ދަރަނީގައި ތާށިވި ތައުލީމީ ދާއިރާގެ ނަތީޖާ ކިހިނެއް؟

ރައީސް ޑރ. މުހައްމަދު މުއިއްޒު ވެރިކަމާ ހަވާލުވެވަޑައިގެންނެވިއިރު ކުރިމަތިވެފައި އޮތް އިގުތިސާދީ އުނދަގޫ ހާލަތާއި އަމިއްލަ އެކި ފަރާތްތަކަށް އެޑިއުކޭޝަން މިނިސްޓްރީ މިލިއަނުން ދަރާފައި އޮތުމުގެ ބުރަ ވަރަށް ބޮޑެވެ. އުމްރާނީ ގޮތުން އެހެންވެ މާ ބޮޑު ކުރިއެރުމެއް ނެތެވެ. ނަމަވެސް އެޑިއުކޭޝަން މިނިސްޓަރު ޑރ. އިސްމާއިލް ޝަފީއު ދެކެވަޑައިގަންނަވާ ގޮތުގައި އުނދަގޫ ހާލަތުގެ ތެރޭގައި ވެސް ތައުލީމީ ދާއިރާގެ ނަތީޖާ މުޅިއަކުން ގޯހެއް ނޫނެވެ. ކާމިޔާބީތަކެއް ހާސިލް ކުރެވިއްޖެ އެވެ.

މިއީ މި ސަރުކާރުގެ ފުރަތަމަ އަހަރު ތައުލީމީ ދާއިރާގެ އުސްއަލިތަކެވެ.

ހަވާލުވިއިރު 287 މިލިއަން ނުދައްކާ އޮތް!

ވެރިކަމާ ހަވާލުވެވަޑައިގެންނެވިއިރު، އެންމެ އުނދަގޫވީ ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުގެ ދަރަނިތަކާ ހެދި ކުރިމަތިވި އިގުތިސާދީ ހާލަތުގެ އުނދަގޫ ކަން ކަމަށް ރައީސް މުއިއްޒު އެތައް ފަހަރަކު ވަނީ ވިދާޅުވެފަ އެވެ. ތައުލީމީ ދާއިރާ ވެސް އެ ދަތިތަކުން އިސްތިސްނާއެއް ނުވެ އެވެ.

އެހެންވެ، އެޑިޔުކޭޝަން މިނިސްޓަރު އިސްމާއިލް މިދިޔަ އެއް އަހަރު ތެރޭގައި އެންމެ ބޮޑު އިސްކަމެއް ދެއްވީ އެ ފައިސާ ދެއްކެވުމަށެވެ.

އޭނާ ވިދާޅުވީ، މި ސަރުކާރު ވެރިކަމާ ހަވާލުވިއިރު، އެޑިއުކޭޝަން މިނިސްޓްރީން އެކި ފަރާތްތަކަށް 287 މިލިއަން ރުފިޔާ ދައްކަން ޖެހިފައި އޮތް ކަމަަށެވެ. އެއީ 2019 އިން 2023 އަށް ދޭންޖެހޭ ފައިސާގެ އަދަދެވެ. ފަސް އަހަރުގެ ވެރިކަމަށް ފަހު، އެހާ ބޮޑު ދަރަންޏެއް ކޮނޑުގައި އަޅަން ޖެހުންވީ އުނދަގޫ ކަމަކަށެވެ. އެކަމަކު، ދަތިތަކާ އެކު ވެސް ބޮޑު އަދަދެއް ދައްކައި ނިންމި އެވެ.

"މި އަހަރު ވަނީ އޭގެ ތެރެއިން 249 މިލިއަން ދައްކާ ނިންމާފައި. މިހާރު ބާނީ ނުދެއްކި އޮތީ 37 މިލިއަން. އެންމެ ބޮޑު ގޮންޖެހުމަކަށްވީ އެ ފައިސާ ދައްކަމުން، މަސައްކަތްތައް ކުރިއަށް ގެންދިއުން،" މިނިސްޓަރު ވިދާޅުވި އެވެ.

