އައިޖީއެމްއެޗް-- ފޮޓޯ: އަހުމަދު އަވްޝަން/ މިހާރު
28 އޮކްޓޯބަރ 2021 - 12:54
2 comments
މިދުވަސްވަރު ރާއްޖޭގައި ފެތުރެމުންދާ ރޯގާ ޖެހިގެން ހަ ކުއްޖަކަށް އައިޖީއެމްއެޗުގެ އައިސީޔޫގައި ފަރުވާދެމުން އަންނަ ކަމަށް އެ ހޮސްޕިޓަލުގެ ކުޑަކުދިންގެ ހާއްސަ ޑރ. އަހުމަދު ފައިސަލް މިއަދު ވިދާޅުވެއްޖެ އެވެ.
މިދިޔަ ދެ ތިން މަހު، މާލޭ ސަރަހައްދެކޭ އެއްގޮތަށް ރާއްޖޭގެ އެކި ހިސާބުތަކުގައި ވެސް އިންފްލުއެންޒާ އާއި އަރިދަފުސް ރޯގާ އާއި ހުން ވަރަށް ބޮޑަށް އިތުރުވެފައިވާ ކަމަށް ތަފާސްހިސާބުތަކުން ދައްކަ އެވެ.
އެކަމާ ގުޅިގެން ޑރ. ފައިސަލް، "މިހާރު" އަށް ވިދާޅުވީ ރޯގާ ޖެހިގެން ފަރުވާ ހޯދަމުން އަންނަ ކުދިންގެ އަދަދު ވެސް އިތުރުވެފައިވާ ކަމަށެވެ. ކުޑަކުދިންގެ ވޯޑު ވެސް އޮތީ ގާތްގަނޑަކަށް ފުރިފައި ކަމަށް ޑރ. ވިދާޅުވި އެވެ.
"ބާރަ އަހަރުން ދަށުގެ ކުދިން ރޯގާ ޖެހިގެން އަންނަ މިންވަރު ވަނީ އިތުރުވެފައި. އޭގެ ތެރޭގައި އެބަ ހިމެނޭ އެއް އަހަރުގެ ކުދިންނާއި އެއް މަހުގެ ކުދިން އަދި އެއް މަސް ނުވާ ކުދިން ވެސް،" ޑރ. ފައިސަލް ވިދާޅުވި އެވެ.
ރޯގާގެ ސަބަބުން ކުދިންނަށް ބޮޑުވަރު ވަނީ އެ ކުދިންގެ ފުއްޕާމޭގައި އަރިދަފުސް ހިފުމުން ކަމަށް ޑރ. ވިދާޅުވި އެވެ. އަދި ތުއްތު ކުދިންނާއި ނޭވާ ހިއްލުން ފަދަ އިތުރު ބަލިތައް ހުރުމުގެ ސަބަބުން ވެސް އެ ކުދިންގެ ހާލު ގޯސްވުމުގެ ފުރުސަތު އޮވެ އެވެ. ޑރ. ފައިސަލް ވިދާޅުވި ގޮތުގައި މިވަގުތު ވެސް އައިސީޔޫގައި ހަ ކުއްޖަކަށް އަންނަނީ ފަރުވާދެމުންނެވެ.
"މި ހަ ކުދިންނަކީ މިވަގުތު އައިސީޔޫގައި ފަރުވާ ހޯދަމުން އަންނަ ކުދިންގެ އަދަދު. މި އަދަދު އިތުރުވާނެ، ބައެއް ކުދިން އައިސީޔޫގައި ބޭއްވުމަށް ފަހު ދޫކޮށްލުމާއި އައިސީޔޫއަށް ލަމުން މިދަނީ،"
ޑރ. ފައިސަލް ވަނީ ރައްކާތެރިކަން އިސްކުރުމަށް އިލްތިމާސްކޮށްފަ އެވެ. ބޮޑެތި މީހުން ވެސް އެހާ ގިނަ މީހުންގެ ތެރެއަށް މިދުވަސްވަރު ގޮސް ހެދުން ރަނގަޅު ނޫންކަން ޑރ، ފާހަގަކުރެއްވި އެވެ.
"ރޯގާ ހުންނަ ތަންތަނަށް ގޮސްފަ މިދަނީ ކުޑަކުދިން ވެސް އުޅޭ ތަންތަނަށް. އޭގެ ސަބަބުން އެކުދިންނަށް ޖެހުމަށް އެބަ މަގުފަހިވޭ. އާންމުންގެ އެހީއާ އެކު ބަލި މަދުކުރެވޭނީ،"
ރޯގާގެ އަލާމާތް ހުންނަ ނަމަ، ކުދިން ސްކޫލަށް ނުފޮނުވުމަށް ވެސް ބެލެނިވެރިންނަށް ޑރ. ފައިސަލް އިލްތިމާސްކުރެއްވި އެވެ. ރޯގާ މަދުކުރުމަށް ވެސް ގިނަގިނައިން އަތްދޮވުމަށާއި މާސްކް އަޅައިގެން އުޅުމާއި ވައި ދައުރުވާނެ ގޮތަށް ހުރުން މުހިއްމު ކަމަށް ވިދާޅުވި އެވެ. އަދި އާންމުކޮށް ޖަހާ ވެކްސިންތައް ޖެހުމަށް ވެސް ނަސޭހަތްތެރިވި އެވެ.
އިތުރު ލިޔުންތައް
މަގްބޫލް ލިޔުންތައް
Mihaaru Print Edition
Download Mihaaru News App
Offline Alerts
SMS 'sub mihaaru' to 5454
ކޮމެންޓްތައް
ފެއާރީ
28 October 2021
އަވަސް ޝިފާއެއް މިންވަރުކުރައްވާށި! އަޅަމެންގެ ޅަދަރިން ބަލިމަޑުކަމުން ސަލާމަތްކުރައްވާށި!
ރޯގާ
28 October 2021
ކޮންމެ ދުވަހަކު އެތައް ބަޔަކުގެ ދަރިންގެ ޙާލު ދެރަވެގެން ލޯ މެރިފައިވާ ޙާލު ކޮނޑުމަތީގައި ބާއްވައިގެން އައި.ޖީ.އެމް.އެޗް ކިޔުގައި ތިބެތިބެ ވަރުބަލިވެގެން ގެއަށް ދާއިރު ހާދަ ދެރަވެއެވެ.