ދިގު ކިޔޫއެއްގައި ޖެހިގެން، ފްލެޓަށް އެދި 15،000 މީހުން ފޯމު ލީތާ ތިން އަހަރު ވަނީ އެވެ. ގެދޮރުވެރިކުރަން މި ސަރުކާރުން ހުޅުވާލި ފުރަތަމަ މަޝްރޫއުއާ އެކު ގިނަ ބަޔަކު އުއްމީދުކޮށްގެން ތިބީ ލަސްތަކެއް ނުވެ ބޯހިޔާވަހިކަން ލިބޭނެ ކަމަށެވެ. ޕޮއިންޓް ދޭން އާއްމުކުރި އުސޫލަށް ބަލައި އޭރު ބައެއް މީހުން ތިބީ ފްލެޓް ގާތްގަނޑަކަށް ކަށަވަރުކޮށްގެންނެވެ.
މި މަޝްރޫއުގައި އެންމެ ބޮޑަށް އިސްކަންދޭން ހަމަޖައްސާފައި އޮތީ ދިރިއުޅުމުގެ ހާލަތަށެވެ. ޕޮއިންޓް ދޭނެ އުސޫލުގައި ވެސް އެންމެ ބޮޑަށް ހިމަނާފައި ވަނީ ދިރިއުޅުމުގެ ހާލަތާ ގުޅޭ ކަންކަމެވެ. އެކަމަކު ފްލެޓަށް ފޯމުލީ ފަހުން އެތައް ބައެއްގެ ދިރިއުޅުމުގެ ހާލަތަށް މިވަނީ ބޮޑެތި ބަދަލުތަކެއް އައިސްފަ އެވެ. މި ބަދަލުތަކާ އެކު ފްލެޓް ކަށަވަރުކޮށްގެން ތިބި ބައެއް މީހުންނަށް ވެސް މިހާރު ފްލެޓް ލިބޭނެ ކަމުގެ ޔަގީންކަން މިވަނީ ކުޑަވެފަ އެވެ.
މި ފިޔަވަހީގައި ހުޅުމާލެ އިން ދޫކުރަން ނިންމާފައިވާ 1،100 ފްލެޓަށް ފޯމުލީ އިރު ކުއްޔަށް އުޅުނު ގެ ދޫކޮށް އެހެން ގެއަކަށް އެތައް ބަޔަކު ބަދަލު ވެއްޖެ އެވެ. ކައިވެންޏާއި ދަރިންގެ އަދަދުގެ އިތުރުން ދިރިއުޅުމުގެ އެހެން ކަންކަމަށް ވެސް ތަފާތުތަކެއް އަތުވެއްޖެ އެވެ. އެހެންވެ މިނިސްޓްރީން ކުރިން ކަނޑައަޅާފައިވާ އުސޫލަށް ޕޮއިންޓް ދިނުމަކީ މިހާރު އެންމެ އިންސާފުވެރި ގޮތްތޯ ވެސް ބައެއް މީހުން ސުވާލު އުފައްދަ އެވެ.
ސަބަބަކީ، އެންމެ ގިނަ މާކްސް ލިބެނީ ފޯމުލިއިރު، ދިރިއުޅޭ ތަނާއި ދަރިންގެ އަދަދާއި ލިބޭ އާމްދަނީ ފަދަ ކަންކަމަށް ވުމެވެ.
ގެދޮރުވެރިކުރުމުގެ މަޝްރޫއުގެ ކެޓަގަރީތަކާއި ޕޮއިންޓް ދޭން ކަނޑައެޅި އުސޫލް
- މި މަޝްރޫއުގައި ކެޓަގަރީ އެކަކުން ފްލެޓް ލިބެނީ މާލޭ މުނިސިޕަލްޓީގެ ދަފްތަރުގައި ވާ މީހުންނާއި މާލޭގައި ރަށްވެހިވެފައިވާ މީހުންނަށް.