ތައުލީމީ ދާއިރާގައި މި ސަރުކާރުން ފަށަން ބޭނުންވި އުމްރާނީ މަސައްކަތަތްތައް ނުފެށި ލަސްވި ސަބަބެއް ކަމަށް މިނިސްޓަރު ވިދާޅުވީ ވެސް ދަރަނިތައް ދައްކަން ޖެހުމާއި ބަޖެޓުގެ ތާށި ކަމެވެ. ކުރީގެ ސަރުކާރުގައި ފަށާފައި ހުރި ޕްރޮޖެކްޓްތަކަށް ވެސް ބަޖެޓް ނެތުމެވެ. އެކަމަށް ބޭނުންވާ ފައިސާ ހިމަނާފައި ނުވުމެވެ.

އެޑިއުކޭޝަން މިނިސްޓްރީން ދޭން ޖެހޭ ފައިސާތަކުގެ ބޮޑު ބައެއް ދޫކޮށްފައިވާ ކަމަށާއި ބާކީ ހުރި ފައިސާ އަކީ މިނިސްޓްރީން ބަލަން ޖެހޭ ކަންކަން ބެލުމަށް ފަހު، ދޫކުރަން ޖެހޭ ފައިސާ އަށް ވާތީ އަދި ނުދައްކާ ހުރީ ކަމަށް އިސްމާއިލް ވިދާލުވި އެވެ.

ފައިސާގެ ބޮޑު ބައެއް ދެެއްކުމަކީ މި ސަރުކާރަށް ލިބުނު ކާމިޔާބީއެއް ކަން މިނިސްޓަރު ފާހަގަ ކުރެއްވި އެވެ.

ބޮޑު ޗުއްޓީގެ ބޮޑު ބަދަލު ބެލެނިވެރިން ބޭނުންވި ގޮތަށް!

ކުރީގެ ސަރުކާރުގައި ތިއްބެވި ތައުލީމީ ދާއިރާގެ ބޭފުޅުން އޭރު ވިދާޅުވަމުން ގެންދެވީ ކޮވިޑާ އެކު، ސްކޫލްތަކުގެ ބޮޑު ޗުއްޓީ ޖޫން/ޖުލައި އަށް ބަދަލުކުރަން ނިންމީ ދިރާސާއެއްކޮށް، ވަރަށް ގިނަ ބައެއްގެ އެދުމުގެ މަތިން ކަމަށެވެ. އެ ދިރާސާގައި ބައިވެރިވި ގިނަ ބެލެނިވެރިންގެ އިއްތިފާގުން ކަމަށް އޭރު ބުންޏެވެ. އެކަމަކު، ސްކޫލްތަކުގެ ބޮޑު ޗުއްޓީ އަށް ކުރީގެ ސަރުކާރުން ގެނައި ބަދަލަށް އޭރު ވެސް އާންމުން ދިޔައީ ފާޑުކިޔަމުންނެވެ.

ބޮޑު ޗުއްޓީ އަހަރުގެ މެދަށް ބަދަލުކުރުމުން، އެ ދުވަސްވަރު ދިމާވީ ހުޅަނގު މޫސުމުގެ ވިއްސާރައާ ކަމަށާއި އޭގެ ސަބަބުން ދަތުރުފަތުރުކުރުމަށް ދަތިވެ، ބެލެނިވެރިންނާއި ކުދިންގެ ޗުއްޓީ އަށް ބުރޫއަރައި އެތައް ތަކުލީފެއް ކުރިމަތިވުމުގެ ޝަކުވާ ވަރަށް ބޮޑުވި އެވެ.

މިދިޔަ އަހަރުގެ ރިޔާސީ އިންތިހާބުގެ ކެމްޕޭނަށް ރައީސް މުއިއްޒު ރާއްޖޭގެ ހުރިހާ ރަށަކަށް ކަހަލަ ގޮތަކަށް ކުރެއްވި ދަތުރުފުޅުގެ ތެރެއިން ވެސް، އެންމެ ގިނަ މީހުންގެ ފަރާތުން އެދުނީ ދިރާސީ އަހަރު ފަށާ ދުވަސްވަރު ކުރިން އޮތް ގޮތަށް ބަދަލުކޮށްދިނުމަށެވެ. އެހެންވެ، އެ މަނިކުފާނު ތައުލީމީ ދާއިރާއަށް ވެވަޑައިގަތް އެންމެ މުހިންމު އެއް ވައުދަކަށްވީ މި ވެރިކަމުގެ ފުރަތަމަ 100 ދުވަހުގެ ތެރޭގައި ބޮޑު ޗުއްޓީ އަލުން ޑިސެމްބަރު މަހު ލިބޭ ގޮތަށް ބަދަލުކުރުމެވެ.

