އިންޑިއާގެ ވެރިކަންކުރާ ބާރަތިޔާ ޖަނަތާ ޕާޓީ (ބީޖޭޕީ) ގެ ސޯޝަލް މީޑިއާ ޓީމު އަދި މުޅި ދުނިޔޭގެ ވެސް އެންމެ ވަރުގަދަ އެއް ސިޔާސީ ޕްރޮޕަގަންޑާ މެޝިންގެ ގޮތުގައި ސިފަކުރެވޭ ލީޑަޝިޕް ބަދަލުކޮށްފި އެވެ.
ސޯޝަލް މީޑިއާ ޓީމަކަށް އަލަށް ހަމަޖެއްސި ވެރިންނަކީ އިސްލާމް ދީނާ ދެކޮޅަށް އަދި ކަނާތުފިޔައިގެ ހަރުކަށި ވާހަކަތައް ފަތުރަމުން ދިޔަ މީހުންކަން އެނގޭ ސޯޝަލް މީޑިއާ ޕޯސްޓުތައް އާންމުން ހޯދައި ހާމަކުރަން ފެށުމާ އެކު އެ މީހުން މިހާރު ގެންދަނީ އެކައުންޓްތަކުން ގިނަ އަދަދެއްގެ ޕޯސްޓްތައް ފޮހެ، އެކައުންޓްތައް އާންމުކޮށް ނުފެންނަ ގޮތް ހަދަމުންނެވެ.
މަގާމުން ވަކިކުރީ ކޮންބައެއް؟
މި ގެނައި ބަދަލުގެ ދަށުން، 2015 އިން ފެށިގެން 11 އަހަރު ވަންދެން ބީޖޭޕީގެ އައިޓީ ސެލްގެ ވެރިޔާގެ މަގާމުގައި ހުރި އަމީތު މާލްވިޔާ ވަނީ މަގާމުން ވަކިކޮށްފަ އެވެ. މީޑިއާ ރިޕޯޓްތައް ބުނާގޮތުން އަމީތުގެ ލީޑަޝިޕްގައި ސޯޝަލް މީޑިއާގައި ދޮގު މައުލޫމާތާއި ނަފުރަތު އުފައްދާ ފަދަ ލިޔުންތައް އިންޑަސްޓްރިއަލް ފެންވަރެއްގައި ފަތުރާފައިވެ އެވެ. ފެކްޓް-ޗެކް ކުރާ ޖަމާއަތްތަކުގެ ރެކޯޑްތަކުން ދައްކާގޮތުގައި، އެހެން ހުރިހާ ސިޔާސީ ވެރިންނަށްވުރެ ގިނައިން އަމީތު މާލްވިޔާ ވަނީ ދޮގު ޚަބަރު ފަތުރައިފަ އެވެ.
އަލަށް ހަވާލުވީ ކޮންބައެއް؟
- ދީޕަކް މާސްކޭ: މިއީ އައިޓީ ސެލްގެ އާ ވެރިޔާ އެވެ. އޭނާއަކީ ކުރިން ބީޖޭޕީގެ ސްޓޭޓް ސޯޝަލް މީޑިއާގައި 15 އަހަރު މަސައްކަތްކުރި މީހެކެވެ.
- ޑެޕިއުޓީން: ޕްރިތީ ގާންދީ، އާލޯކް ބަޓް، ޝިވާނަންދު ދިވެދީ އަދި އަރުން ޔާދަވް.
މީގެ ތެރެއިން ޕްރިތީ ގާންދީއަކީ ހަރުކަށި ހިންދޫ (ހިންދޫތުވާ) ފިކުރުގެ މީހެކެވެ. އަދި ބަޓް އާއި ދިވެދީ އަކީ ކަނާތުފިޔައިގެ މީޑިއާ ޖަމާއަތްތައް ހިންގާ ދެ މީހުންނެވެ. އަރުން ޔާދަވް އަކީ 2022 ވަނަ އަހަރު ކީރިތި ރަސޫލާ صلى الله عليه وسلم އަށާއި މުސްލިމުންނަށް ހުތުރުބަސްތައް ރައްދުކުރި ޕޯސްޓްތަކެއްގެ ސަބަބުން ހަރިޔާނާ ސްޓޭޓްގެ އައިޓީ ޗީފްގެ މަގާމުން ވަކިކުރި މީހެކެވެ.
