ހަމާސް އިން އިޒްރޭލަށް ދިން ހަމަލާގެ ތެރޭގައި އަސީރުންގެ ގޮތުގައި ގެންދިޔަ އެންމެން އިޒްރޭލާ ހަވާލުކުރުމަށް ވީ އެއްބަސްވުމާ އެއްގޮތަށް ހަމާސް އިން އެކަން ކޮށްފި އެވެ.
ޣައްޒާގައި ހަމަލާތައް ހުއްޓާލަން ވީ އެއްބަސްވުމުގެ ދަށުން 251 އަސީރުންގެ ތެރެއިން ދިރިތިބި އެންމެން އެއްފަހަރާ ހަވާލުކުރުމަށާއި މަރުވި މީހުންގެ ހަށިތައް ހޯދައި އިޒްރޭލާ ހަވާލުކުރުން ހިމެނެ އެވެ.
މިދިޔަ އަހަރުގެ އޮކްޓޫބަރު މަހުގެ 10 ގައި އަމަލުކުރަން ފެށި އެއްބަސްވުމުގެ ދަށުން، ދިރިތިބި އެންމެން ހަވާލުކުރުމަށް ފަހު މަރުވި މީހުންގެ ހަށިތައް ޣައްޒާގެ ސުންނާފަތިކޮށްފައިވާ އިމާރާތްތަކުގެ ގާތަކުގެ ތެރެއިން ކޮނެ ހޯދައި ހަވާލުކުރަމުން ދިއުމަށް ފަހު އެކެއްގެ ހަށިގަނޑު ނޫން ހުރިހާ ހަށިތަކެއް ހަވާލުކުރިތާ ވަނީ ދުވަސްތަކެއް ވެފަ އެވެ.
އެންމެ ފަހު މީހެއްގެ ގޮތުން، އިޒްރޭލު ފުލުހެއް ކަމަށްވާ ރަން ގްވިލީގެ ހަށިގަނޑު އިއްޔެ ވަނީ އިޒްރޭލަށް ގެންގޮސްފަ އެވެ.
ހަމާސް އިން ބުނީ އެ ހަށިގަނޑު ގަބުރުސްތާނެއްގެ ތެރެއިން ހޯދީ އެ ޖަމާއަތުން ދިން މައުލޫމާތަށް އިޒްރޭލު ސިފައިން ކަމަށެވެ.
މި މީހާގެ ހަށިގަނޑު އާއިލާއާ ހަވާލުކުރުމަށް ޣައްޒާ ކައިރީގައި އިޒްރޭލުން އިއްޔެ ވަނީ ރަސްމިއްޔާތެއް ބާއްވައިފަ އެވެ.
ހަމާސް އިން ބުނީ ގްވިލީގެ ހަށިގަނޑު އޮތް ތަނުގެ މައުލޫމާތު އެ ޖަމާއަތުން ފޯރުކޮށްދީފައިވާ ކަމަށާއި ހަމަލާތައް ހުއްޓާލުމުގެ އެއްބަސްވުމަށް ހަމާސް އިން ފުރިހަމައަށް އަމަލު ކުރަމުން އަންނަ ކަމުގެ ޔަގީންކަން މިކަމުން ވެސް ކަށަވަރުވާނެ ކަމަށެވެ.
ހަމާސް އިން އިޒްރޭލަށް ދިން ހަމަލާގައި 1،221 މީހަކު މަރާލި ކަމަށް ބެލެވެ އެވެ.
އެމެރިކާގެ ރައީސް ޑޮނަލްޑް ޓްރަމްޕުގެ ހުށަހެޅުމަކާ އެއްގޮތަށް ހެދި އެއްބަސްވުމުގެ ދެ ވަނަ ފިޔަވަހި ފަށަން ކަނޑައަޅާފައި އޮތީ ހުރިހާ އަސީރުން އިޒްރޭލާ ހަވާލުކުރުމުންނެވެ. މި ފިޔަވަހީގައި ޣައްޒާއަށް ބައިނަލްއަގުވާމީ ފައުޖެއް ފޮނުވުމާއި އިޒްރޭލުގެ ހުރިހާ ސިފައިން ޣައްޒާއިން ފޭބުމާއި ރަފަހް ބޯޑަރު ހުޅުވުން ފަދަ އެތައް ކަމެއް ހިމެނެ އެވެ.
އިޒްރޭލުން ވަނީ ރަފަހް ބޯޑަރު ހުުޅުވާނެ ކަމަށާއި އެކަމަކު ޣައްޒާ އާއި މިސްރާ ދެމެދު އެ މަގުން ދަތުރުކުރެވޭނީ ހަމައެކަނި ފައިމަގުގައި ކަމަށް ބުނެފަ އެވެ.
އޮކްޓޫބަރު 7، 2023 އިން ފެށިގެން ޣައްޒާގައި އިޒްރޭލުން ފަލަސްތީނުގެ 71،660 މީހުން ޝަހީދުކޮށްލާފައިވާ ކަމަށް، ހަމާސް އިން ހިންގާ ހެލްތު މިނިސްޓްރީން ވަނީ ބުނެފަ އެވެ.