ރައްޔިތުންގެ މަޖިލީހުގެ ރައީސް މުހައްމަދު ނަޝީދު އިސްވެ ރިޔާސީ ކެންޑިޑޭޓަކު ނެރުމުގެ އަމާޒަށް އުފައްދަވާ "ދަ ޑިމޮކްރެޓްސް" އިން އިންތިހާބުގެ މަޝްވަރާތައް ޖުމްހޫރީ ޕާޓީ އާއި ޕީޕީއެމާ އެކު ވެސް ކުރަމުން އަންނަ ކަމަށާއި އެއީ ހުރިހާ އެންމެންނާ އެކު ވެސް ވާހަކަ ދައްކަން ހުޅުވިފައި އޮތް ޕާޓީއެއް ކަމަށް ތަރުޖަމާން، އަފްޝަން ލަތީފް މިއަދު ވިދާޅުވެއްޖެ އެވެ.
އެމްޑީޕީގެ ތެރެއިން އިއުލާންކުރި ސިޔާސީ ހަރަކާތް "ފިކުރެއްގެ ދިރުން" ފެކްޝަނުން ޕާޓީއެއް އުފެއްދުމުގެ ކުރިން، ރިޔާސީ އިންތިހާބަށް ޖުމްހޫރީ ޕާޓީއާ އެކު މަސައްކަތްތަކެއް ކުރަން މަޝްވަރާ ކުރިއަށް ގެންދިޔަ އެވެ. ބައްދަލުވުންތަކަކަށް ފަހު މެނިފެސްޓޯ އެކުލަވާލުމާ ހިސާބަށް ދިޔަ ނަމަވެސް މިހާތަނަށް ނިމުނު ގޮތެއް އޮތީ އިއުލާން ނުކޮށެވެ.
އަލަށް އުފައްދާ ޕާޓީން މިއަދު ހ. މައިޒާންދޮށުގޭ ބޭއްވި ޕްރެސް ކޮންފަރެންސްގައި އަފްޝަން ވިދާޅުވީ އެއްވެސް ބަޔަކާ އެކު ކުރި މަޝްވަރާތައް ނިމުމަކަށް ނާންނަ ކަމަށާއި ޕީޕީއެމް ޕީއެންސީއާ އެކު ވެސް މަޝްވަރާތައް ކުރިއަށް ގެންދާ ކަމަށެވެ.
"ގާސިމް އާއި ޖޭޕީ އާއެކު އޮތް އެއްވެސް މަޝްވަރާއެއް ބްރޭކް ޑައުންވި ކަމަކަށް އަޅުގަނޑުމެން ނުދެކެން،" އަފްޝަން މިއަދު ވިދާޅުވި އެވެ.
"އަޅުގަނޑުމެންގެ [ދަ ޑިމްކްރެޓްސް] ގެ ތެރެއިން ބޭފުޅުން ޖޭޕީގެ ބޭފުޅުންނާ އެކީ ވެސް އަދި ހަމަ އޭގެ އިތުރުން ޕީޕީއެމް ވެސް ޕީއެންސީ ވެސް އަދި އެހެން ބޭފުޅުންނާ އެކީގައި ވެސް މަސައްކަތް ކުރައްވާ މަޝްވަރާ ކުރަމުން ގެންދަވަނީ މިހާރު ވެސް."
ޕާޓީ އުފައްދަން މަސައްކަތް ފެށުމުގެ ކުރިން ދަ ޑިމޮކްރެޓްސްގެ އިސް ބޭފުޅުން ވަނީ "ފިކުރެއްގެ ދިރުން" ނަމުގައި އެމްޑީޕީގައި ގޮފިތަކެއް ހެދުމުގެ މަސައްކަތް ވެސް ފަށައިފަ އެވެ. އެކަމަކު އެ ގޮފި އުފައްދަން އެމްޑީޕީގެ އިދާރާ އަށް ހުށަހަޅާފައެއް ނުވެ އެވެ. ގޮފި އުފައްދަން ހުށަނާޅައި ޕާޓީ އަކާ ހަމައަށް ވަޑައިގަތީ އެމްޑީޕީގެ ތެރެއިން އެއް ވެސް ފޯމިއުލާ އަކަށް ހައްލެއް ނުލިބުމުން ކަމަށް އަފްޝަން ވިދާޅުވި އެވެ.
"ކޮންމެ ބަޔަކާ އެކު މަސައްކަތް ކުރަން ޖެހުނު ކަމުގައި ވީނަމަވެސް ސިޔާސީ ގޮތުން އަޅުގަނޑުމެން ކުރަން ޖެހޭ ކޮންމެ މަސައްކަތެއް ކުރި ކަމުގައި ވިޔަސް އެ އުސޫލު ހިފެއްޓާނެ. އެ އަސްލު ނުގެއްލޭ ގޮތް އެއީ އަޅުގަނޑުމެން ހުށަހަޅާނެ ފޯމިއުލާ އަކީ. [އެމްޑީޕީގައި] އެ ފޯމިއުލާއިން މަސައްކަތް ނުކުރެވުނީމާ ދެން އަޅުގަނޑުމެން މި ޕާޓީ އާ ހަމައަށް އައީ،" އަފްޝަން ވިދާޅުވި އެވެ.
އަފްޝަން ވިދާޅުވީ ފިކުރެއްގެ ދިރުމުގެ ގޮފީގައި ބައިވެރިވާން ސޮއި ކުރި މެންބަރުން ވެސް އަދި ޕާޓީ އަށް ސޮއި ނުކޮށް ތިބި މީހުން ވެސް ދަ ޑިމޮކްރެޓެސް އަށް ސޮއި ކުރަން ޝައުގުވެރިވާކަން ފާޅުކޮށްފައިވާ ކަމަށެވެ.
އެކަމަކު އެ ގޮތްޕަށް ސޮއި ކުރި ކިހާ އަދަދެއްގެ މަންބަރުންނެއް ކަމެއް އަފްޝަން ވިދާޅެއް ނުވެ އެވެ. އޭނާ ވިދާޅުވީ އެ ގޮފި އުފެއްދުމުގެ މަސައްކަތުގައި އޭނާ އޭރު އުޅެފައި ނުވާތީ އެ މައުލޫމާތު އެނގިވަޑައި ނުގަންނަވާ ކަމަށެވެ.
ނަޝީދު އެމްޑީޕީން ވަކިވެވަޑައިގެން، ޑިމޮކްރެޓްސްއާ ގުޅިވަޑައިގަންނަވާނެ ތާރީހަކީ ކޮބައިތޯ ނޫސްވެރިން ކުރި ސުވާލަކަށް ވެސް އަފްޝަން ޖަވާބެއް ނުދެއްވަ އެވެ. އޭނާ ވިދާޅުވީ އާ ޕާޓީގެ ހުރިހާ ކަމެއް ހިނގަނީ ނަޝީދަށް އެނގިވަޑައިގެން ކަމަށާއި އެކަމަކު އެމްޑީޕީ ދޫކޮށްލައްވައި ޑިމޮކްރެޓްސްއާ ގުޅިވަޑައިގަތުމަކީ ނަޝީދުގެ އަމިއްލަ ނިންމެވުމެއް ކަމަށް ވިދާޅުވި އެވެ.
ޕާޓީ އުފެއްދުމުގެ ހުއްދައަށް ހުށަހަޅާފައިވާ އިރު އަފްޝަން ވިދާޅުވީ ޕާޓީ އުފެއްދުމުގެ ހައްދަ ލިބޭހާ އަވަހަކަށް މެންބަޝިޕް ޑްރައިވެއް ފަށާނެ ކަމަށެވެ.