މެދުކެނޑުމަކަށް ފަހު އެފްއޭ ކަޕް މި އަހަރު ބާއްވަނީ

އެއް އަހަރުގެ މެދުކެނޑުމަކަށް ފަހު އެފްއޭ ކަޕް ފުޓްބޯޅަ މުބާރާތް މި އަހަރު ބާއްވަން ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) އިން ނިންމައިފި އެވެ.


މުބާރާތް ފެށުމަށް ހަމަޖެހިފައިވަނީ އޮގަސްޓް މަހުގެ 2 ވަނަ ދުވަހު އެވެ. މުބާރާތުގައި ބައިވެރިވާން ބޭނުންވާ ޓީމުތަކުން މި މަހު 14 ވަނަ ދުވަހުގެ 15:00 ކުރިން މުބާރާތުގައި ބައިވެރިވާން އެދޭ ފޯމް ހުށަހެޅުމަށް އެފްއޭއެމުން ވަނީ އެދިފަ އެވެ.

އެފްއޭ ކަޕް މިދިޔަ އަހަރު ނުބޭއްވީ މިނިވަން 50 ހަރަކާތްތައް ކުރިއަށް ގެންދަނިކޮށް ރަސްމީ ފުޓްބޯޅަ ދަނޑުގެ ވިނަގަނޑު ހަލާކުވުމުން ފުޓްބޯޅަ ކަލަންޑަރަށް ބަދަލު ގެނައުމުގެ ގޮތުންނެވެ.

އެފްއޭ ކަޕް ފުޓްބޯޅަ މުބާރާތުގެ އެންމެ ފަހުގެ ޗެމްޕިއަނަކީ މާޒިޔާ ސްޕޯޓްސް އެންޑް ރެކްރިއޭޝަނެވެ. އެ ޓީމުން 2014 ވަނަ އަހަރުގެ މުބާރާތް ކާމިޔާބުކުރީ ފައިނަލުގައި، މުބާރާތުގެ އެންމެ ކާމިޔާބު ޓީމު ނިއު ރޭޑިއަންޓް ބަލިކުރުމަށް ފަހު އެވެ. ނިއު އިން ވަނީ 1988 ވަނަ އަހަރު ތައާރަފް ކުރި މި މުބާރާތް 11 ފަހަރު ހޯދައިފަ އެވެ.