އައްޑޫ ހިތަދޫގައި މިރޭ ސައިކަލެއްގައި ދިޔަ ދެ މީހަކަށް ތޫނު އެއްޗެހިން ހަމަލާދީ ޒަހަމްކޮށްލައިފި އެވެ.
ފުލުހުން ބުނީ މިރޭ އަށެއް ޖަހާ އެހާކަންހާއިރު ސައިކަލެއްގައި ދުއްވާފައި ދިޔަ ދެ މީހަކަށް ތޫނު އެއްޗެހިން ހަމަލާދީ ޒަހަމްކޮށްލާފައިވާ ކަމަށެވެ.
އެ ހަމަލާގައި ޒަހަމްވީ އުމުރުން 27 އަހަރުގެ ފިރިހެނަކާއި 23 އަހަރުގެ އަންހެނަކަށް ކަމަށް ފުލުހުން ބުނެ އެވެ.
މި މައްސަލައާ ގުޅިގެން މިހާތަނަށް މީހަކު ހައްޔަރެއް ނުކުރެ އެވެ.
އެ މީހުންނަށް ލިބުނު އަނިޔާތަކުގެ ތަފްސީލެއް އަދި އެނގިފައެއް ނުވެ އެވެ. އައްޑޫ އިކުއަޓޯރިއަލް ހޮޮސްޕިޓަލުން ބުނީ އެ ދެ މީހުން ވެސް މިހާރު ވަނީ އިމަޖެންސީ ރޫމަށް ގެންގޮސްފައި ކަމަށާއި ހާލު ސީރިއަސް ކަމެއް ނުވަތަ ނޫން ކަމެއް އަދި ނޭނގޭ ކަމަށެވެ.
ހިތަދޫގައި ހަދާފައި ހުރި ފްލެޓެއް ކައިރިން މިއަދު ހެނދުނު ވެސް ދެ މީހަކަށް ވަޅިން ހަމަލާދީ ޒަހަމްކޮށްލާފައިވެ އެވެ. އެ މީހާގެ ބޮލުގެ އިތުރުން ގައިގެ އެކި ތަންތަނަށް ހަމަލާދިނެވެ.
އައްޑޫގައި މީގެ ކުރިން ވެސް ސިލްސިލާ މާރާމާރީތައް ހިނގާފައިވާއިރު، މިރޭގެ ހަމަލާއަކީ ހެނދުނުގެ ހާދިސާއާ ގުޅުމެއް އޮތް ކަމެއް ކަން އަދި ކަށަވަރެއް ނުވެ އެވެ. ހެނދުނުގެ ހާދިސާއާ ގުޅިގެން ވެސް މީހަކު ހައްޔަރު ކުރި ކަމެއް ފުލުހުން ހާމަކޮށްފައި ނުވެ އެވެ.
