އެމެރިކާގެ ލޮސް އެންޖެލިސްގައި އަނދަމުންދާ އަލިފާނުގައި އެ ސިޓީގެ އަލްޓެޑަނާގެ ބޮޑު ބައެއް އަޅިއަށްވި ފަހުން މަގުތަކުގައި އިއްޔެ ފޯރިމަރަމުން ދިޔައީ ނެޝަނަލް ގާޑުގެ ސިފައިންނެވެ. އެކަމަކު މި އަވަށުގެ މީހުންނަށް މިހާރު އެކަމުން ކުރާނެ މާބޮޑު ފައިދާއެއް ނެތެވެ. މާ ބޮޑަށް ލަސްވީ އެވެ.
"އަހަރެމެން ގޭގައި ރޯވި އަލިފާން ނިއްވަން ބާލިދީތަކުން ފެން ޖަހަމުން ދިޔައިރު އަލިފާން ނިއްވާ މީހުންގެ އެންމެ މީހަކު ވެސް އަހަރެމެން މި ހިސާބަކުން ނުދެކެން،" ނިކޮލަސް ނޯމަން، 40، ބުންޏެވެ.
"އެ މީހުން ބިޒީވެގެން އުޅުނީ ޕަލަސޭޑްޒްގައި ހުރި މުއްސަނދި އަދި މަޝްހޫރު މީސް މީހުންގެ މުދާތައް ސަލާމަތްކުރުމުގައި. އަހަރެމެން އާންމުންގެ މުދާތައް އަނދައިގެން ދާން ދޫކޮށްލީ،" ޓީޗަރެއް ކަމަށްވާ ނޯމަން ޝަކުވާކުރި އެވެ.
އެކަމަކު އަލިފާނުގެ ގެއްލުމުގައި ވަކި މީހަކަށް ތަފާތެއް ނެތެވެ.
އަލްޓެޑަނާގައި މި ޝަކުވާ އޮތް އިރު މި ހަފްތާގައި އެންމެ ފުރަތަމަ ރޯވި، މުއްސަނދިންގެ ސަރަހައްދު ކަމަށްވާ ޕެސިފިކް ޕެލިސޭޑްޒްގައި ވެސް އަލިފާން ނިއްވާ މީހުންނާއި ކަމާބެހޭ އެހެން އިދާރާތަކާ މެދު އޮތީ ހުސް ޝަކުވާ އެވެ.
"އަހަރެމެންގެ ސިޓީ އެއްކޮށް ހަލާކުވެ ދާން ދޫކޮށްލީ،" އަލިފާން ނިއްވަން ބޭނުންކުރާ ހައިޑްރަންޓްތަކުން ފެން ނުލިބުމާއި ޕްރެޝަރު ނެތުން ފަދަ އެތައް ކަމަކާ ހެދި ޝަކުވާކުރި ނިކޯލް ޕެރީ ބުންޏެވެ.
ސްޓައިލިސްޓެއް ކަމަށްވާ، އުމުރުން 32 އަހަރުގެ ނިކޯލްގެ އަގު ބޮޑު ގެ އަޅިއަށް ވެގެން ދިއުމުން އޭނާ ބޭނުންވަނީ މިކަމުގައި ޒިންމާނަގަން ޖެހޭ ބަޔަކު ޒިންމާކުރުވާށެވެ.
"ކަންކަން އިންތިޒާމްވެފައި ހުންނަން ޖެހޭނީ މިކަހަލަ ކަމަކުން ރައްކާތެރިވެވޭ ގޮތަށް،" އޭނާ އޭއެފްޕީ އަށް ބުންޏެވެ.
"އަހަރެމެންގެ ހުރިހާ އެއްޗެއް ގެއްލިއްޖެ. މި ސިޓީ އާއި ސިޓީގެ ފީކަޅާ މޭޔަރާއި ގަވަރުނަރުގެ ފަރާތުން އެއްވެސް ސަޕޯޓެއް ނެތް."
