ރެކްސްހެމް (މާޗު 8) - އިތުރު ވަގުތުގައި 4-2 ގެ ނަތީޖާއަކުން އިނގިރޭސި އެފްއޭ ކަޕްގައި ވޭލްސްގެ ރެކްސްހެމް ބަލި ކޮށް ޗެލްސީ މުބާރާތުގެ ކުއާޓާ ފައިނަލަށް ދަތުރު ކޮށްފި އެވެ.
ހޮލީވުޑްގެ ތަރިން ކަމަށްވާ ރޮބް މެކްއެލްހެނީ އާއި ރަޔަން ރެނަލްޑްސްގެ ހިއްސާ އޮންނަ ރެކްސްހެމްގެ ދަނޑުގައި ޗެލްސީގެ ބިލިއަން ޑޮލަރުގެ ޓީމު ކުޅުނު މެޗުގެ ފުރިހަމަ ވަގުތު 2-2 އިން އެއްވަރު ވި އިރު، ދެ ފަހަރު ވެސް ޗެލްސީ އަށް ޖެހުނީ ފަހަތުން އަރައި އެއްވަރު ކުރާށެވެ.
ސޭމް ސްމިތު މެޗުގެ 18 ވަނަ މިނެޓުގައި ރެކްސްހެމް އަށް އަމިއްލަ ސަޕޯޓަރުންގެ ކުރިމަތީގައި ލީޑު ނަގައިދިނެވެ. މެޗުގެ 40 ވަނަ މިނެޓުގައި ޗެލްސީ އެއްވަރު ކުރީ، އަލެހަންދްރޯ ގާނާޗޯ ފޮނުވާލި ބޯޅައެއް ރެކްސްހެމްގެ ޑިފެންޑަރު ދިފާއުކުރަން ޖައްސާލި ބޯޅަ ޓީމުގެ ކީޕަރު އާތޫރު އޮކޮންކްވޯ ބޮލުގައި ޖެހިފައި ބައިކޮޅަށް ވަން ގޯލަކުންނެވެ.
ރެކްސްހެމް ދެވަނަ ފަހަރަށް ލީޑު ނެގީ 78 ވަނަ މިނެޓުގައި ކެލަމް ޑޮއިލް ކާމިޔާބު ކުރި ގޯލުންނެވެ. ނަމަވެސް މާ ގިނައިރެއް ނުވެ ހަތަރު މިނިޓު ތެރޭ ޗެލްސީއަށް އެއްވަރު ކޮށްދިނީ ޖޯޝް އަޗެމްޕޮންގް އެވެ.
ނުވަދިހަ މިނެޓު ހަމަވެގެން ދެއްކި އިތުރު ވަގުތުގެ 10 ވަނަ މިނެޓުގައި ރެކްސްހެމްގެ ޖޯޖް ޑޮބްސަން އަށް ވަނީ ރަތް ކާޑެއް ދައްކައިފަ އެވެ. މިއާ ގުޅިގެން އިތުރު ވަގުތުގެ ދެ ހާފު އެ ޓީމު ކުޅެން ޖެހުނީ އެއް ކުޅުންތެރިއަކު މަދުކޮށެވެ.
އިތުރު ވަގުތުގެ ފުރަތަމަ ހާފުގައި ޗެލްސީ ވަނީ ގާނާޗޯގެ ގޯލަކުން މެޗުގައި ފުރަތަމަ ފަހަރަށް ލީޑު ނަގައިފަ އެވެ. އިތުރު ވަގުތުގެ ދެވަނަ ހާފު ނިމެން ފަސް ވަރަކަށް މިނިޓަށް ވެފައި ވަނިކޮށް ރެކްސްހެމް ނަތީޖާ އެއްވަރު ކުރަން ގޯލެއް ޖެހި ނަމަވެސް އޮފްސައިޑް ކަމަށް ބަލައި ރެފްރީ ވަނީ އެ ގޯލު ކެންސަލް ކޮށްލައިފަ އެވެ.
