މަހެއްހާ ދުވަސްތެރޭ ދެވަނަ ފަހަރަށް ފަސޫހާ އަށް 800 މީޓަރުގެ ރެކޯޑް، ޖޫނިއާ ރެކޯޑެއް މުޒްނާ މުގުރާލައިފި

ފަސޫހާ އަހުމަދު، ފާއިތުވި މެއި މަހު މުގުރާލި އަންހެނުންގެ 800 މީޓަރުގެ ގައުމީ ރެކޯޑް އޭނާ އާ ކޮށްފި އެވެ.

އަދި 400 މީޓަރުގެ އަންހެން ޖޫނިއާ ރެކޯޑް ހައްވާ މުޒްނާ ފާއިޒް ވެސް އިއްޔެ ވަނީ މުގުރާލައިފަ އެވެ.

މެއި މަހު ފަސޫހާ ވަނީ ގައުމީ ޓައިމް ޓްރަޔަލްސްގައި 2 މިނިޓް 27.92 ސިކުންތުން ރޭސް ނިންމައިގެން 13 އަހަރުވީ 800 މީޓަރުގެ ރެކޯޑް މުގުރާލައިފަ އެވެ. އޭގެ ދޮޅު މަހެއްހާ ދުވަސް ފަހުން އޭނާ މިވަނީ ބޮޑު ކުރިއެރުމެއް ހޯދައިގެން އެ ރެކޯޑް އާކޮށްފަ އެވެ.

ފަސޫހާ ރެކޯޑް އާކުރީ އަންގާރަ ދުވަހު އޮތް ގައުމީ ޓްރަޔަލްސްގައި ދުވެ، 2 މިނިޓް 21.83 ސިކުންތުން ރޭސް ނިންމައިގެންނެވެ.

މުޒްނާ، 400 މީޓަރުގެ ގައުމީ ޖޫނިއާ ރެކޯޑް މުގުރާލީ އިއްޔެ އޮތް ގައުމީ ޓްރަޔަލްސްގައި 57.99 ސިކުންތުން ރޭސް ފުރިހަމަ ކޮށްގެންނެވެ.

މީގެ ކުރިން 400 މީޓަރުގެ ޖޫނިއާ ރެކޯޑް އޮތީ ޒިވާ މޫސާ ޝަފީއު އަތުގަ އެވެ. ޒިވާ ރެކޯޑް ހެދީ ޖޫން މަހުގެ 15 ވަނަ ދުވަހު އިންޑިއާގެ ބުބަނޭޝްވަރުގައި އޮތް އިންޑިއާގެ އިންޓަ ސްޓޭޓް ޗެމްޕިއަންޝިޕްސްގައި ދުވެ، 58.86 ސިކުންތުން ރޭސް ފުރިހަމަ ކޮށްގެންނެވެ.

މުޒްނާ ވަނީ ޖޫން މަހު ދެކުނު ކޮރެއާގެ ޔެޗިއޮންގައި އޮތް 20 އަހަރުން ދަށުގެ އޭޝިއަން ޖޫނިއާ އެތުލެޓިކްސް ޗެމްޕިއަންޝިޕްގައި ރާއްޖެ ތަމްސީލު ކޮށްފަ އެވެ.

ރާއްޖޭގެ ގައުމީ އެތުލެޓިކްސް ޓީމުގެ ގިނަ ދުވުންތެރިން މިވަގުތު ރާއްޖޭން ބޭރުގައި ތަމްރީނު ހަދަމުން ގެންދާއިރު، ގައުމީ ހުރިހާ އެތުލީޓުން ވެސް ތައްޔާރު ވަމުން އަންނަނީ، އަންނަ މަހު މަޑަގަސްކަރައިގައި ފަށާ އިންޑިއަން އޯޝަން އައިލެންޑް ގޭމްސް (އައިއޯއައިޖީ) އަށެވެ.

އައިއޯއައިޖީ އަށް ފަހު ސެޕްޓެމްބަރު މަހު ޗައިނާގެ ހަންގްޒޫގައި ފަށާ އޭޝިއަން ގޭމްސްގައި ވެސް ރާއްޖޭގެ އެތުލެޓިކްސް ޓީމުން ވާދަ ކުރާނެ އެވެ.