އިނާމު ފައިސާގެ ގޮތުގައި ގައުމީ ފުޓްބޯޅަ ޓީމާއި ފުޓްސަލް ޓީމަށް އެއް މިލިއަން ރުފިޔާ ދޭން ރައީސް ޑރ. މުހައްމަދު މުއިއްޒު ނިންމަވައިފި އެވެ.
ސްޕޯޓްސް މިނިސްޓަރު އަބްދުﷲ ރާފިއު ވިދާޅުވީ މިދިޔަ ސެޕްޓެމްބަރު ލަންކާގައި ބޭއްވި ދެކުނު އޭޝިއާގެ ސުޕަ ކަޕްގެ ޗެމްޕިއަންކަން ހޯދި ފުޓްބޯޅަ ޓީމާއި ސާފް ފުޓްސަލް ޗެމްޕިއަންޝިޕްގެ ފިރިހެން ޑިވިޝަނުގެ ޗެމްޕިއަންކަން ހޯދި ދިވެހި ޓީމުގެ ކުޅުންތެރިންނާއި އޮފިޝަލުންނަށް ވެސް ފައިސާގެ އިނާމު ދެއްވަން ރައީސް ނިންމވާފައިވާ ކަމަށެވެ.
"ރައީސުލްޖުމްހޫރިއްޔާ ޑރ. މުޙައްމަދު މުޢިއްޒު ނިންމަވާފައިވަނީ ހުރިހާ ކުޅުންތެރިންނާއި އޮފިޝަލުން ހިމެނޭ ގޮތަށް މުޅި ޓީމަށް މި ބޯނަސް ދިނުމަށް،" މިނިސްޓަރު ރާފިއުއާ ހަވާލާދީ، ދައުލަތުގެ މީޑިއާ ޕީއެސްއެމުން ބުންޏެވެ.
ފުޓްބޯޅަ ޓީމުގެ ކާމިޔާބީއަށް ފަހު ރައީސް ވަނީ މިދިޔަ އަހަރު ސެޕްޓެމްބަރު ޓީމުގެ ކުޅުންތެރިންނާއި އޮފިޝަލުންނާ ބައްދަލުކުރެއްވި އިރު ވެސް އިނާމު ފައިސާ ދެއްވަން ރައީސް ނިންމަވާފައިވާ ކަމަށް މިނިސްޓަރު ވިދާޅުވި އެވެ.
ސާފް ފުޓްސަލް ޗެމްޕިއަންޝިޕް މިއަދު ނިމޭނެ އެވެ. ރާއްޖޭގެ ފަހު މެޗުގައި މިއަދު ނުކުންނާނީ ލަންކާއާ ދެކޮޅަށެވެ. މެޗު ފަށާނީ ރާއްޖޭގެ ގަޑިން މެންދުރު 12:00 ގަ އެވެ.