އިތުރު ވަގުތުގެ ދެވަނަ ހާފުގެ ވެސް ކުޅުން ހަމަވެގެން، ދެއްކި އިތުރު ވަގުތުގެ ފަސްވަނަ މިނިޓުގައި ޗެލްސީގެ ފަހު ގޯލު ޖެހީ ޖާއޯ ޕެޑްރޯ އެވެ.
ރެކްސްހެމް އަންނަނީ، 2021 ގައި ރޮބް މެކްއެލްހެނީ އާއި ރަޔަން ރެނަލްޑްސް ޓީމާ ހަވާލުވި ފަހުން، ފާއިތުވި ތިން ސީޒަންގައި ވެސް ޕްރޮމޯޝަން ހޯދައި މި ސީޒަންގައި އިނގިރޭސި ދެވަނަ ޑިވިޝަން (ޗެމްޕިއަންޝިޕް) ކުޅެމުންނެވެ. ޗެމްޕިއަންޝިޕްގައި ބާކީ 11 މެޗު އެ ޓީމަށް އޮތް އިރު، މި ވަގުތު އޮތީ ޕްލޭއޮފް ޖާގައެއްގައި، ތާޥަލްގެ ހަވަނައިގަ އެވެ. އެފްއޭ ކަޕުން ޗެލްސީ އަތުން ބަލިވެ ކުއާޓާގެ ޖާގައެއް ގެއްލުނު އިރު، ލީގް ކަޕުން ކުއާޓާއަށް ނުގޮސް ކެޓީ ކާޑިފް އަތުން ބަލިވެގެންނެވެ.
އެފްއޭ ކަޕްގެ ފަސްވަނަ ބުރުގައި ރޭ މެންޗެސްޓާ ސިޓީ ވަނީ ފަހަތުން އަރައި 3-1 އިން ނިއުކާސަލް ޔުނައިޓެޑް ބަލި ކޮށްފަ އެވެ. ހާވީ ބާންސް ފުރަތަމަ ހާފުގައި ނިއުކާސަލް އަށް ލީޑު ނަގައިދިން އިރު ސިޓީ ވަނީ ހާފު ނިމުމުގެ ކުރިން ސަވީނިއޯގެ ގޯލަކުން އެއްވަރު ކޮށްފަ އެވެ. ދެވަނަ ހާފުގައި ސިޓީ މޮޅު ކޮށްދޭން ދެ ގޯލު ވެސް ޖަހައިދިނީ އޮމަރު މަރުމޫޝް އެވެ.
އާސެނަލް ވަނީ ރޭ ތިންވަނަ ޑިވިޝަންގެ މެންސްފީލްޑް ޓައުންއާ ވާދަކޮށް 2-1 އިން މޮޅު ވެފަ އެވެ. ނޮނީ މަޑުއެކޭ ފުރަތަމަ ހާފުގައި ލީޑޫ ނަގައިދިން އިރު މެންސްފީލްޑުން ވަނީ ދެވަނަ ހާފުގައި ނަތީޖާ އެއްވަރު ކޮށްފަ އެވެ. އޭގެފަހުން އާސެނަލް މޮޅުވި ލަނޑު ޖަހައިދިނީ އެބެރޭޗީ އެޒީ އެވެ.
ލިވަޕޫލް ވަނީ ހޮނިހިރު ދުވަހުގެ ރޭ ވުލްވްސްއާ ވާދަކޮށް 3-1 އިން މޮޅުވެފަ އެވެ. ދެވަނަ ހާފުގައި އެންޑީ ރޮބާޓްސަން އާއި މުހައްމަދު ސަލާހު އަދި ކާޓިސް ޖޯންސް ލިވަޕޫލްގެ ގޯލލުތައް ޖަހައިދިނެވެ. މެޗުގެ އިތުރު ވަގުތުގައި ވުލްވްސްގެ ހަމައެކަނި ގޯލު ޖަހައިދިނީ ހްވަންގް ހީ ޗާން އެވެ.