މިދިޔަ އަހަރު ނޮވެމްބަރު 17 ގައި ރައީސްގެ މަގާމުގެ ހުވާ މުއިއްޒު ކުރެއްވުމަށް ފަހު، މި ސަރުކާރު ވެރިކަމާ ހަވާލުވެ ތައުލީމީ ދާއިރާއަށްވީ ވައުދުތަކުގެ ތެރެއިން އެންމެ ފުރަތަމަ ފުއްދި ވައުދަކީ ވެސް ސްކޫލްތަކުގެ ކުދިންގެ ބޮޑު ޗުއްޓީ ބަދަލު ކުރުމުގެ ވައުދެވެ. ދިރާސީ އަހަރު ފެށުން ކުރިން އޮތް ގޮތަށް ޖެނުއަރީ މަހަށް ބަދަލު ކުރާނީ 2026 ވަނަ އަހަރުގައި ކަމަށާއި އަންނަ އަހަރުގެ ޑިސެމްބަރުގައި ކުރިއެކޭ އެއްގޮތަށް ޑިސެމްބަރު މަހު ބޮޑު ޗުއްޓީ ލިބޭނެކަން މިދިޔަ ޖެނުއަރީ މަހު އިއުލާން މި ސަރުކާރުން އިއުލާންކުރި އެވެ.

ބެލެނިވެރިން ބޭނުންވި ގޮތަށް ގެނައި އެ ބަދަލާ އެކު، އެކަޑެމިކް ކަލަންޑަރަށް ވެސް ބަދަލުތަކެއް ގެންނަން ޖެހުނެވެ. އެގޮތުން ގެނައި ބަދަލުތަކަކީ:

- މި އަހަރުގެ ކިޔެވުން ނިމޭނެ ކަމަށް ކުރިން ކަނޑައަޅާފައި އޮތީ ފެބްރުއަރީ މަހު ކަމަށް ވިޔަސް މިހާރު ވަނީ މާޗް މަހަށް ބަދަލު ކޮށްފައި.

- ބޮޑު ޗުއްޓީ ލިބޭނީ ރޯދަ މަހު [އަންނަ އަހަރުގެ ވެސް ރޯދަ މަހުގެ ފަހު 10 ބަންދުވާ ގޮތަށް އޮތް އިރު ދަރިވަރުންނަށް ބޮޑު ޗުއްޓީ ދީފައި ވަނީ ވެސް އެ ދުވަސްތައް ބޮޑު ޗުއްޓީއަށް ވަންނަ ގޮތަށް. އެއީ މާޗް 21 އިން އޭޕްރީލް 2 އަށް]

- މި އަހަރު ފެށިއިރު، ގްރޭޑް 8 ކިޔަވާ ކުދިން އަންނަ އަހަރުގެ އޮކްޓޯބަރު/ނޮވެމްބަރުގައި އޯ ލެވެލް ހެދުން [މިހާރު އެ ކުދިން ވަނީ ގްރޭޑް 9 ގައި ކިޔަވަން ފަށާފައި]

- މިހާރު ގްރޭޑް 8 ގައި ކިޔަވާ ކުދިންގެ ޓެސްޓު ޑިސެމްބަރާއި ފެބްރުއަރީ އަށް ބަހާލުން

އޭލެވެލަށް ކުދިން އިތުރު ކުރުމާއި ގައުމިއްޔަތު ކިޔަވައިދޭން ފެށުން

މާލޭގައި ޒަމާންވަންދެން ހިންގި އޭ ލެވެލް ސްކޫލް، ސީއެޗްއެސްއީ އިމާރާތް ބޭނުންކުރުން މިދިޔަ އޮގަސްޓް މަހު ހުއްޓާލުމަށް ފަހު، ސީއެޗްއެސްއީ ބަދަލުކުރީ ހުޅުމާލޭގައި އަލަށް ހެދި އިމާރާތަށެވެ. މި މަހު އެ ސްކޫލު ރަސްމީކޮށް ހުޅުވި ނަމަވެސް ސެޕްޓެމްބަރު މަހު ވަނީ ކިޔަވައިދޭން ފަށައިފަ އެވެ.