- ދެ ވަނަ ކެޓަގަރީ ހާއްސަކޮށްފައި ވަނީ މާލޭގައި ދިރިއުޅޭ އަތޮޅުތަކުގެ މީހުންނަށް، ތިން ވަނަ ކެޓަގަރީ ހާއްސަކޮށްފައި ވަނީ ބިމުގެ ދަތިކަން ކުރިމަތިވެފައިވާ މީހުންގެ ތެރެއިން އެ ބިންކޮޅު އެއްކޮށް ސަރުކާރަށް ދޭން އެއްބަސްވާ މީހުންނަށް.
- ތިން ކެޓަގަރީގައި ވެސް ޕޮއިންޓް ދިނުމުގައި ބަލަނީ މާލޭގައި ރަށްވެހިވެފައިވާ މުއްދަތަށާއި ބޯހިޔާވަހިކަމުގެ ހާލަތާއި އެ މީހަކު ދިރިއުޅޭ ހާލަތަށް. އޭގެ ތެރޭގައި ދަރިންގެ އަދަދާއި އާއިލާގެ އާމްދަނީ އަށް ބަލާ.
މި މަޝްރޫއުގައި ފްލެޓަށް ކުރިމަތިލީ އަހްމަދު އަބްދުﷲ ބުނީ މާޗު 2014 ގައި އޭނާ ފްލެޓް ފޯމު ނެގިއިރު، ތިން މަސް ތެރޭގައި ދިރިއުޅުމުގެ ހާލަތު ވަޒަންކޮށް ޝަރުތު ހަމަވާ މީހުން ހޮވާނެ ކަމަށް ހައުސިން މިނިސްޓްރީން ބުނެފައިވާ ކަމަށެވެ. އޭގެ ފަހުން ތިން އަހަރު ވީއިރު ވެސް ދިރިއުޅޭ ތަނުގެ ހާލަތު ބަލާފައި ނުވާ ކަމަށް އޭނާ ބުންޏެވެ.
"އަޅުގަނޑު ދިރިއުޅޭ ތަން ބަދަލު ނުވިއަސް އެތައް ކަމެއް ބަދަލުވެއްޖެ. ތަކެތީގެ އަގު މައްޗަށް ޖެހިއްޖެ. ހަމަ މިގޮތަށް އެތައް ބަޔަކު ތިބޭނެ، ދިރިއުޅޭ ތަން ވެސް ބަދަލުވެ، ދަރިންގެ އަދަދު އިތުރުވެ ނުވަތަ މަދުވެފައި ވެސް. އެއް ބަޔަކު ކުރިން ދިރިއުޅުނު ތަނަށް ވުރެ ބޮޑު ތަނަކަށް ނުވަތަ އޭރު ކުރިމަތިލީ މީހުންގެ ތެރެއިން ޝަރުތު ހަމަނުވާ ބަޔަކު ވެސް މިހާރު ތިބެދާނެ،" އޭނާ ބުންޏެވެ.
އޭރުގެ ހާލަތާއި މިހާރުގެ ހާލަތު ބަދަލުވެފައިވާތީ، އޭނާ ދެކޭ ގޮތުގައި، ފްލެޓަށް ޝަރުތު ހަމަވާ މީހުން ހޮވަން ޕޮއިންޓް ދޭ އުސޫލް އަލުން އިވެލުއޭޓް ކުރަން ޖެހެ އެވެ.
ފޯމުލިއިރު 18 އަހަރު ނުފުރޭ ކުދިން ތިބި އަދަދުން ލިބޭ މާކްސް ވެސް ގިނަވެ އެވެ. އެކަމަކު ފޯމު ނެގި ފަހުން ތިން އަހަރު ވާއިރު، އޭރު 18 އަހަރު ނުފުރޭ ބައެއް ކުދިންނަށް 18 އަހަރު ފުރި، އެތައް ބަޔަކަށް ލިބެން އޮތް ޕޮއިންޓުގެ އަދަދު ވެސް މަދުވާނެ އެވެ. މި ފިޔަވަހީގެ ދަށުން ފްލެޓް ދިނުމުގެ ކުރިން، ދިރިއުޅުމުގެ ހާލަތު ވަޒަންކުރަން މި އަހަރު ކުރީކޮޅު ހައުސިން މިނިސްޓްރީގެ ޓީމުތައް ބައެއް ގޭގެ އަށް ޒިޔާރަތްކުރި އެވެ. އޭގެ ފަހުން ރޯދަ މަހަށް މެދުކަނޑާލުމަށް ފަހު މި މަހުގެ ތެރޭގައި އަލުން ފަށައި ބައެއް ގެތަކުގެ ހާލަތު ވަނީ ބަލައިފަ އެވެ.
