އިއްޔެ ބޭއްވި ގައުމީ ޓައިމް ޓްރަޔަލްގައި ފަސޫހާ އަހުމަދު، 13 އަހަރުވީ އަންހެނުންގެ 800 މީޓަރު ދުވުމުން ގައުމީ ރެކޯޑް މުގުރާލައިފި އެވެ.
ޓައިމް ޓްރަޔަލްސްގައި ފަސޫހާ 800 މީޓަރު ދުވުމުން ގައުމީ ރެކޯޑް މުގުރާލީ 2 މިނިޓް 27.92 ސިކުންތުން ރޭސް ނިންމައިގެންނެވެ.
މީގެ ކުރިން މި ރެކޯޑް އޮތީ، 2009 ވަނަ އަހަރު ޖަރުމަންގެ ބާލިންގައި އޮތް ވޯލްޑް ޗެމްޕިއަންޝިޕްގައި ވާދަކުރި އައިޝަތު ރީޝާ އަތުގަ އެވެ. ރީޝާ ރޭސް ނިންމާފައި ވަނީ 2 މިނިޓް 28.00 ސިކުންތުންނެވެ.
މިދިޔަ އަހަރު އޮތް އިންޓަ ސްކޫލް އެތުލެޓިކްސް ޗެމްޕިއަންޝިޕްގައި 19 އަހަރުން ދަށުގެ އެއްވަނަ ހޯދި އަހުމަދިއްޔާ އިންޓަނޭޝަނަލް ސްކޫލް ޓީމުގައި ހިމެނުނު ފަސޫހާ ވަނީ އެ މުބާރާތުގައި، އެ އުމުރުފުރާގެ 800 މީޓަރު ދުވުމުން އެއްވަނަ ހޯދައިފަ އެވެ. އަދި 1500 މީޓަރާއި 5000 މީޓަރު ދުވުމުން ވެސް އެއްވަނަ ހޯދި އެވެ. އޭނާ 5000 މީޓަރު ދުވުމުން އެއްވަނަ ހޯދީ މީޓް ރެކޯޑަކާ ވެސް އެކު އެވެ.
ފަސޫހާ އަންނަނީ އެތުލެޓިކްސް އެސޯސިއޭޝަން ޗެމްޕިއަންޝިޕާއި ގައުމީ ގްރޯން ޕްރީ މުބާރާތުގައި ވެސް ވާދަކޮށް ކުރިއެރުން ހޯދަމުންނެވެ.