އަދި އޭލެވެލް ކިޔަވާ ކުދިންގެ އަދަދު އިތުރު ކުރުމަށް އެންމެ މާއްދާއަކުން ފާސްވިޔަސް އޭލެވެލް ކިޔެވޭނެ ގޮތަށް ވެސް ވަނީ ބަދަލު ކޮށްފަ އެވެ. ނަތީޖާއަކަށްވީ ރައީސް ޑރ. މުހައްމަދު މުއިއްޒުގެ އިރުޝާދުގެ ދަށުން އެޑިއުކޭޝަން މިނިސްޓްރީން ކުރި މަސައްކަތުން ކުރީ އަހަރަށް ވުރެ މި އަހަރު އޭލެވެލަށް ކިޔަވަން ފެށި ކުދިންގެ ނިސްބަތް 70 ޕަސެންޓަށް އިތުރު ވުމެވެ.

އެފަދަ ނިންމުމެއް ނިންމުމުން ގައުމީ އުފެންދުންތެރިކަމަށް ބޭނުންވާ ޒުވާނުންގެ އައު ޖީލެއް ޔުނިވާސިޓީތަކުގެ ތެރެއިން ނުކުމެގެން އައުން ކަމަށް ވެސް މިނިސްޓަރު ވިދާޅުވި އެވެ.

"ސަރުކާރުގެ ސްކޫލުތަކުގައި މިދިޔަ އަހަރު، 2023 ވަނަ އަހަރަށް ވުރެ 2024 ވަނަ އަހަރު ގްރޭޑް 11 އަށް ވަން ދަރިވަރުންގެ އަދަދު 70 އިންސައްތަ އަށް މި ވަނީ އިތުރު ކުރެވިފައި،" އިސްމާއިލް ވިދާޅުވި އެވެ.

މިދިޔަ އަހަރު ރިޔާސީ ކެމްޕޭނުގައި ރައީސް ވެ ވަޑައިގެންނެވި ވައުދަކީ ގައުމިއްޔަތު ވަކި މާއްދާއެއްގެ ގޮތުގައި ކިޔަވައި ދެއްވާނެ ކަމެވެ. އަޖުމަބެލުމުގެ ގޮތުން 11 ސްކޫލެއްގެ ގްރޭޑް 4 ގެ ދަރިވަރުންނަށް އެ މާއްދާ، ޖެނުއަރީގައި ފެށި ޓާމުގައި ކިޔަވައިދޭން ފެށި އެވެ. އަދި މި އަހަރު އަލަށް ފެށި 2024ގެ ދިރާސީ އާ އަހަރު ވަނީ ގްރޭޑް 1 އިން 6 ގެ ދަރިވަރުންނަށް ކިޔަވައިދޭން ރަސްމީކޮށް ފަށައިފަ އެވެ.

އޭގެ އިތުރުން ގައުމިއްޔަތު ދިރުވުމުގެ ގޮތުން ރައީސް މުއިއްޒު ވަނީ ރާއްޖޭގެ ހުރިހާ ސްކޫލެއްގެ އެސެމްބްލީގައި ގައުމީ ސަލާމް ކިޔަން ޖެހޭ ގޮތަށް ވެސް ނިންމައިފަ އެވެ. ރައީސް ވިދާޅުވެފައިވާ ގޮތުގައި އެ ގޮތަށް ނިންމެވީ ގައުމު ދެކެ ލޯބިވާ ކުދި ބަޔަކަށް ދަރިވަރުން ހެދުމަށާއި ގައުމީ ސަލާމާއި ގައުމީ ދިދަ ދެކެ ލޯބިވާ ބަޔަކަށް ތުއްތު ކުދިން ހެދުމަށެވެ.

