އެފްއޭ ކަޕް ފައިނަލުގެ ކުރިން ލިވަޕޫލްގެ ފަބީނިއޯ އަށް އަނިޔާ ވެއްޖެ

ބާމިންހަމް (މެއި 11) - އަންނަ ހޮނިހިރު ދުވަހުގެ ރޭ ލިވަޕޫލުން އެފްއޭ ކަޕް ފައިނަލުގައި ޗެލްސީއާ ދެކޮޅަށް ނުކުތުމުގެ ކުރިން އެޓީމުގެ މިޑްފީލްޑަރު ފަބީނިއޯ އަށް އަނިޔާ ވެއްޖެ އެވެ.

އޭނާ އަށް އަނިޔާވީ އިނގިރޭސި ޕްރިމިއާ ލީގުގައި ލިވަޕޫލުން ރޭ އެސްޓަން ވިލާއާ ދެކޮޅަށް ކުޅުނު މެޗުގަ އެވެ. ފުރަތަމަ ހާފުގައި ފަލަމަސްގަނޑަށް އަނިޔާވެގެން ބަދަލުގައި އެރީ ކެޕްޓަން ހެންޑަސަން އެވެ. ހެންޑަސަން ވަނީ ރޭގެ މެޗުގައި މޮޅު ކުޅުމެއް ދައްކައިފަ އެވެ.

ރޭގެ މެޗު ލިވަޕޫލުން ވަނީ ފަހަތުން އަރައި 2-1 އިން ކާމިޔާބުކޮށް، އެއް މެޗު އިތުރަށް ކުޅެ އެއްވަނައިގައި އޮތް މެންޗެސްޓާ ސިޓީއާ ޕޮއިންޓުގެ ގޮތުން އެއްވަރު ކޮށްފަ އެވެ. ޑަގްލަސް ލުއިޒް ބޮލުން ޖެހި ގޯލަކުން މެޗުގެ ތިންވަނަ މިނިޓުގައި، ލިވަޕޫލްގެ ކުރީގެ ލެޖެންޑް ސްޓީވަން ޖެރާޑުގެ އެސްޓަން ވިލާއިން ލީޑު ނެގި އެވެ. ނަމަވެސް އޭގެ ތިން މިނިޓް ފަހުން ލިވަޕޫލަށް ނަތީޖާ އެއްވަރު ކޮށްދިނީ ޑިފެންޑަރު ޖޮއެލް މަޓިޕް އެވެ.

ލިވަޕޫލް މޮޅުވި ލަނޑު ޖެހީ މެޗުގެ 65 ވަނަ މިނިޓުގައި ލުއިސް ޑިއާޒްގެ ނަގައިދިން ހުރަހަކުން ސަޑިއޯ މާނޭ އެވެ. ކޯޗު ޔާގަން ކްލޮޕް ވަނީ އެޓީމުގެ އެންޑީ ރޮބާޓްސަން އަށް ފައިނަލް މެޗަށް ތައްޔާރުވާން ރޭގެ މެޗުގައި ރެސްޓް ދީފަ އެވެ. އެކަމަކު މުހައްމަދު ސަލާހު އާއި ތިއާގޯ އަލްކަންޓާރާ ވަނީ ބަދަލު ކުޅުންތެރިންގެ ގޮތުގައި ފަހު ވިއްސަކަށް މިނިޓު ކުޅެފަ އެވެ.

މެޗަށް ފަހު ކްލޮޕް ބުނީ، ފަބީނިއޯ އަށް ކުރިމަތިވި އަނިޔާގެ ސީރިއަސްކަން ބުނެދޭން އަދި ނޭނގޭ ކަމަށާއި، ނަމަވެސް ކުޅުންތެރިޔާ ޕޮޒިޓިވް ކޮށް ހުރުމުން އޭނާއަށް އެ ހިތްހަމަޖެހުން އެބަ އޮތް ކަމަށެވެ.

މި ނަތީޖާއާ އެކު ސިޓީއާ ޕޮއިންޓުގެ ގޮތުން އެއްވަރު ކުރެވުނަސް، ފައިދާ ގޯލުގެ ތަފާތުން ކުރި ލިބެނީ ސިޓީއަށެވެ. ސިޓީ އާއި ލިވަޕޫލް ވެސް މިހާތަނަށް ލީގުގައި 89 ގޯލު ޖަހާފައި ވީ ނަމަވެސް ބައިކޮޅަށް ވަން ގޯލް މަދުވުމުން ސިޓީ އުޅެނީ ލިވަޕޫލަށް ވުރެ ފައިދާ ތިން ގޯލު ކުރީގަ އެވެ. އެސްޓަން ވިލާ އޮތީ ލީގުގެ 11 ވަނައިގަ އެވެ.

ލިވަޕޫލަށް ލީގުގައި ބާކީ އޮންނާނީ ސައުތެމްޓަން އާއި ވުލްވްސްއާ ދެކޮޅަށް ކުޅޭ މެޗެވެ. ސިޓީއިން މިރޭ ވުލްވްސްއާ ދެކޮޅަށް ކުޅުމަށް ފަހު އެޓީމަށް ވެސް ލީގުގައި ބާކީ އޮންނާނީ ދެ މެޗެވެ. ނުކުންނާނީ ވެސްޓް ހޭމް ޔުނައިޓެޑާއި އެސްޓަން ވިލާއާ ދެކޮޅަށެވެ.

ލީގުގެ ފަހު ދެ މެޗަށް ފަހު ލިވަޕޫލުން ސީޒަން ނިންމާލާނީ ޔޫއެފާ ޗެމްޕިއަންސް ލީގުގެ ފައިނަލުގައި ރެއާލް މެޑްރިޑާ ދެކޮޅަށް ކުޅޭ މެޗުންނެވެ. އެ މެޗު އޮންނާނީ މިމަހު 29 ގައި ޕެރިހުގަ އެވެ.