ޑރ. ނީނާގެ އިންޓަވިއު: ޕީސީއޯއެސްގެ މުހިންމު ވާހަކަތަކެއް

އަންހެނުންނަށް ސިއްހީގޮތުން ދިމާވާ އާންމު މައްސަލައަކަށް ވިޔަސް މި ފަހަކާ ޖެހެންދެން ޕޮލިސިސްޓިކް އޯވަރީ ސިންޑްރޮމް (ޕީސީއޯއެސް) ގެ ވާހަކަ އާންމެއް ނޫނެވެ. އެހެންވެ، އެ ބައްޔާ ގުޅޭގޮތުން ކޮންމެހެން އެނގެން ޖެހޭ މުހިއްމު ގިނަ މައުލޫމާތު ވެސް ގިނަ ބަޔަކަށް ނޭނގެ އެވެ.

އެކަމަކު މި ފަހަކަށް އައިސް ސޯޝަލް މީޑިއާގައި ވެސް ޕީސީއޯއެސްއާ ބެހޭ ގޮތުން ހޭލުންތެރިކުރުމުގެ މަސައްކަތް ބައެއް މީހުން އެބަ ކުރެ އެވެ. އެ ބަލި ތަހައްމަލުކުރާ މީހުން، އެ މީހުންގެ ތަޖުރިބާތައް އަންނަނީ ކިޔައިދެމުންނެވެ.

ހޯމޯން އިންބެލެންސްގެ ސަބަބުން ދިމާވާ މި މައްސަލައިގެ ސަބަބުން އާންމުކޮށް ދިމާވާ މައްސަލަތަކެއް ހުރެ އެވެ. އެއީ؛

- ގަވައިދުން މައްސަރުކަންތައް ނުޖެހުން

- ދަރިމައިވުމުގައި މައްސަލަ ދިމާވުން

- މޫނުގައި އިސްތައްޓާއި ބިހި ގިނަވުން

- ބޮލުން އިސްތަށި ފޭބުން

ކޮންމެ އަންހެނަކަށް ވެސް ދިމާވެދާނެ މައްސަލައެއް

އަންހެނުންގެ ބަލިތަކަށް ހާއްސަ ޑޮކްޓަރު، ޑރ. ނީނާ ޝަރީފް ވިދާޅުވީ ޕީސީއޯއެސްގެ މައްސަލަ ކޮންމެ އަންހެނަކަށް ވެސް ދިމާވެދާނެ ކަމަށެވެ. މީހާގެ ހަށިގަނޑު ފަލަޔަސް ނުވަތަ ހިއްކަސް މި މައްސަލަ ދިމާވެދާނެ ކަމަށާއި އެކަމަކު ހުންނަން ޖެހޭ ވަރަށް ވުރެ ބަރުކޮށް ހުރުމަކީ ޕީސީއޯއެސްގެ ނުރައްކާ އިތުރަށް ގޯސްވާ ސަބަބެއް ކަމަށް އޭނާ ވިދާޅުވި އެވެ.

ބަރުކޮށް ނުވަތަ ފަލަކޮށް ހުންނަ މީހަކު ލުއިވުމުން ވެސް އެ އުނދަގޫތައް ލުއިވާނެ ކަމަށް ޑޮކްޓަރު ވިދާޅުވި އެވެ.

"ވަރަށް ބޮޑަށް، އެއްކޮށް ރަނގަޅުވެގެން ވެސް ދޭ އަލާމަތްތައް. ވަކި ފަލަ ކުދިންނެއް ނޫން، ހިކިކޮށް ތިބޭ ކުދިން ވެސް ޕީސީއޯއެސް ހުރޭ،" އައިޖީއެމްއެޗުގައި މަސައްކަތްކުރައްވާ ޑރ. ނީނާ ވިދާޅުވި އެވެ.

އޭނާ ވިދާޅުވި ގޮތުގައި ޕީސީއޯއެސްގެ ސަބަބުން ދިގު މުއްދަތަކަށް ސިއްހީ އެހެން މައްސަލަތައް ވެސް ދިމާވެ އެވެ. އޭގެ ތެރޭގައި؛

- ކޮލެސްޓްރޯލް މަތިކޮށް ހުރުން

- އިންސިއުލިން ރެސިސްޓެންސްގެ ސަބަބުން ޅަ އުމުރުގައި ހަކުރު ބަލި ޖެހުން

- ހިތުގެ މައްސަލަތައް ދިމާވުން

- ގިނަ ދުވަހު މައްސަރު ކަންތައް ނުޖެހި، ޑޮކްޓަރަށް ނުދައްކާ ގިނަ ދުވަސްވާ ނަމަ ރަހިމުގެ އެތެރެފަށަލަ މާ ބޯވެ، ކެންސަރަށް މަގުފަހިވުން

"ހަމައެކަނި ޕީރިއަޑް މައްސަލަ ނުވަތަ ދަރިމައިނުވުމުގެ މައްސަލަތަކެއް ނޫން ދިމާވަނީ. އޭގެ އިތުރުން ވެސް ނުރައްކާތެރި ވަރަށް ގިނަ ކަންތައްތަކެއް މަގުފަހިވޭ ފަރުވާ ނުހޯދާ އަޅާނުލެވި ހުރިއްޖެ ކަމުގައިވާ ނަމަ،" ޑރ. ނީނާ ވިދާޅުވި އެވެ.

