ޔޫއެފާ ޗެމްޕިއަންސް ލީގުގެ ލީގު ބުރުގައި 9 އާއި 24 ވަނައާ ދެމެދުގެ ޓީމުތައް ކުޅޭ ނޮކައުޓް ބުރުގެ ޕްލޭއޮފްގައި ރެއާލް މެޑްރިޑާއި ބެންފީކާ ވާދަކުރަން ޖެހިއްޖެ އެވެ.
ރެއާލާއި ބެންފީކާ އަށް ހާއްސަ ސަމާލުކަމެއް ލިބިފައި ވަނީ ލީގު ބުރުގެ ފަހު މެޗުގައި ބެންފީކާ އިން ފަހު ވަގުތު ގޯލްކީޕަރުގެ ގޯލަކާ އެކު 3-2 އިން ރެއާލް ބަލި ކޮށްފައި ވުމުންނެވެ.
މި ނަތީޖާއާ އެކު ރެއާލް ލީގު ބުރު ނިންމާލީ 9 ވަނައިގަ އެވެ. އަދި ބެންފީކާ ވަނީ 24 ވަނަ ހޯދައިފަ އެވެ.
ޗެމްޕިއަންސް ލީގުގެ ގަދަ 16 އިން ފުރުސަތު ހޯދުމަށް ކުޅޭ ޕްލޭއޮފްގައި އެންމެ ފަހުގެ ޗެމްޕިއަން ޕީއެސްޖީ ނުކުންނާނީ މޮނާކޯއާ ދެކޮޅަށެވެ. އަދި ރަނަރަޕް އިންޓަ މިލާން ނުކުންނާނީ ނޯވޭގެ ބޯޑޯ/ގްލިމްޓްއާ ދެކޮޅަށެވެ.
މީގެ އިތުރުން ޔުވެންޓަސް އާއި ގަލަތަސަރާއި ބައްދަލު ކުރާއިރު، ބޮރޫޝީއާ ޑޯޓްމަންޑް ނުކުންނާނީ އެޓަލާންޓާއާ ދެކޮޅަށެވެ. އަދި ބެޔާ ލެވަކޫސަން ނުކުންނާނީ ގްރީސްގެ އޮލިމްޕިއާކޯސްއާ ދެކޮޅަށެވެ.
ރެއާލްގެ ވާދަވެރި އެތުލެޓިކޯ މެޑްރިޑް ޕްލޭއޮފްގައި ބެލްޖިއަމްގެ ކްލަބް ބުރޫޖާ ދެކޮޅަށް ނުކުންނައިރު، އިންގްލެންޑްގެ ނިއުކާސަލް ޔުނައިޓެޑް ނުކުންނާނީ އަޒަރުބައިޖާންގެ ޤަރަބާގާ ދެކޮޅަށެވެ.
ލީގު ބުރުގެ ގަދަ 8 ޓީމު ވަނީ ގަދަ 16 އިން ސީދާ ޖާގައެއް ހޯދައިފަ އެވެ. އެއީ އާސެނަލް، ބެޔާން މިއުނިކް، ލިވަޕޫލް، ޓޮޓްނަމް ހޮޓްސްޕާ، ބާސެލޯނާ، ޗެލްސީ، ސްޕޯޓިން އަދި މެންޗެސްޓާ ސިޓީ އެވެ. އާސެނަލް ވަނީ ލީގު ބުރުގައި ކުޅުނު އަށް މެޗު ވެސް ކާމިޔާބު ކޮށްފަ އެވެ.
ގަދަ 16 އާއި ފައިނަލްތަކުގެ ގުރު ނެގުން އޮންނާނީ ޕްލޭއޮފްގެ ދެ ލެގަށް ފަހު، ފެބްރުއަރީ 27ގަ އެވެ.