ގާހިރާ (އެޕްރީލް 9) - މިސްރުގެ ފައްޅިއެއްގައި ދިން ބޮމުގެ ހަމަލާއެއްގައި 15 މީހުން މަރުވެ 40 އަށް ވުރެ ގިނަ މީހުން ޒަޚަމްވެފައިވާ ކަމަށް ރަސްމީ މީޑިއާ އިން ބުނެފި އެވެ.
ވެރިރަށް ގާހިރާގެ އުތުރުން އޮންނަ ތަންތާ ސިޓީގެ ސެއިންޓް ޖޯޖް ކޮޕްޓިކް ފައްޅި އަށް ހަމަލާ ދިނީ ކޮން ބައެއް ކަމެއް ނޭނގެ އެވެ. ނަމަވެސް މިސްރުގެ ކްރިސްޓިއަނުންނަށް ފަހަކަށް އައިސް ހަމަލާތައް އަމާޒުކޮށްފައި ވަނީ އިސްލާމީ ހަނގުރާމަވެރިންނެވެ. ގާހިރާގެ ފައްޅިއެއްގައި ޑިސެމްބަރު މަހު ދިން ހަމަލާގައި 25 މީހުން ވަނީ މަރުވެފަ އެވެ. ކޮޕްޓިކް ކްރިސްޓިއަނުންނާ ދެކޮޅަށް މިސްރުގައި ދޭ ހަމަލާތައް އިތުރުވެފައި ވަނީ 2013 ވަނަ އަހަރު މިސްރުގެ ސަރުކާރު ސިފައިން ނުކުމެ ވައްޓާލި ފަހުންނެވެ.
އިސްލާމިކް ސްޓޭޓް (އައިއެސް) އިން ފެބްރުއަރީ މަހު ވަނީ ކޮޕްޓިކް ކްރިސްޓިއަނުންނާ ދެކޮޅަށް ހަމަލާތައް އިތުރު ކުރުމަށް ގޮވާލައިފަ އެވެ. މިސްރުގެ 91 މިލިއަން މީހުންގެ އާބާދީގެ 10 ޕަސެންޓަކީ ކޮޕްޓިކް ކްރިސްޓިއަނުންނެވެ.
ގާހިރާގައި ހަމަލާ ދީފައި މި ވަނީ ކްރިސްޓިއަން ކަލަންޑަރުގައި އެންމެ މާތް އެއް ދުވަސް ކަމަށްވާ ޕާމް ސަންޑޭ މިއަދު ފާހަގަ ކުރަމުން ދަނިކޮށެވެ.