ސާފް ފުޓްސަލް ޗެމްޕިއަންޝިޕްގައި ގައުމީ ފުޓްސަލް ޓީމުން ހޯދި ކާމިޔާބު ފާހަގަކުރަން އާޓިފިޝަލް ބީޗްގައި މާދަމާ ރޭ ބާއްވާ ހަރަކާތުގައި ރައީސް ޑރ. މުހައްމަދު މުއިއްޒު ބައިވެރިވެ ވަޑައިގެން، ރަސްމީކޮށް މަރުހަބާ ދަންނަވާނެ ކަމަށް ސްޕޯޓްސް މިނިސްޓްރީން ބުނެފި އެވެ.
ދެކުނު އޭޝިއާ ސަރަހައްދުގެ އެންމެ ފުރަތަމަ ފުޓްސަލް މުބާރާތިުގެ ޗެމްޕިއަންކަން ރާއްޖެއިން ހޯދީ ދިވެހި ޓީމުން ކުޅުނު ހުރިހާ މެޗަކުން މޮޅުވެ ސައްތައިންސައްތަ ރެކޯޑަކާ އެކު އެވެ.
ފުޓްސަލް ޓީމުން ހޯދި ކާމިޔާބު ފާހަގަކުރަން ސްޕޯޓްސް މިނިސްޓްރީން މާދަމާ ރޭ ބާއްވާ ހަރަކާތުގައި ރައީސް މުއިއްޒު އެ ޓީމާ މުހާތަބުކޮށް ވާހަކަފުޅު ދައްކަވާނެ ކަމަށް އެ މިނިސްޓްރީން ބުންޏެވެ.
މިނިސްޓްރީން ބުނީ ކާމިޔާބު ފާހަގަކުރަން ބާއްވާ އެ ހަރަކާތުގައި ހަވާ އަރުވާނެ ކަމަށެވެ.
ފުޓްސަލް ޓީމު ރާއްޖެ އަންނަ ފްލައިޓް ވެލާނާ އިންޓަނޭޝަނަލް އެއާޕޯޓްގައި ޖައްސާނީ މާދަމާ ރޭ 7:45 ގަ އެވެ. އާ ޓާމިނަލުގެ ވީއައިޕީން ޓީމަށް މަރްހަބާ ކިޔަން ސްޕޯޓްސް މިނިސްޓްރީގެ އިސްވެރިންނާއި އެފްއޭއެމްގެ އިސްވެރިން ބައިވެރިވެ ވަޑައިގަންނަވާނެ ކަމަށް މިނިސްޓްރީން ބުންޏެވެ.
ޓީމު އެކުގައި އާޓިފިޝަލް ބީޗަށް ދާނީ ލޮރީއެއްގައި ކަމަށް މިނިސްޓްރީން އާންމުކުރި ޝެޑިއުލްގައި ވެއެވެ. އާޓިފިޝަލް ބީޗުގައި ގައުމީ ޓީމާ ރައީސް ބައްދަލު ކުރައްވާނީ މާދަމާ ރޭ 10 ޖަހާއިރު އެވެ.
ރައީސަށް ތަށި ހަވާލުކޮށްދިނުމާ އެކު ކުޅުންތެރިންނާއި އޮފިޝަލުން ހިމެނޭ ގޮތަށް ގުރޫޕް ފޮޓޯއެއް ނެގުމަށް ވަނީ ހަމަޖެހިފަ އެވެ. އަދި އެއަށް ފަހު ޓީމާ މުހާތަބުކޮށް ރައީސް ވާހަކަފުޅުދެއްކެވުމަށް ފަހު ރަސްމިއްޔާތު ނިންމާލާނީ ގައުމީ ސަލާމުންނެވެ.
ގައުމީ ފުޓްސަލް ޓީމުން ހޯދި ކާމިޔާބާއި މިދިޔަ އަހަރު ސެޕްޓެމްބަރު މަހު ލަންކާގައި ބޭއްވި ސައުތު އޭޝިއަން ސުޕަކަޕް ކާމިޔާބުކުރި ގައުމީ ފުޓްބޯޅަ ޓީމުގެ ކާމިޔާބު އަގުވަޒަން ކުރުމުގެ ގޮތުން ދެ ޓީމުގެ ކުޅުންތެރިންނާއި އޮފިޝަލުންނަށް އިނާމު ފައިސާގެ ގޮތުގައި އެއް މިލިއަން ރުފިޔާގެ ދިނުމަށް ރައީސް ވަނީ ނިންމަވައިފަ އެވެ.