ހާއްސަ ފަރުވާއެއް ނެތް، ސިއްހީ ރަނގަޅު އާދަތައް ގެންގުޅުން މުހިއްމު

ޕީސީއޯއެސްގައި ކިތަންމެ ބޮޑުވަރު ވިޔަސް އެކަމަށް ވަކި ހާއްސަ ފަރުވާއެއް މި ވަގުތު ނެތެވެ. އެއީ އެއްކޮށް ފަސޭހަކުރެވޭ ބައްޔެއް ވެސް ނޫނެވެ. އެކަމަކު، އެ މީހެއްގެ ކިބައިން ފެންނަ އަލާމާތްތަކަށް ލުޔެއް ހޯދައިދިނުމަށް ފަރުވާ ދެވެ އެވެ.

ޑރ. ނީނާ ވިދާޅުވި ގޮތުގައި ޕީސީއޯއެސްގެ އެންމެ ފުރަތަމަ ފަރުވާ އަކީ ދިރިއުޅުގެ އާދަ ބަދަލުކުރުމެވެ. އެ ބަދަލުތަކުގެ ތެރޭގައި ކެއުމަށް ގެންނަންޖެހޭ ބަދަލުތަކާއި ކަސްރަތުކުރުން ހިމެނެ އެވެ. ކެއުމަށް ބަދަލު ގެންނައިރު ޖަންކް ފުޑް ކެއުން ހުއްޓާލުމާއި ތެޔޮ އެއްޗިއްސާއި ހަކުރު ބޭނުންކުރާ ވަރު މަދުކުރުން ވަރަށް މުހިއްމެވެ.

"ގަވައިދުން ކަސްރަތުކުރުން މުހިއްމު. އެންމެ މަދުވެގެން 30 ވަރަކަށް މިނެޓަށް ކަސްރަތުކޮށްލަނިކޮށް ވެސް އޭގެ ތަފާތު ފެންނާނެ. ކަސްރަތުކުރުމަކީ ހަމައެކަނި ޕީސީއޯއެސް އަށް އެކަންޏެއް ނޫން އޭގެ ފައިދާ ވަނީ. ކަސްރަތުކުރުމުގެ ސަބަބުން މީހާގެ މޫޑު ރަނގަޅުވެ، ނަފްސާނީ ބަލިތައް ހުންނަ ކުދިންނަށް ވެސް އެހީވެދޭ މޫޑު ރަނގަޅުވުމަށް ނޫނީ ބަލިތަކުގެ އަލާމާތް ކުޑަކުރުމަށް،" ޑރ. ނީނާ ވިދާޅުވި އެވެ.

އޭނާ ވިދާޅުވީ ބަރުކޮށް ތިބޭ މީހުންގެ ހަށިގަނޑުން ފަސް ޕަސެންޓު ލުއިކޮށްލުމުން ވެސް މައްސަރުކަންތައް ރަނގަޅުވާ ކަމަށެވެ.

ރާއްޖޭގައި ޕީސީއޯއެސްގެ ހާލަތާ ގުޅޭގޮތުން ދިރާސާއެއް ހެދިފައި ނެތަސް އޯޕީޑީއަށް އަންނަ ބަލި މީހުންނާ އަޅާ ބަލާއިރު އެ މައްސަލަތައް ގިނަކަމަށް ޑރ. ނީނާ ވިދާޅުވި އެވެ. ދުނިޔޭގެ ނިސްބަތަށް ބަލާއިރު 10-11 ޕަސެންޓަކީ ޕީސީއޯއެސް ހުންނަ މީހުން ކަމަށާއި އެ އަދަދުތައް ދަނީ އިތުރުވަމުންކަމަށް ވެސް އޭނާ ވިދާޅުވި އެވެ.

އެހެންވެ، ޕީސީއޯއެސްގައި އާއްމުކޮށް ދިމާވާ މައްސަލަ ކަމުގައިވާ، މައްސަރުކަންތަކުގައި މައްސަލަ ދިމާވާ ނަމަ ވީހާ ވެސް އަވަހަކަށް ޑޮކްޓަރަށް ދެއްކުމަށް ޑރ. ނީނާ އެދިވަޑައިގަންނަވަ އެވެ.