ޑޯޓްމަންޑް ބަލިކޮށް، ބެޔާނުން އެއްވަނައިގައި ހަތަރު ޕޮއިންޓުގެ ލީޑެއް ނަގައިފި

ޑޯޓްމަންޑް (ޑިސެމްބަރު 5) - ޖަރުމަން ލީގުގައި އެއްވަނައިގައި އޮތް ބެޔާން މިއުނިކުން ބޮރޫޝިއާ ޑޯޓްމަންޑުގެ ދަނޑުގައި އެ ޓީމާ ވާދަކޮށް 3-2 އިން މެޗު ކާމިޔާބުކޮށް، ތާވަލުގެ އެއްވަނައިގައި ހަތަރު ޕޮއިންޓުގެ ލީޑެއް ނަގައިފި އެވެ.

މެޗުގައި ފުރަތަމަ ލަނޑު ޖަހައި ކުރި ހޯދީ ޑޯޓްމަންޑުންނެވެ. މި ލަނޑު ފަސްވަނަ މިނިޓުގައި ޖަހައިދިނީ ޖޫލިއަން ބްރެންޓް އެވެ. އޭގެ ހަތަރު މިނިޓު ފަހުން ބެޔާނަށް އެއްވަރުކޮށްދިނީ، އެންމެ ފަހުން ބަލޮންޑިއޯ ހަފްލާފައި އަހަރުގެ އެންމެ މޮޅު ސްޓްރައިކަރުގެ މަގާމް ހޯދި ޕޮލެންޑުގެ ތަރި ރޮބާޓް ލެވަންޑޯސްކީ އެވެ.

ފުރަތަމަ ހާފު ނިމުމުގެ ކުރިން ކިންގްސްލީ ކޯމަން ބެޔާނަށް ފުރަތަމަ ފަހަރަށް ލީޑު ނަގައިދީފައި ވަނިކޮށް، ދެވަނަ ހާފު ފެށިގެން ތިންވަނަ މިނިޓުގައި އާލިން ބްރައުޓް ހާލަންޑް ވަނީ ޑޯޓްމަންޑަށް އެއްވަރު ކޮށްދީފަ އެވެ. ޑޯޓްމަންޑުން ޖެހި ދެ ލަނޑު ވެސް އެސިސްޓް ކުރީ ޖޫޑް ބެލިންގްހަމް އެވެ.

ބެޔާން އަށް ރޭގެ މެޗުން ތިން ޕޮއިންޓް ކަށަވަރު ކޮށްދިން ލަނޑު 77 ވަނަ މިނިޓުގައި ޕެނަލްޓީއަކުން ޖަހައިދިނީ ލެވަންޑޯސްކީ އެވެ. މި ޕެނަލްޓީ ލިބުނީ އޭރިއާ ތެރެއިން ޑޯޓްމަންޑްގެ މެޓްސް ހަމެލްސް އަތުގައި ބޯޅަ ޖެހުމުން، ވީއޭއާރު ބެލުމަށް ފަހު އެވެ.

މި ޕެނަލްޓީއާ ގުޅިގެން ހިތްހަމަނުޖެހުން ފާޅުކުރި ޑޯޓްމަންޑުގެ ކޯޗު މާކޯ ރޯސް އަށް ވަނީ ދެވަނަ ރީނދޫ ކާޑަކާ އެކު ރަތް ކާޑެއް ދައްކައި، ބެންޗުން ފޮނުވާލައިފަ އެވެ. އޭގެ ކުރިން، ދެވަނަ ހާފުގައި ރޯސް އަށް ވަނީ އިތުރު ރީނދޫ ކާޑެއް ދައްކައިފަ އެވެ.

ލެވަންޑޯސްކީ ޕެނަލްޓީން ޖެހި ލަނޑަކީ 2021 ވަނަ އަހަރު ބެޔާނަށް ކުޅެދިން 55 ވަނަ މެޗުން ޖަހައިދިން 66 ވަނަ ލަނޑެވެ. އަދި ބުންޑެސްލިގާގައި ރަށުން ބޭރުގައި ކުޅެ އެންމެ ގިނަ ލަނޑު ވެސް ޖަހައިފައި ވަނީ ލެވަންޑޯސްކީ އެވެ. އޭނާ ވަނީ މިހާތަނަށް ލީގުގައި 118 އަވޭ ގޯލު ޖަހައިފަ އެވެ.

ޑޯޓްމަންޑުގެ ބްރެންޓްގެ ބޮލަށް އަނިޔާވެގެން އޭނާ ވަނީ މެޗުގެ 70 ވަނަ މިނިޓުގައި ސްޓްރެޗަރުގައި ދަނޑުން ބާލައިފަ އެވެ. ބްރެންޓަށް އަނިޔާވީ، ބެޔާންގެ ޑިފެންޑަރު ޑަޔޮޓް އުޕަމެކާނޯއާ ދެމީހުން ފުންމައިގެން ބޯޅައަށް އެރި ވަގުތު ދެ ކުޅުންތެރިންގެ ބޯ ޖެހިފަ އެވެ.

މި މެޗުން ބެޔާން ހޯދި ތިން ޕޮއިންޓާ އެކު އެޓީމު އެއްވަނައިގައި އޮތީ ކުޅުނު 14 މެޗުން 34 ޕޮއިންޓް ހޯދައިގެންނެވެ. ދެވަނައިގައި އޮތް ޑޯޓްމަންޑަށް ލިބިފައި ވަނީ 30 ޕޮއިންޓެވެ. ތިންވަނައިގައި އޮތް ބެޔާ ލެވަކޫސަން ވަނީ 7-1 ގެ ނަތީޖާއަކުން ރޭ އަމިއްލަ ދަނޑުގައި، ރެލިގޭޝަނުގައި އޮތް ގްރިއުޓާ ފިއުތު ބަލި ކޮށްފަ އެވެ. ލެވެކޫސަން އަށް 27 ޕޮއިންޓް ލިބިފައި ވާއިރު، ހަތަރު ވަނައިގައި އޮތް ހޮފެންހެއިމް ވަނީ ފްރެންކްފާޓާ ވާދަކޮށް 3-2 އިން މެޗު ކާމިޔާބު ކޮށްފަ އެވެ.