ލިވަޕޫލްގެ ޓްރޭނިން ސެންޓަރު ބަންދުކޮށް ސެމީ ފައިނަލް ފަސްކޮށްފި

ލިވަޕޫލް (ޖެނުއަރީ 5) - އިނގިރޭސި ކްލަބް ލިވަޕޫލްގެ ގިނަ އަދަދެއްގެ ކުޅުންތެރިންނަށް ކޮވިޑް-19 ޖެހި، ޓީމުގެ ޓްރޭނިން ސެންޓަރު ބަންދުކުރަން ޖެހުމުގެ ސަބަބުން، މާދަމާ ރޭ އެ ޓީމު ކުޅެން އޮތް ލީގު ކަޕުގެ ސެމީ ފައިނަލް މެޗު ފަސްކޮށްފި އެވެ.

މާދަމާ ރޭ ލިވަޕޫލުން އާސެނަލްއާ ދެކޮޅަށް އެމިރޭޓްސް ސްޓޭޑިއަމްގައި ކުޅެން އޮތް ސެމީ ފައިނަލްގެ ފުރަތަމަ ލެގު މެޗު ފަސްކުރަން ލިވަޕޫލުން ވަނީ އިއްޔެ އިންގްލިޝް ފުޓްބޯލް ލީގް (އީއެފްއެލް) އާ މަޝްވަރާ ކޮށްފަ އެވެ. އަދި އެޓީމުން ލީގުގައި ލެސްޓާއާ ދެކޮޅަށް ކުޅުނު މެޗަށް ފަހު ކޯޗު ޔާގަން ކްލޮޕް ވަނީ ލިވަޕޫލްގައި ކޮވިޑް ކޭސްތަކެއް އުޅޭ ކަން ހާމަކޮށްފަ އެވެ.

ލީގުގައި އެންމެ ފަހުން ޗެލްސީއާ ދެކޮޅަށް ކުޅުނު މެޗުގެ ކުރިން ކްލޮޕް ކޮވިޑް-19 އަށް ޕޮޒިޓިވްވެގެން، އެ މެޗުގައި ޓީމަށް އިރުޝާދު ދިނީ އެސިސްޓެންޓް ކޯޗު ޕެޕް ލިންޑާސް އެވެ. ރިޕޯޓްތައް ބުނާ ގޮތުން ލިންޑާސް ވެސް ވަނީ ކޮވިޑަށް ޕޮޒިޓިވްވެފަ އެވެ.

ލިވަޕޫލްގެ ޓްރޭނިންތައް 48 ގަޑިއިރަށް މެދުކަނޑާލައިފައިވާއިރު ލީގު ކަޕުގެ ސެމީ ފައިނަލުގެ ފުރަތަމަ ލެގު ދެން ކުޅެން ހަމަޖެހިފައި ވަނީ މިމަހު 13 ވަނަ ދުވަހުގެ ރޭ ލިޕވަޕޫލްގެ އެންފީލްޑް ސްޓޭޑިއަމްގަ އެވެ. އާސެނަލްގެ ދަނޑުގައި ދެވަނަ ލެގު ކުޅޭނީ ޖެނުއަރީ 21 ވަނަ ދުވަހުގެ ރެއެވެ.

ގޯލްކީޕަރު އެލިސަން ބެކާ އާއި ޑިފެންޑަރު ޖޮއެލް މަޓިޕް އަދި ފޯވާޑް ރޮބާޓޯ ފިރްމީނޯ ވެސް ވަނީ އައިސޮލޭޝަންގައި ތިބެން ޖެހިފަ އެވެ. ލިވަޕޫލަށް ވަނީ އަނިޔާގެ ގިނަ މައްސަލަތަކެއް ވެސް ކުރިމަތި ވެފަ އެވެ. އަނިޔާގައި ތިބި ކުޅުންތެރިންގެ ތެރޭގައި ތިއާގޯ އަލްކަންތާރާ އާއި ޓަކޫމީ މިނަމީނޯ އަދި އޮރީގީ އާއި ހާވީ އެލިއޮޓް ހިމެނެ އެވެ.

އަންނަ އާދިއްތަ ދުވަހު ކެމަރޫންގައި ފަށާ އެފްރިކަން ކަޕް އޮފް ނޭޝަންސްގައި ވާދަކުރަން، ލިވަޕޫލުގެ މިސްރުގެ ފޯވާޑް މުހައްމަދު ސަލާހާއި ސެނެގާލްގެ ފޯވާޑް ސަޑިއޯ މާނޭ އަދި ގިނީގެ މިޑްފީލްޑަރު ނަބީ ކެއިޓާ ވެސް ވަނީ ގައުމީ ޓީމުތަކާ ގުޅިފަ އެވެ.