އެމެރިކާ އާއި އިޒްރޭލު ގުޅިގެން އީރާނާ ދެކޮޅަށް ދޭން ފެށި ހަމަލާތަކަށް އީރާނުން ދިން ރައްދުގައި އެމެރިކާ ސިފައިންގެ ބަޔަކު މަރުވިކަމަށް އެ ގައުުމުން ފުރަތަމަ ފަހަރަށް އެއްބަސްވެއްޖެ އެވެ.
އެމެރިކާ އާއި އިޒްރޭލުގެ ހަމަލާތަކަށް އީރާނަށް ދިން ހަަމަލާތަކަށް ރައްދު ދިނުމުގެ ގޮތުން އީރާނުން ވަނީ އަވަށްޓެރި އަރަބި ގައުމުތަކުގައިވާ އެމެރިކާގެ އަސްކަރީ މަރުކަޒުތަކަށް ވަރުގަދަ މިސައިލް ހަމަލާތަކެއް ދީފަ އެވެ. ނަމަވެސް އެ ހަމަލާތަކުގައި އެމެރިކާ ސިފައިންގެ މީހަަކު މަރުވިކަމަށް އެމެރިކާއިން، ހަމަލާތައް ފެށި ހޮނިހިރު ދުވަހަކު ނުބުނެ އެވެ. ރޮއިޓާސް ބުނީ އީރާނުން ދިން ހަަމަލާތަކުގައި އެމެރިކާ ސިފައިންގެ ތިން މީހަކު މަރުވެ، އެހެން ފަސް މީހަކު ޒަހަމްވެފައިވާ ކަމަށައި އެމީހުންގެ ހާލު ސީިރިއަސް ކަމަށެވެ.
އެކަމާ ބެހޭ އިތުރު ތަފްސީލެއް އެމެރިކާގެ އަސްކަރިއްޔާއިން ދީފައެއް ނުވެ އެވެ. ނަމަވެސް ނަން ހާމަނުކުރަން ޝަރުތުކޮށް އެމެރިކާގެ އޮފިޝަލުންތަކެއް ރޮއިޓާސްއަށް ކިޔައިދީފައިވާ ގޮތުގައި އެމެރިކާ ސިފައިންގެ މީހުން މަރުވީ ކުވައިތުގައި ހުރި އަސްކަރީ މަރުކަޒަކަށް އީރާނުން ދިން ހަމަލާގަ އެވެ.
އެމެރިކާ އަސްކަރިއްޔާގެ ސެންޓްރަލް ކޮމާންޑުން ބުނީ މަރުވި މީހުންގެ އިތުރުން ޝާޕްނެލްތަކުގެ ސަބަބުން ބައެއް ސިފައިން ކުޑަކޮށް ޒަހަމްވި ކަމަށެވެ. ނަމަވެސް އެއީ ކޮން ތަނެއްގައި ހިނގި ކަމެއް ކަން ހާމައެއް ނުކުރެ އެވެ.
އެމެރިކާއިން އީރާނާ ދެކޮޅަށް ފެށި އެއްވެސް ހަމައެއްލަމައެއް ނެތް ހަނގުރާމައަށް އެމެރިކާގެ ރައްޔިތުންގެ ނުރުހުން އަމާޒުވެފައިވާ ދަނޑިވަޅެއްގައި އެމެރިކާ ސިފައިންގެ ބަޔަކު މަރުވިކަން އިއުލާނުކުރެއްވުމަށް ފަހު އެގައުމުގެ ރައީސް ޑޮނަލްޑް ޓްރަމްޕް ވިދާޅުވީ ހަނގުރާމަ ނިމުމުގެ ކުރިން އެމެރިކާގެ އިތުރު ސިފައިންތަކެއް ވެސް މަރުވެދާނެ ކަމަށެވެ.
ޓްރަމްޕް މި މޭރުމުން ވާހަކަދެއްކެވީ އާއްމުުކުރެއްވި ވީޑިއޯ މެސެޖެއްގަ އެވެ.
"އެކަމަކު އެމެރިކާއިން އެމީހުންގެ މަރުގެ ބަދަލު ހިފާނެ. އަދި އެންމެ ބޮޑަށް އަދަބު ދިނުުމުގެ ވަރުގަދަ ހަމަލާތަކެއް ، ސިވިލިޒޭޝަންއާ ދެކޮޅަށް ހަނގުރާމަކުރާ ޓެރަރިސްޓުންނަށް ދޭނެ،" ވީޑިއޯ މެސެޖްގައި ޓްރަމްޕް ވިދާޅުވި ކަމަށް ރޮއިޓާސްގެ ރިޕޯޓްގައިވެ އެވެ.
އެމެރިކާގެ ހަމަލާތަކުގައި އީރާނުން މަރުވި މީހުންގެ އަދަދު 200 އަށް ވުރެ މަތިވެފައި ވާއިރު އެގައުމުގެ ރޫހީ ލީޑަރު އާޔަތުﷲ އަލީ ޚާމަނާއީ ހިމެނޭ ގޮތުން އެގައުމުގެ އިސް 48 ބޭފުޅަކު ވެސް އޭގެ ތެރޭގައި ހިމެނެ އެވެ.
އެމެެރިކާގެ ރައީސް ޓްރަމްޕް ވިދާޅުވެފައިވާ ގޮތުގައި އީރާނާ ދެކޮޅަށް އެގައުމުން ދޭ ހަމަލާތައް ހަތަރު ވަރަކަށް ހަފުތާއަށް ކުރިއަށް ގެންދާނެ އެވެ.