ބަދަލުތަކާ އެކު، އަރަބިއްޔާގެ އާ އިމާރާތް އަޅަން އާ ބަޔަކަށް

ކުރީގެ ރައީސް އިބްރާހިމް މުހައްމަދު ސޯލިހުގެ ސަރުކާރުން އަރަބިއްޔާގެ އާ އިމާރާތް ބާ ޖަމާލުއްދީން ހުރި ބިމުގައި ހަދަން އަމިން ކޮންސްޓްރަކްޝަނާ ހަވާލުކުރީ ސެޕްޓެމްބަރު 29، 2022 ގަ އެވެ. އެއީ 420 ދުވަހުގެ ތެރޭގައި ނިންމާ ގޮތަށެވެ. އޭރު އެ ކުންފުންޏާ އެކު ސަރުކާރުން އެއްބަސްވީ 168.5 މިލިއަން ރުފިޔާއަށެވެ.

އެކަމަކު، ރައީސް މުއިއްޒު ވެރިކަމާ ހަވާލުވެވަޑައިގެން، ނިންމެވީ ބާ ޖަމާލުއްދީން ހިމެނޭ ސަރަހައްދަކީ ޓްރެފިކް ވަރަށް ބޮޑަށް ތޮއްޖެހޭ އަދި ހަލަބޮލި ސަރަހައްދަކަށް ވާތީ އެހެން ތަނަކަށް އަރަބިއްޔާގެ އާ އިމާރާތް ބަދަލުކުރާށެވެ. އެހެންވެ، މި ސަރުކާރުން ދެއްކީ ކުރީގެ ކުނިކޮށި ހުރި ބިން ކަމަށްވާ 381 ނަންބަރު ކޮށްޓެވެ. އެ ބިމަށް އަރަބިއްޔާގެ އާ އިމާރާތުގެ މަސައްކަތް ބަދަލުކޮށް، އެއީ އެ ސްކޫލް ދާއިމީ ބިން ކަމަށް ވެސް ރައީސް ނިންމެވި އެވެ.

އެކަމަކު، ކުރީގެ ސަރުކާރުން އަމިން ކޮންސްޓްރަކްޝަނާ ހަވާލު ކޮށްފައިވާ އަރަބިއްޔާގެ އާ އިމާރާތުގެ ކޮންޓްރެކްޓް ވީ މި ސަރުކާރަށް ބޮޑު ގޮންޖެހުމަކަށެވެ. މަސައްކަތުގެ އެއްބަސްވުމުގައި ޖަހާފައިވާ އަދަދު ބޮޑުކަމުން ކުރިއަށް ދެވޭ ވަރެއް ނުވެ، މި އަހަރުގެ ސެޕްޓެމްބަރު މަހު ޖެހުނީ ބާތިލް ކޮށްލާށެވެ. އަދަދު ކުޑަކުރާކަށް އަމިން އިން ބޭނުން ނުވި ކަމަށް މިނިސްޓަރު ވިދާޅުވި އެވެ.

އަރަބިއްޔާ ސްކޫލްގެ އާ އިމާރާތުގެ އަމަލީ މަސައްކަތް މި ވެރިކަމުގެ ފުރަތަމަ 100 ދުވަހު ފެށުމަށް ވައުދުވި ކަމަށާއި 80 މިލިއަން ރުފިޔާ ހަރަދުކުރާ ގޮތަށް އެ މަސައްކަތް ފެށި ނަމަ އެ ވައުދު ފުއްދޭނެ ކަމަށް މިނިސްޓަރު ވިދާޅުވި އެވެ. ނަމަވެސް އެއީ ރައްޔިތުންގެ ފައިސާ އަށް ވުމުން އެކަން އެގޮތަށް ނުކުރެއްވީ ކަމަށް އޭނާ ވިދާޅުވި އެވެ.

މިނިސްޓަރު އިސްމާއިލް މިދިޔަ ހަފުތާގައި "މިހާރު" އަށް ދެއްވި އިންޓަވިއުގައި ވިދާޅުވީ މިހާރު އާ ކޮންޓްރެކްޓަކާ އެކު އެއްބަސްވުމުގައި ސޮއި ކޮށްފައިވާ ކަމަށެވެ.

