އާރުސީސީގެ ސީއެސްއާރުގެ ދަށުން މާލޭގައި ސްކޭޓް އެރީނާއެއް ހެދުމުގެ މަސައްކަތް ފަށައިފި

ރާއްޖޭގައި ކޮންސްޓްރަކްޝަން ދާއިރާގައި އެންމެ ކާމިޔާބު އެއް ކުންފުނި އާރުސީސީގެ އިޖުތިމާއީ ޒިންމާގެ ދަށުން ނުވަތަ ސީއެސްއާރު ޕްރޮޖެކްޓެއްގެ ދަށުން ހަދާ ސްޕޯޓްސް ސްކޭޓިން އެރީނާގެ ބިންގާ އިއްޔެ އަޅައިފި އެވެ.

ސްޕޯޓްސް މިނިސްޓްރީން ބުނި ގޮތުގައި މާލޭގެ އުސްފަސްގަނޑު ސަރަހައްދުގައި މި އެރީނާ ހަދަނީ ސްޕީޑު ސްކޭޓް ޓްރެކްގެ އިތުން ސްކޭޓް ބޯޑިން ވެސް ޕާކެއް ހިމެނޭ ގޮތަށެވެ.

ސްޕީޑު ސްކޭޓް ޓްރެކަކީ ފުރޮޅުލީ ބޫޓުގައި ސްކޭޓް ކުރުމަށް ހާއްސަ ޓެރެކެވެ. ސެކޭޓްބޯޑު ޓްރެކަކީ ސްކޭޓް ބޯޑުގައި ސްކޭޓަށް ހާއްސަކޮށް ހަދާ ޕްލެޓްފޯމެކެވެ.

އިއްޔެ ހަވީރު އުސްފަސްގަނޑުގައި ބޭއްވި ސްކޭޓް އެރީނާގެ ބިންގާ އެޅުމުގެ ރަސްމިއްޔާތުގައި ރައީސް ޑރ. މުހައްމަދު މުއިއްޒު ވެސް ބައިވެރިވެވަޑައިގަތެވެ.

އެރީނާގެ މަސައްކަތް ފަށައި، ބިންގާ އަޅުއްވައި ދެއްވީ ސްޕޯޓްސް މިނިސްޓަރު އަބްދުﷲ ރާފިއު އާއި އާރުސީސީގެ ޑެޕިއުޓީ މެނޭޖިން ޑިރެކްޓަރު އާދަމް ރަހީމެވެ.

ކުޅިވަރެއްގެ ގޮތުގައި ސްކޭޓް ކުރިއަރުވަން ހާއްސަ އެސޯސިއޭޝަނެއް ވެސް މިހާރު ހަރަކާތްތެރިވެ އެވެ. އެ އެސޯސިއޭޝަނުގެ ރައީސަކީ ފިޓްނަސް އާއި ފިޒިކަލް އެޑިއުކޭޝަން ދާއިރާގެ ތަޖުރިބާކާރު އަދި ކުރީގެ ދުވުންތެރިޔާ މުހައްމަދު ހާނިމެވެ.

ސްކޭޓިން އެރީނާގެ ބިންގާ އެޅުމުގެ ރަސްމިއްޔާތުގައި އޭނާ ވެސް ބައިވެރިވެވަޑައިގަތެވެ. އަދި އެ އެސޯސިއޭޝަންގެ އެކި ޕްރޮގްރާމްތަކުގައި ތަމްރީނު ހަދާ ކުދިން ވަނީ ސްކޭޓް ކުރުމުގެ ހުނަރު އިއްޔެގެ ރަސްމިއްޔާތުގައި ދައްކާލައިފަ އެވެ.