އިންޑޯ ކުޅިވަރުގައި މަލްޓި ޕާޕަސް ކޮމްޕްލެކްސްއެއްގެ ގޮތުގައި މުޅި ރާއްޖޭގައި ވެސް ސޯޝަލް ސެންޓަރު އެކަނި ހުންނަތާ 30 އަހަރަށް ވުރެ ގިނަ ދުވަސްވެއްޖެ ކަމަށާއި އެ ތަކުލީފަށް ނިމުން ގެންނަން 27 މަޝްރޫއެއް ހިންގަން ހަމަޖެހިފައިވާ ކަމަށް ސްޕޯޓްސް މިނިސްޓަރު އަބްދުﷲ ރާފިއު ރޭ ވިދާޅުވެއްޖެ އެވެ.
ޕީއެސްއެމުން ބޭއްވި "އަހާ" ފޯރަމްގައި މިނިސްޓަރު ވިދާޅުވީ މަލްޓި ޕާޕަސް އިންޑޯ ކޮމްޕްލެކްސްއެއްގެ ގޮތުގައި މުޅި ރާއްޖޭގައި ވެސް ހުރީ މީގެ އަހަރުތަކެއް ކުރިން މާލޭގައި އިމާރާތްކުރި ސޯޝަލް ސެންޓަރުގެ އިންޑޯ ކޮމްޕްލެކްސް އެކަނި ކަމަށެވެ.
"މުޅި ރާއްޖޭގައި ވެސް މާލެ ސަރަހައްދުގައި ވެސް 33 އަހަރު ވެއްޖެ މަލްޓި ސްޕޯޓްސް އިންޑޯ ކޮމްޕލެކްސްއެއްގެ ގޮތުގައި މި އިންނަނީ އެންމެ ތަނެއް،" ސޯޝަލް ސެންޓަރުގެ އިންޑޯ އަށް އިޝާރާތް ކުރައްވަމުން މިނިސްޓަރު ވިދާޅުވި އެވެ.
އެ ތަނުގެ އިންޑޯ ހޯލް މިހާރު ވެސް އެކި ކުޅިވަރު އެސޯސިއޭޝަންތަކުން ބޭނުން ކުރަނީ އަހަރުގެ އެކި ދުވަސްތަކަށް ބަހާލައިގެންނެވެ. އެ ހޯލް ދާއިމީކޮށް ބޭނުންކުރާ ތިން ކުޅިވަރަކީ ވޯލީބޯޅަ އާއި ބާސްކެޓްބޯޅަ އަދި ނެޓްބޯޅަ އެވެ. ތިން ކުޅިވަރުގެ އިތުރުން އިންޓަނޭޝަނަލް މުބާރާތްތައް ބާއްވަން ޓީޓީ އާއި ބޮޑީބިލްޑިން އަދި ކެރަމް އިން ވެސް އެ ހޯލްގެ ބޭނުން ކުރެ އެވެ.
މިނިސްޓަރު ވިދާޅުވީ އެ ގޮންޖެހުމަށް ނިންމުން ގެންނަން މާލެ ސަރަހައްދު ހިމެނޭ ގޮތަށް މުޅި ރާއްޖޭގައި 27 އިންޑޯ ކޮމްޕްލެކްސް އަޅާނެ ކަމަށެވެ. ބައެއް ރަށްރަށުގައި މަސައްކަތް ފަށާފައިވާ ކަމަށް ވެސް ވިދާޅުވި އެވެ.
"މާލެ ސަރަހައްދު ވެސް ހިމެނޭ ގޮތަށް އިންޑޯ 27 ކޮމްޕްލެކްސްއެއްގެ މަސައްކަތް އަޅުގަނޑުމެން އެބަ ކުރިއަށް ގެންދަން. މީގެ ބޭނުމަކީ އިންޑޯގައި ކުޅޭ ކުޅިވަރުތައް ގަޑިތަކަށް ބަހާލައިގެން މުބާރާތްތައް ފަސޭހަކަމާ އެކު ކުރިއަށް ގެންދިއުން،" ރާފިއު ވިދާޅުވި އެވެ.
މާލެ ސަރަހައްދުން، ހުޅުމާލެ 1 އާއި 2 އަދި ވިލިމާލޭގައި ވެސް އިންޑޯ ކޮމްޕްލެކްސްއެއް އަޅާނެ ކަމަށް އޭނާ ވިދާޅުވި އެވެ.
"އިރާދަކުރެއްވިއްޔާ ދާދި އަވަހަށް އަޅުގަނޑުމެން ފޭސް 2 ގައި އިންޑޯ ކޮމްޕލެކްސްއެއްގެ މަސައްކަތް ފަށާނަން. އަދި ފޭސް އެކެއް އަދި ވިލިމާލޭގައި ވެސް އެ ކޮމްޕްލެކްސްއެއް އަޅާގޮތަށް ހަމަޖެހިފައި އޮތީ،" ރާފިއު ވިދާޅުވި އެވެ.
އޭނާ ވިދާޅުވީ ސްޕޯޓްސް ކޮމްޕްލެކްސްތައް ހަދާނީ ޖިމް ވެސް ހިމެނޭ ގޮތަށް ކަމަށެވެ.