ހަމްޕުގެ ބައިސްކަލް ކިކް ގޯލް، އާދަޔާހިލާފް މޮޅު ލަނޑެއް

ސާފް ޗެމްޕިއަންޝިޕްގައި ރޭ ބަންގްލަދޭޝް ކޮޅަށް ރާއްޖޭގެ ހަމްޒާ މުހައްމަދު ބައިސްކަލް ކިކަކުން ޖެހީ ތާފަތު މޮޅު ގޯލެކެވެ. އެ ލަނޑަކީ ސާފް ޗެމްޕިއަންޝިޕްގައި ޖެހި އެންމެ ރީތި ލަނޑެވެ. އަދި ގައުމީ ޓީމަށް ޖަހައިދިން އެންމެ ރީތި ލަނޑުތަކުގެ ތެރޭގައި މި ލަނޑު ހިމެނޭނެ އެވެ.

މި ލަނޑަށް އޮތް ތައުރީފާއި އެ ލަނޑުގެ ވީޑިއޯތައް ސޯޝަލް މީޑިއާގައި ވަނީ ވައިގައި ހިފައިފަ އެވެ. ރާއްޖެއިން ނެގި ހިލޭ ޖެހުމެއް ބަންގްލަދޭޝްގެ ކުޅުންތެރިން ދިފާއު ކުރުމުން އޭރިއާގެ ބޭރުގައި ހުރި ހުސައިން ނިހާން (ނިހާޓް) ބޯޅަ ބޮލުން ދިނުމުން ހަޕްމު ވަނީ ވެއްޓިގެންފައި ބައިސްކަލް ކިކަކުން އެ ބޯޅަ ގޯލްގެ ތެރެއަށް ވައްދާލައިފަ އެވެ.

ގައުމީ ކޯޗު އަލީ ސުޒޭނަށް ވެސް އެ ލަނޑު ސިފަކޮށްދޭނެ ގޮތެއް ނޭނގެ އެވެ. ބެންޗުގައި އޭނާ ހުރި އޭންގަލްގެ ސަބަބުން ކަމަށް ވެސް ވެދާނެ އެވެ. ރޭ މެޗަށް ފަހު އޮތް ބްރީފިންގައި ނޫސްވެރިޔަކު އެ ސުވާލު ކުރުމުން ސުޒޭން ބުނީ ޕްރެސްގައި ކޮމަންޓޭޓަރެއް ހުރި ނަމަ އެ ލަނޑު ޖެހިގޮތް ސިފަކޮށްދޭން އެދޭނެ ކަމަށެވެ.

"ވަރަށް ރަނގަޅު މިތަނުން ކުއްޖަކު (ނޫސްވެރިޔަކު) އެ ގޯލް ޖެހިގޮތް ކިޔައި ދީފިއްޔާ. ހަމްޕު ކައިރީގައި އެހީމަ ބުނި ހަމްޕްއޭ ޖެހީ،" ޕްރެސްގައި ސުޒޭން ބުންޏެވެ.

"އޭގެ އަސްލަށް ބަލާއިރު އޯވާ ހެޑްއެއްކަން ޔަގީން. ދިވެހި ކުޅުންތެރިޔެއްކަން ޔަގީން. ދެން މިތާންގައި ކޮމަންޓޭޓަރެއް އިނިއްޔާ (އެ ލަނޑު ސިފަކޮށްދޭން) އަޅުގަނޑަށް ހެލްޕެއް ވެދިނިއްޔާ ރަނގަޅު."

އެ ލަނޑު ޖެހުމުގައި ނިހާޓް ދިން ޕާސް ވެސް ފުރިހަމަ އެވެ. ރަނގަޅު ޕޮޒިޝަންގައި އޭނާ ހުރީ ބޯޅަ ރީބައުންސްވާނެކަން އެނގިގެން ހުރި ކަހަލަގޮތަކަށެވެ. ބަންގްލަދޭޝް ކުޅުންތެރިން ދިފާއު ކުރި ބޯޅަ ރީބައުންސްވުމުން އޭނާ ބޮލުން ކުރިއަށް ކޮށްޕާލީ އެވެ.

ދިވެހިރާއްޖޭގެ އަޑުން ގެނެސްދިން ކޮމެންޓްރީގެ އެނަލިސްޓެއްގެ ގޮތުގައި ހުރި، ޓީސީ ސްޕޯޓްސް ކްލަބުގެ ކޯޗު މުހައްމަދު ނިޒާމް ބުނީ ނިޙާޓް އެ ޕޮޒިޝަންގައި ބަހައްޓާފައި ހުރީ ބަންގްލަދޭޝްގެ މެޗުތައް ސުޒޭން އެނަލައިޒްކޮށްގެންކަން އެނގޭ ކަމަށެވެ.

"ބަންގްލަދޭޝް ކުރިން ކުޅުނު މެޗުތަކުގައި ކޯނަރާއި ހިލޭޖެހުން ދިފާއުކުރާ އިރު އާންމުކޮށް ރީބައުންސްވެފައ ހުރީ ހަމަ އެ ޕޮޒިޝަނަށް. ސުޒޭން ވަރަށް ރަނގަޅަށް ބަލާފައި އެތަނަށް ނިހާން ލާފައި އެހުރީ،" އެ ގޯލް އެނަލައިޒްކޮށްދެމުން ރޭޑިއޯގެ ކޮމެންޓްރީގައި ނިޒާމް ބުންޏެވެ.

ސުޒޭން ބުނީ ނިހާޓުގެ ބައިވެރިވުން ހަމަލާތަކުގައި އިތުރު ކުރުމަށް ވެސް މެޗުގެ ކުރިން، ކުރިއަށް ގެންދިޔަ ޕްރެކްޓިސްތަކުގައި އިސްކަންދީގެން މަސައްކަތްކޮށްފައި ވާނެ ކަމަށެވެ.