ތިބީ ތައްޔާރުނުވެ
މިހާރުވެސް ލޮސް އެންޖެލިސްގެ އެކި ހިސާބުގައި އަނދަމުންދާ އަލިފާނުގެ ސަބަބުން މިހާތަނަށް 11 މީހަކު މަރުވެފައިވާ ކަމަށް ކަމާބެހޭ އިދާރާތަކުން ވަނީ ބުނެފަ އެވެ.
މިހާތަނަށް 10،000 އިމާރާތެއް އަލިފާނުގައި އަޅިއަށް ވެފައި ވާއިރު 100،000 އަށްވުރެ ގިނަ މީހުން ވަނީ ރައްކާތެރި ހިސާބުތަކަށް ގެންގޮސްފަ އެވެ.
ކަމާބެހޭ އިދާރާތަކުން ބުނަމުންދަނީ ހާލަތު މި ހިސާބަށް ދިއުމުގެ ސަބަބަކީ 100 މޭލު (160 ކިލޯމީޓަރު) ބާރުމިނުގައި ހަފްތާގެ ކުރީކޮޅު ޖެހުނު ވަޔާއި އެތައް މަހެއް ވަންދެން ވާރޭ ނުވެހި އޮތުން ކަމަށެވެ.
އެކަމަކު އަލިފާނުގައި ހުރިހާ އެއްޗެއް ގެއްލި ދިޔަ އެތައް ހާސް ބަޔަކަށް މިއީ އެކަށީގެންވާ ޖަވާބަކަށް ނުވެ އެވެ.
އަލިފާނުގެ ހާދިސާ ފެށުނީ މޫސުމީ ހާލަތު ވަރަށް ގޯސްވާނެ ކަމުގެ އިންޒާރު ދީފައި ވަނިކޮށް ކެލިފޯނިއާ ސިޓީގެ މޭޔަރު ކެރަން ބާސް ގާނާއަށް ޒިޔާރަތް ކުރައްވަމުން ގެންދަވަނިކޮށެވެ. އެއާ އެކު އޭނާއަށް ބޮޑެތި ފާޑުކިޔުންތަކެއް ވަނީ އަމާޒުވެފަ އެވެ.
ބަޖެޓް ކުޑަކުރުމުގެ ސަބަބުން، ފަޔަ ޑިޕާޓްމަންޓް އޮތީ ހާލުގަ އެވެ. އަލިފާނާ މާ ދުރު ހިސާބުތަކުގެ މީހުންނަށް ވެސް، އަލިފާނުގެ ނުރައްކާ އޮތް ކަމަށް ބުނެ، ގެދޮރު ދޫކޮށް ދިއުމަށް އިންޒާރުގެ މެސެޖުތައް އޮޅިގެން ފޮނުވުނު މައްސަލައިން އަދި ވަކިން ބޮޑަށް މީހުން ވަނީ ރުޅި ގަދަވެފަ އެވެ.
އޭއެފްޕީއަށް ދިން އިންޓަވިއުއެއްގައި އޭނާ ބުނީ ސަރަހައްދުގެ ފުރިހަމަ އިވެލުއޭޝަނެއް ހަދަން ޖެހޭނެ ކަމަށާއި އެތައް ސަތޭކަ ހާސް ބައެއްގެ ގެދޮރުގެއްލިފައިވާ ކަމަށެވެ.
"މިތަނެކޭ ހަނގުރާމައިގެ މައިދާނެކޭ އެއްގޮތް."
ޑިމޮކްރެޓިކް ޕާޓީގެ ބޭފުޅުން ކަމަށްވާ މޭޔަރު ބާސް އާއި ކެލިފޯނިއާގެ ގަވަރުނަރު ގެވިން ނިއުސޯމް ވެސް ވަނީ ކަން ހިނގި ގޮތް ތަހުގީގުކުރަން ގޮވާލައްވައިފަ އެވެ.
އިންތިޚާބީ ރައީސް، ރިޕަބްލިކަން ޕާޓީގެ ޑޮނަލްޑް ޓްރަމްޕް ވަނީ ކެލިފޯނިއާގެ ލިބަރަލް ލީޑަޝިޕަށް ފާޑު ވިދާޅުވެ ރުޅިވެރިކަމުގެ ހުޅުގަނޑު ބޮޑުކުރައްވައިފަ އެވެ.