"މިއަދު އަޅުގަނޑުމެން މި ސޮއިކުރީ އާ ކޮންޓްރެކްޓަކާ އެކު. އެއީ ކުރިން ލިބިފައި އޮތް އެއްބަސްވުމުގެ އަގަށް ވުރެ 83 މިލިއަން ކުޑަ އަގަކަށް،" އިސްމާއިލް ވިދާޅުވި އެވެ.

އަރަބިއްޔާ ސްކޫލްގެ އާ އިމާރާތުގެ މަސައްކަތް ރަޝީދު ކާޕެންޓްރީ އެންޑް ކޮންސްޓްރަކްޝަން (އާރުސީސީ) އާ ހަވާލުކުރީ މިދިޔަ އަންގާރަ ދުވަހު އެވެ. އެއީ 85 މިލިއަަން ރުފިޔާއަށެވެ.

އަރަބިއްޔާ ސްކޫލްގެ އިމާރާތުގެ އަމަލީ މަސައްކަތް ފަށަން މިހާރު ތައްޔާރުވެފައި ވާއިރު، ބާވެ ބޮލަށް ވެއްޓެން ކައިރިވުމުން އިއްޒުއްދީން ސްކޫލްގެ ދަރިވަރުންނަށް ވަނީ ދަރުމަވަންތަ ސްކޫލު ހަމަޖައްސައިދީފަ އެވެ.

ތައުލީމީ ދާއިރާ އަށް އޮތް އެންމެ ބޮޑު އެއް ގޮންޖެހުމަކީ އިމާރާތްތައް ވަރަށް ބޮޑަށް ބާވުމެވެ. އިއްޒުއްދީން ސްކޫލަކީ ވެސް އޭގެ އެއް މިސާލެވެ. ސްކޫލް ބޮލަށް ވެއްޓެން ކައިރިވިއިރު، އެ ތަން އަލުން ހަދާނެ ފައިސާއެއް ނެތެވެ. އަލުން ހަދާ ނަމަ އެހާ ހަރަދު ބޮޑެވެ.

ތައުލީމީ ދާއިރާ ރަނގަޅުކޮށް، ދިވެހި ޓީޗަރުން އިތުރު ކުރަން ބޮޑު މަޝްރޫއެއް ފެށުން

ޓީޗަރުން ނުލިބުމުގެ މައްސަލާގައި އެންމެ ބޮޑު ކަންބޮޑުވުމެއްގެ ގޮތުގައި ކުރިން އޮތީ ޓީޗަރުންގެ މުސާރަ ކުޑަވުމެވެ. ޓީޗަރުން ހޭދަ ކުރަން ޖެހޭ ވަގުތާއި އުފުލަން ޖެހޭ ބުރަ އަށް ބަލައި މުސާރަ ކުޑަވުމަކީ މި ދާއިރާއަށް ޝައުގުވެރިކަން ގެއްލޭ ސަބަބެކެވެ. މުސާރަ ބޮޑުކުރުމަކީ ވަރަށް ބޮޑު ހައްލަކަށް ވެދާނެ ކަމަށް ބަލައި 2022 ގައި ޓީޗަރުންނާއި ޕްރިންސިޕަލުންގެ އޮނިގަނޑަށް ބަދަލު ގެނެސް މުސާރަ ބޮޑުކުރި އެވެ.

އެކަމަކު އޭގެ ފަހުން މިހާތަނަށް ފެންނަން އޮތް ތާފާސްހިސާބުތަކުގައިވާ ގޮތުން މި ދާއިރާގައި ދިވެހިން ނުހިފެހެއްޓެ އެވެ. އަދި އަލަށް ވަންނަ މީހުން ވެސް އިތުރެއް ނުވެ އެވެ.

މިދިޔަ އަހަރު ރާއްޖޭގެ ކޮލެޖް/ޔުނިވާސިޓީތަކުން ކިޔަވައިގެން ގްރޭޖުއޭޓްވެ، މުޅި އަލަށް ދާއިރާއަށް ގުޅުނީ އެންމެ 47 ޓީޗަރުންނެވެ. މިއީ، ތައުލީމީ ދާއިރާގެ ވަރަށް ބޮޑު ކަންބޮޑުވުމެކެވެ. ތައުލީމީ ދާއިރާގެ ކުރިމަގަށް ބަލާއިރު ސީރިއަސް މައްސަލައެކެވެ. މިކަން ހައްލުކުރަން، ގައުމީ ފެންވަރުގައި މަސައްކަތްތަކެއް ކުރަން މި ސަރުކާރުން ވަނީ އަމާޒު ހިފައިފަ އެވެ.

