އާ އަހަރުގެ ފުރަތަމަ މެޗުން ބެޔާން މިއުނިކް ބަލިވެއްޖެ

މިއުނިކް (ޖެނުއަރީ 8) - ޖަރުމަންގެ ބެޔާން މިއުނިކުން މި އަހަރު ކުޅުނު ފުރަތަމަ މެޗުގައި ބޮރޫޝިއާ މޮންޗެންގްލަޑްބަކާ ކުޅެ 2-1 އިން ބަލި ވެއްޖެ އެވެ.

މެޗުގައި ފުރަތަމަ ލަނޑު ޖަހައި ކުރި ހޯދީ ބެޔާން މިއުނިކުންނެވެ. ތޯމަސް މުލާ ދިން ބޯޅައެއް ކޮންޓްރޯލް ކޮށްލާފައި ކައިރީގައި ހުރި މޮންޗެންގްލަޑްބަކް ޑިފެންޑަރު ކައިރިން ނައްޓާލައިފައި މެޗުގެ 18 ވަނަ މިނިޓުގައި މި ލަނޑު ޖަހައިދިނީ ރޮބާޓް ލެވަންޑޯސްކީ އެވެ. އެހެން ނަމަވެސް ގާތް ގާތުގައި ދެ ލަނޑު ޖަހައި، ފުރަތަމަ ހާފު ނިމުމުގެ ކުރިން މޮންޗެންގްލަޑްބަކުން ވަނީ ނަތީޖާ އަނބުރާލައިފަ އެވެ.

ބެޔާންގެ ޑިފެންޑަތުންނަށް ހެދުނު ގޯހެއްގެ ފައިދާ ނަގައި މޮންޗެންގްލަޑްބަކަށް އެއްވަރު ކޮށްދިން ލަނޑު 27 ވަނަ މިނިޓުގައި ޖަހައިދިނީ މިޑްފީލްޑަރު ފްލޯރިއަން ނޮއިހައުސް އެވެ. އަދި 31 ވަނަ މިނިޓުގައި ލިބުނު ކޯނަރެއްގެ ބޭނުން ހިފައި އެ ޓީމަށް ލީޑު ނަގައިދިނީ ސްޓެފާން ލައިނާ އެވެ.

މި ނަތީޖާއާ އެކު ވެސް ބުންޑެސްލިގާ ތާވަލުގެ އެއްވަނައިގައި ބެޔާން އޮތީ ދެވަނައިގައި އޮތް ބޮރޫޝިއާ ޑޯޓްމަންޑަށް ވުރެ ނުވަ ޕޮއިންޓް އިތުރަށް ހޯދައިގެންނެވެ. ތާވަލުގެ 14 ވަނައިގައި އޮތް މޮންޗެންގްލަޑްބަކް ވަނީ ރޭގެ މޮޅާ އެކު 18 މެޗުން 22 ޕޮއިންޓް ހޯދައިގެން 11 ވަނައަށް ޖެހިލައިފަ އެވެ. އަދި ރޭގެ މޮޅަކީ އެ ޓީމު މި ސީޒަނުގައި ލީގުގައި މިހާތަނަށް މޮޅުވި ހަވަނަ މެޗެވެ.

އަމިއްލަ ދަނޑުގައި ރޭ ބެޔާނުން ކުޅުނު ލީގު މެޗުގައި މޮންޗެންގްލަޑްބަކް އަތުން ބަލިވި އިރު، މިއީ އެޓީމާ ދެކޮޅަށް ބެޔާނުން ލީގުގައި އެންމެ ފަހުން ކުޅުނު ހަ މެޗުން ބަލިވި ތިންވަނަ މެޗެވެ. މި ސީޒަނުގައި ބެޔާނުން މޮންޗެންގްލަޑްބަކާ ދެކޮޅަށް ތިން މެޗު ކުޅެފައިވާއިރު އެ ތިން މެޗުން ވެސް ބެޔާނަށް މޮޅެއް ހޯދިފައެއް ނުވެ އެވެ. ލީގު ފުރަތަމަ މެޗުގައި ރަށުން ބޭރުގައި ބެޔާން ކުޅުނު މެޗު އެއްވަރުވެގެން ނިމުނުއިރު، ޖަރުމަން ކަޕުގެ ދެވަނަ ބުރުގައި މޮންޗެންގްލަޑްބަކުން ވަނީ 5-0 އިން ބެޔާން ބަލިކޮށްފަ އެވެ.

މިއީ މިދިޔަ ޑިސެމްބަރު މަހު ވިންޓާ ބްރޭކަށް ލީގު މެދުކަނޑާލި ފަހުން އަލުން ލީގު ފަށައިގެން ކުޅުނު ފުރަތަމަ މެޗެވެ. ލީގުގައި ބެޔާންގެ ފަހަތުން ތާވަލުގެ ދެވަނައިގައި އޮތް ޑޯޓްމަންޑް މިރޭ ނުކުންނާނީ ރަށުން ބޭރުގައި، ހަ ވަނައިގައި އޮތް އެއިންޓްރަކް ފްރޭންކްފާޓާ ދެކޮޅަށެވެ.