އޮކްޓޫބަރު 2016 އިން ފެށިގެންނެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
ގޯތިއާދަނު
30 May 2021
ގުރީން ޓެކްސްގޮތުގައި ބިލިއަނުން ލިބޭ ފައިސާ ހޭދަކުރަނީ އެހެނިހެންކަންކަމަށް...... ރަށުގެ ކުނިގޮނޑުފުރިގެން މޫދަށް އަޅަމުންދާއިރު...އަދި އެކިބާވަތުގެ ވިހަކެމިކަލްތަކާއެކު ގޮނޑުއަންދަމުންދާއިރު ތިމާވެށީ ނަމުގައި ސެމިނާ އަބުއި ފޯރަމް ބޭއްވުން ނޫންކަމެއް ކައުންސިލްތަކުން ވެސް ކުރާތަނެއް ނުފެނޭ