ޓީޗަރުންގެ ބުރަ ދުވަސްތަށް ލުއި ކޮށްދިނުމަށް ވެސް ވަނީ ގިނަ ކަންތައްތަކެއް މިދިޔަ އެއް އަހަރުތެރޭ ކޮށްފަ އެވެ.

"ހުކުރު ދުވަސް ޓީޗަރުންނަށް މި ވަނީ ހުސް ދުވަހެއް ގޮތަށް ބަންދު ކޮށްދެވިފައި. ޓީޗަރުންނާއި ޕްރިންސިޕަލުންގެ "ވޯކްލޯޑް" ކުޑަކުރުމަށް ވައިބާ ގްރޫޕުތައް ވަކި ގޮތަކަށް ބޭނުން ކުރާ ގޮތަށް ހެދުން، ޓާމް ބަންދުގައި ޓީޗަރުން ނެރުން ފަދަ ކަންކަން ހިމެނޭ،" މިނިސްޓަރު ވިދާޅުވި އެވެ.

ރައީސް މުއިއްޒުގެ ރިޔާސީ ވައުދުތަކުގެ ތެރޭގައި ހިމެނޭ، ދިވެހި ޓީޗަރުން އިތުރު ކުރުމުގެ ޕްރޮގްރާމް އެ މަނިކުފާނު ފައްޓަވައިދެއްވީ މި މަހު އެވެ. މިނިސްޓަރު ވިދާޅުވީ އެ ޕްރޮގްރާމްގެ ދަށުން ކޮންމެ އަހަރަކު މަދުވެގެން 150 ދަރިވަރުން ތަމްރީނު ކުރުމަކީ އަމާޒެއް ކަމަށެވެ.

ރާއްޖޭގެ 20 އަތޮޅަށް 2،000 އަށް ވުރެ ގިނަ ޓީޗަރުން މިހާރު ވެސް ބޭނުންވާއިރު، މިނިސްޓްރީން ވަނީ މިހާރު އޭލެވެލް ކިޔަވާ ކުދިންގެ ތެރެއިން ޓީޗިން އިން ކުރިއަށް ދާން ބޭނުންވާ 140 އަށް ވުރެ ގިނަ ކުދިންނަށް މާސްޓާސް އަށް ކިޔެވޭނެ ސްކޮލާޝިޕް ތަކެއް ދީފަ އެވެ. އެ ކުދިންނަށް ކޮންމެ މަހަކު 1،500ރ. ގެ އެލަވެންސެއް ވެސް ލިބޭނެ އެވެ.

ޓީޗިން ދާއިރާއަށް ދިވެހިން އިތުރު ކުރުމަށް އަތޮޅުތަކަށް މިނިސްޓްރީގެ ޓީމުތަކުން ދަތުރުކޮށް ކުރި މަސައްކަތުން ޑިގްރީ ކޯސްތަކުގައި މި އަހަރު 640 މީހުން ބައިވެރިވެފައިވެ އެވެ.

އެ ޕްރޮގްރާމް ނިމި، ޓީޗަރުން މަސައްކަތް ކުރާ ވަގުތަށް ގެންނަ ބަދަލާ އެކު، ކުރާ މަސައްކަތާ އެއްވަރުގެ މުސާރައެއް ދިނުމަށް ވަނީ ނިންމައިފަ އެވެ. އޭރުން ޓީޗަރުންނަށް ހަމަޖެހުމުގެ ނޭވާއެއް ލެވި، ދާއިރާގައި ހުރި މައްސަލަތަކަށް ހައްލު ލިބޭނެކަން މިނިސްޓަރު ގަބޫލު ކުރައްވަ އެވެ.