ފްލެޓް ލިބޭ މީހުން އިއުލާން ކުރުން ލަސްވާ ސަބަބާ ދޭތެރޭގައި ހައުސިން މިނިސްޓްރީގެ ބަހެއް ނުލިބުނެވެ.
އެކަމަކު މިނިސްޓަރު ޑރ. މުހައްމަދ މުއިއްޒު ކުރިން ވިދާޅުވެފައިވާ ގޮތުގައި ފްލެޓަށް ކުރިމަތިލީ މީހުންގެ ތެރެއިން ފްލެޓް ލިބޭ މީހުން މި އަހަރުގެ ތެރޭ އިއުލާންކުރާނެ އެވެ. މިނިސްޓަރު މިހެން ވިދާޅުވިއަސް، ދިރިއުޅުމުގެ ހާލަތު ވަޒަންކޮށް، ޕޮއިންޓް ދޭން ޖެހޭ އުސޫލްތަކަށް ބަދަލު ގެންނަން ޖެހިފައިވާތީ، ފްލެޓް ލިބުނު މީހުން މި އަހަރު ތެރޭގައި އިއުލާން ކުރެވޭނެ ކަމާ މެދު ސުވާލު އުފެދެ އެވެ.
މިނިސްޓްރީން ކުރިން ބުނެފައި ވަނީ، ފްލެޓަށް ކުރިމަތިލީ 15،000 މީހުންގެ ތެރެއިން ޝަރުތު ހަމަވާ މީހުން އިއުލާންކުރުން ލަސްވަނީ ދިރިއުޅުމުގެ ހާލަތު ވަޒަންކޮށް ނުނިމޭތީ ކަމަށެވެ.
ފްލެޓް ދިނުމުގެ ކުރިން، ފްލެޓަށް އެދި ކުރިމަތިލީ ފަހުން މިހާތަނަށް އެ މީހެއްގެ ދިރިއުޅުމަށް އައިސްފައިވާ ހުރިހާ ބަދަލުތަކަކަށް ރިއާޔަތްކުރާނެ ކަމުގެ ޔަގީން ކަން ވެސް މިނިސްޓަރު ވަނީ ދެއްވައިފަ އެވެ. އަދި އެކަން ކުރިއަށް ގެންދާނީ އެންމެ އިންސާފުވެރި އުސޫލްގެ މަތިން ކަމަށް ވެސް އޭނާ ވިދާޅުވި އެެވެ. "އެ މީހަކު ދިރިއުޅޭ ހާލަތަށް ރިއާޔަތްކުރާނެ،" މުއިއްޒު ވިދާޅުވި އެވެ.
އާމްދަނީގެ ގޮތުގައި ލިބޭ ހުރިހާ ފައިސާއެއް ކުއްޔަށް ދީގެން ގިނަ ބަޔަކު ދިރިއުޅޭއިރު، ފޯމު ލާފައި ވެސް ހާސްކަމުގެ ތެރޭގައި އުޅެން ޖެހުމަކީ ހިތްދަތި ކަމެކެވެ. އެހެންކަމުން ފްލެޓް ލިބޭ މީހުންގެ ލިސްޓް ވީހާވެސް އަވަހަކަށް އިއުލާން ކުރުމަކީ ލިބޭނެ ހަމަޖެހުމެކެވެ.
މި ސަރުކާރުން ވައުދުވެފައިވާ ގޮތަށް، ފްލެޓް ލިބެނީ އެންމެ ނިކަމެތި މީހާ އަށްތޯ ކަށަވަރު ކުރުން ވެސް ވަރަށް މުހިންމެވެ.