އެމެރިކާގެ ކުރީގެ ރައީސް ޑޮނަލް ޓްރަމްޕް ރަސްމީ ހައިސިއްޔަތުން ކުރެއްވި އެއްވެސް ކަމަކާ ގުޅިގެން އޭނާގެ މައްޗަށް ޖިނާއީ ދައުވާ ނުކުރެވޭނެ ކަމަށް އެ ގައުމުގެ ސުޕްރީމް ކޯޓުން މިއަދު ހުކުމްކޮށްފި އެވެ.
މި ހުކުމާ އެކު، ރިޔާސީ އިންތިހާބުގެ ކުރިން ޓްރަމްޕުގެ މައްސަލަތައް އަލުން ފެށޭނެ ކަމަކަށް ނުބެލެވެ އެވެ.
ސުޕްރީމް ކޯޓުގެ 6 ފަނޑިޔާރަކު ތާއީދުކުރެއްވި އަދި ތިން ފަނޑިޔާރަކު ރައުޔު ތަފާތުވި ހުކުމުގައި އުއްތަމަ ފަނޑިޔާރު ޖޯން ރޮބަޓްސް ވިދާޅުވެފައިވަނީ ރައީސް ހުންނަވާނީ "ގާނޫނަށް ވުރެ މަތީގައި ނޫން" ކަމަށާއި އެކަމަކު މަގާމުގައި ހުންނަވައިގެން ކުރައްވާ ރަސްމީ އަމަލުތަކާ ގުޅިގެން ޖިނާއީ އެއްވެސް ދައުވާއެއް ނުކުރެވޭނެ ކަމަށެވެ. ނަމަވެސް ވިދާޅުވީ ރަސްމީ ހައިސިއްޔަތުގެ ބޭރުން ކުރައްވާ ކަންކަމަށް މި ހިމާޔަތް ނުލިބޭނެ ކަމަށެވެ.
"އެހެންވެ، ގާނޫނުއަސާސީގައި ރައީސަކަށް ކަނޑައަޅައިދީފައިވާ ބާރުތައް ބޭނުންކުރުމުން އެކަމާ ގުޅުވައި ޖިނާއީ ދައުވާއެއް ނުކުރެވޭނެ ..." ފަނޑިޔާރު ރޮބާޓްސް ވިދާޅުވި އެވެ.
ރައީސަކު ރަސްމީ ބާރުތަކުގެ ބޭރުން ކުރައްވާ ކަމަކަށް ހިމާޔަތެއް ނޯންނާނެ ކަމަށް ހުކުމުގައިވެ އެވެ. އެހެންވެ، ޓްރަމްޕާ ދެކޮޅު ދައުވާތަކުގެ ތެރެއިން ރަސްމީ ބާރުތައް ބޭނުންކުރުމާ ގުޅޭ ދައުވާތަކާއި އެ ނޫން ދައުވާތައް ދަށު ކޯޓުން ކަނޑައަޅަން ޖެހޭނެ އެވެ.
އެހެންވެ ދައުވާތައް ކުރިއަށް ގެންދެވޭނެތޯ ބެލުމަށް ޑިސްޓްރިކްޓް ކޯޓަކުން ޝަރީއަތުގެ ކުރީގެ އަޑުއެހުންތައް ބާއްވަން ޖެހޭނެ އެވެ. މިއީ ވަރަށް ގިނަ ވަގުތު ހޭދަވާ އަޑުއެހުންތަކެއް ކަމަށް ވާތީ ނޮވެމްބަރު މަހުގެ ރިޔާސީ އިންތިހާބުގެ ކުރިން ޓްރަމްޕްގެ ޝަރީއަތްތައް އަލުން ފެށުމަކީ ވުމަށްވުރެ ނުވުން ގާތް ކަމެކެވެ.
ޓްރަމްޕް އެންމެ ފުރަތަމަ ރިޔާސީ އިންތިހާބުގައި ވާދަކުރެއްވި އިރު ކެމްޕެއިން ތެރޭ އޭނާއާ ދެކޮޅު ވާހަކަތަަކެއް ހުއްޓުވަން ކެމްޕެއިން ފައިސާއިން ހަރަދުކޮށް އެކަމާ ގުޅޭ ލިޔެކިޔުންތަކާއި ހިސާބުތައް އޮޅުވާލި މައްސަލައިގެ ދައުވާ ސާބިތުވާ ކަމަށް މިހާރު ވަނީ ނިންމައިފަ އެވެ. ބަރަހަނާ ފިލްމު ކުޅޭ މީހެއް ކަމަށްވާ ސްޓޯމީ ޑެނިއަލްސްއާ އެކު ބޭއްވި ނަހަމަ ގުޅުމުގެ ވާހަކަ އޭނާ ދައްކަފާނެތީ ޓްރަމްޕް އޭނާގެ ވަކީލް މެދުވެރިކޮށް ޑެނިލިއަލްސް އަށް ކެމްޕެއިން ފައިސާއިން 130،000 ޑޮލަރު ދިން ކަމަށް ދައުވާގައި ބުނެފައިވެ އެވެ.
މީގެ އިތުރުން ވެސް ޖިނާއީ އެތައް ދައުވާއެއް ކޯޓުތަކަށް ޓްރަމްޕާ ދެކޮޅަށް ވަނީ ހުށަހަޅައިފަ އެވެ.
ކޯޓުގެ މި ދައުރުގެ އެންމެ ފަހު މައްސަލައިގެ ގޮތުގައި ކުރި މި ހުކުމުން މި އެގްޒެކެޓިވް ބާރުތަކާއި ރިޔާސީ އިންތިހާބުގެ ރޭހަށް ދުރުރާސްތާގެ އަސަރުތަކެއް ކުރިއަށް އޮތް ތަނުގައި ކުރާނެ ކަމަށް ބެލެވެ އެވެ.
އުމުރުން 78 އަހަރުގެ ޓްރަމްޕް ވިދާޅުވީ މި ހުކުމަކީ އެމެރިކާގެ ގާނޫނުއަސާސީ އާއި ޑިމޮކްރަސީއަށް ލިބުނު ބޮޑު ކާމިޔާބީއެއް ކަމަށެވެ. އަނެއްކޮޅުން ރައީސް ޖޯ ބައިޑެންގެ ކެމްޕެއިނުން ވަނީ ޓްރަމްޕަކީ ގާނޫނުތަކަށް ވުރެ މަތީގައި ހުންނަވާ ބޭފުޅެއް ކަމަށް އޭނާއަށް އަދިވެސް ހީވާ ކަމަށެވެ. -- އޭއެފްޕީ