ޓީޗަރުން އިތުރު ކުރުމުގެ މަސައްކަތް ފަށާފައި ވާއިރު، ގްލޯބަލް ޕާޓްނަޝިޕް ފޯ އެޑިއުކޭޝަން (ޖީޕީއީ)ގެ ހިލޭ އެހީގައި ރައީސްގެ ތައުލީމީ ތަސައްވުރުގެ ދަށުން ތައްޔާރު ކޮށްފައިވާ ޕްލޭން ކާމިޔާބު ކުރުމަށް ޔުނިސެފާއި ވޯލްޑް ބޭންކުން ވަނީ 9.5 މިލިއަން ޑޮލަރު ލިބިފަ އެވެ.

ތައުލީމާއި ދަރިވަރުންގެ އުނގެނުން ހަރުދަނާ ކުރުމަށް އެކުލަވައިލި ލަނޑުދަނޑި:

- އެއްވެސް ކުއްޖަކު ބާކީ ނުކޮށް، ޝާމިލް ގޮތެއްގައި ތައުލީމު ފޯރުކޮށްދިނުން.

- އުމުރާ އެކަށީގެންވާ ވަރަށް ލިޔަންކިޔަން ދަސްކޮށްދިނުމާއި ޓްރާންސްފަރަބަލް ހުނަރެއް އަށަގެންނެވުމާއި ޑިޖިޓަލް ވަސީލަތްތައް ބޭނުންކޮށްގެން އުނގަންނައިދިނުން ހަރުދަނާ ކުރުން.

- އެކާވީސްވަނަ ވަނަ ގަރުނުގެ ހުނަރުތަކަށް އިސްކަންދީގެން އުނގެނުމަށް އިތުރު މަގުތައް ފަހިކޮށްދިނުން.

- ކިޔަވައިދިނުމުގެ ފެންވަރު އިތުރަށް ރަނގަޅުކޮށް، ޓީޗަރުންނަކީ ކޮންމެ ކުއްޖަކު ވެސް އުނގެނުމަށް މަގުފަހިކޮށްދޭ އަދި ހިތްވަރުދޭ ބަޔަކަށް ހެދުން.

މި އަހަރު ތައުލީމީ ދާއިރާއަށް އުމްރާނީ ގޮތުން ބޮޑު ކުރިއެރުމެއް ފެންނަން ނެތް ނަމަވެސް އަންނަ އަހަރަށް ފާސް ކޮށްފައިވާ ބަޖެޓުގެ މަޝްރޫއުތަކުން އެކަން ފެންނާނެ ކަމަށް މިނިސްޓަރު ވިދާޅުވި އެވެ.

ގެދޮރުވެރިކަން ނެގުމަށް ފަހު ރައީސް އެންމެ ބޮޑު އިސްކަމެއް ދެއްވަނީ ތައުލީމީ ދާއިރާއަށްކަން ފާހަގަ ކުރައްވަމުން އިސްމާއިލް ވިދާޅުވީ އަންނަ އަހަރު މާލޭގެ އިތުރު ސްކޫލުތައް ވެސް އަޅަން ފަށާނެ ކަމަށެވެ.

އަންނަ އަހަރަށް ލަފާކުރާ ދައުލަތުގެ ބަޖެޓުގައި 5.1 ބިލިއަން ރުފިޔާ ތައުލީމީ ދާއިރާ އަށް ވަނީ ހިމަނައިފަވެ އެވެ. އެ ބަޖެޓުގައި ރާއްޖޭގެ ތައުލީމީ ދާއިރާ ކުރިއަރުވައި، ކުދިންނަށް އިތުރު ފުރުސަތުތައް ހޯދައިދިނުމަށް އިސްކަން ދީފައިވާނެ ކަމަށް ފިނޭންސް މިނިސްޓަރު މޫސާ ޒަމީރު ވަނީ ވިދާޅުވެފަ އެވެ.

މި އަހަރު ރާއްޖޭގެ ހުރިހާ ދާއިރާއެއްގެ ކަންކަން ވެސް ނިންމައިލީ އިގުތިސާދީ ދަތިތަކުގެ ތެރޭގަ އެވެ. އުމްރާނީ ގޮތުން މާ ބޮޑު ކަމެއް ނުކުރެވުނެވެ. އެހެނަސް އަންނަ އަހަރަށް އޮތީ މި ސަރުކާރުގެ ފުރިހަމަ ކޮންޓްރޯލް އޮތް ބަޖެޓާ އެކު ޔަގީން ކަމެވެ.