ދުނިޔޭގެ އެންމެ ބޮޑު ފަރު ކަމަށްވާ އޮސްޓްރޭލިޔާގެ ގްރޭޑް ބެރިއާ ރީފް ސަލާމަތްކުރެވޭނީ ދުނިޔެ ހޫނުވުން ހުއްޓުވައިގެން ކަމަށް ސައިންސްވެރިންގެ އާ ދިރާސާއަކުން ބުނެފި އެވެ.
ސައިންސް މަޖައްލާ "ނޭޗާ"ގައި ޖެހި ރިޕޯޓްގައި ފާހަގަކުރި ގޮތުގައި، ކަނޑުގެ އެތައް ދިރުމެއް ހިމެނޭ އަދި ފަރުތަކުގެ ރައްކާތެރިކަން ދެމިގެންދާނެ ގޮތުގެ އެންމެ ގިނަ ދިރާސާތައް އަމާޒުވާ، ގްރޭޓް ބެރިއާ ރީފަށް މިހާރު ކުރިމަތިވެފައިވާ ނުރައްކާތައް ކުޑަކުރެވޭނީ ދުނިޔެ ހޫނުވުން ހުއްޓުވަން އަވަސް ފިޔަވަޅުތަކެއް އަޅައިގެން އެކަންޏެވެ.
ސައިންސްވެރިން ބުނާ ގޮތުގައި މުރަކަތައް ހުދުވުން ހުއްޓުވަން ކުރެވޭ އެހެން އެއްވެސް މަސައްކަތެއްގެ ފައިދާއެއް ނެތެވެ. އަދި އެއީ މުޅި ހާލަތަށް ބަލާއިރު އެކަށީގެންވާ މަސައްކަތްތަކެއް ވެސް ނޫން ކަމަށް ސައިންސްވެރިންގެ ހޯދުމުގައި ބުނެފައިވެ އެވެ.
ސައިންސްވެރިން ބުނާ ގޮތުގައި މުރަކަތައް ހުދުވުމުގެ މައްސަލަ އަށް އެކަނި ދިރާސާކޮށްގެން ފުއްދޭކަށް ނެެތެވެ. އޭގެ ބަދަލުގައި ބަލަން ޖެހިފައި ވަނީ އެއީ މުޅި ފަރަށް އޮތް ގެއްލުމެއްގެ ގޮތުގައި ކަމަށް ސައިންސްވެރިން ފާހަގަކުރެ އެެވެ.
"މޫސުމަށް އަންނަ ބަދަލަކީ ގްރޭޓް ބެރިއާ ރީފަށް ކުރިމަތިވެފައިވާ އެންމެ ބޮޑު ނުރައްކާ،" ދިރާސާ ލިއުއްވި އެއް ސައިންސްވެރިޔާ، ޕްރޮފެސަރު މޯގަން ޕްރެޝެޓް ވިދާޅުވި އެވެ.
އޭނާ ވިދާޅުވި ގޮތުގައި އެ ފަރުގެ މުސްތަގުބަލް އޮތީ ދުނިޔެ ހޫނުވުން މައްޗަށް ދިއުން ހުއްޓުވަން އޮސްޓްރޭލިޔާ އާއި ދުނިޔޭގެ އެހެން ގައުމުތަކުން ކުރާ މަސައްކަތުގެ މައްޗަށް ބިނާވެފަ އެވެ.
ގްރޭޓް ބެރިއާ ރީފްގެ ވަރަށް ބޮޑު ބައެއް ވަނީ ގާ ހުދުވުމުގެ މައްސަލާގައި ހަލާކުވެފަ އެވެ. އަދި މިދިއަ އަހަރު އެ މައްސަލަ މާ ބޮޑަށް ވަނީ ކުރިމަތިވެފަ އެވެ.
އެންމެ އިސްކޮށް ހުންނެވި ސައިންސްވެރިޔާ ޕްރޮފެސާ ޓެރީ ހިއުސް ވިދާޅުވީ ގާ ހުދުވުމުގެ މައްސަލަ އާންމު ކަމެއްގެ ގޮތުގައި ބަލަން ޖެހޭ މިންވަރަށް ގޮސްފައިވާ ކަމަށެވެ. ކޮންމެ ހޫނު މޫސުމެއްގައި ގާ ހުދުވުމުގެ މައްސަލަ މި ފަހުން ކުރިމަތިވާކަން ފާހަގަކުރެވިފައިވާ ކަމަށް އޭނާ ވިދާޅުވި އެވެ.
ފަރުތަކުގެ މުރަކަ އާއި ގާ ހުދުވުމުގެ މައްސަލަ ކުރިން ދިމާވަނީ ދޭތެރެދޭތެރެ އިންނެވެ. އެއީ ކޮންމެ އަހަރަކު ކުރިމަތިވާ ކަމެއްގެ ގޮތުގައި ބެލެވިފައެއް ނޯވެ އެވެ.
ޕްރެޝެޓް ވިދާޅުވީ ފަރުގެ ދިރުން އާލާވާނެކަމުގެ އުއްމީދު އޭނާގެ އެބަ އޮތެވެ. އެކަމަކު ދުނިޔެ ހޫނުވާން މެދުވެރިވާ މާއްދާތައް ޖައްވަން ފޮނުވުން ހުއްޓުވުމުގެ ފުރަސަތު ބަންދުވަމުން އަންނަ ކަމަށް ވިދާޅުވި އެވެ.