މާޒީ ފޮހެލުމުގެ މަސައްކަތް
އަލަށް މަގާމުތަކާ ހަވާލުވުމަށް ފަހު، މި މީހުންގެ ކުރީގެ ހަރުކަށި އަދި އިސްލާމް ދީނާ ދެކޮޅު ޕޯސްޓްތައް ފަޅާއެރުމުން، އެ މީހުން ދަނީ ޑިޖިޓަލް ހިސްޓްރީ ފޮހެލަމުންނެވެ:
- ދީޕަކް މާސްކޭ: އޭނާގެ އެކްސް އެކައުންޓުގެ ޕޯސްޓްތަކުގެ އަދަދު 6,905 އިން ވަނީ 5,563 އަށް ދަށްވެފަ އެވެ. (ގާތްގަނޑަކަށް 1,300 އަށްވުރެ ގިނަ ޕޯސްޓް ފޮހެލި).
- ޕްރިތީ ގާންދީ: މަހާތުމާ ގާންދީ އަވަހާރަކޮށްލި ނަތުރާމް ގޯޑްސޭއަށް ސަޕޯޓްކޮށް ކުރި ޕޯސްޓްތައް ފަޅާއެރުމުން، އޭނާގެ މުޅި އެކްސް އެކައުންޓް ވަނީ ޑިލީޓްކޮށްފައި.
- އާލޯކް ބަޓް: މުސްލިމުންނާއި، އަންހެނުންނާއި، އިދިކޮޅު ސިޔާސީ ވާދަވެރިންނަށް އަމާޒުކޮށް ހުތުރު ޕޯސްޓްތައް ކުރި ބަޓް ވެސް ވަނީ އޭނާގެ އެކައުންޓް ޑިއެކްޓިވޭޓް ކޮށްފައި.
- އަރުން ޔާދަވް: އޭނާގެ އެކްސް އެކައުންޓް ވަނީ އާންމުންނަށް ނުފެންނާނެހެން ޕްރައިވެޓް (ލޮކް) ކޮށްފައި.
- ޝިވާނަންދު ދިވެދީ: އޭނާގެ އެކައުންޓުން 600 އެއްހާ ޕޯސްޓް ވަނީ ފޮހެލާފައި.
ނަމަވެސް، މީޑިއާ ރިޕޯޓްތައް ބުނާގޮތުން މި މީހުން ޕޯސްޓްތައް ފޮހެލި ނަމަވެސް، ބީޖޭޕީގެ އައިޓީ ސެލްގެ ހަރުކަށި ސިޔާސީ ފިކުރު ބަދަލުވިކަމުގެ އެއްވެސް ހެއްކެއް ނެތެވެ.
މި ބަދަލު މި ގެނައީ ކީއްވެ؟
އިންޑިއާގެ ޒުވާނުންގެ މެދުގައި ބީޖޭޕީގެ އިތުބާރު ވަނީ ވަރަށް ބޮޑަށް ގެއްލިފަ އެވެ. މީގެ މައިގަނޑު ސަބަބަކީ ޖެން-ޒީ ގެ ވަރުގަދަ ހަރަކާތެއް ކަމަށްވާ "ކޮކްރޯޗް ޖަންތާ ޕާޓީ" (ސީޖޭޕީ) އެވެ. މި ހަރަކާތް ފެށިތާ އެންމެ ހަތަރު ދުވަސް ތެރޭގައި ބީޖޭޕީގެ ރަސްމީ އިންސްޓަގްރާމް އެކައުންޓަށްވުރެ ގިނައިން (26 މިލިއަން ފޮލޯވަރުން) ސީޖޭޕީގެ އެކައުންޓަށް ލިބުނެވެ. މީގެ އިތުރުން، އިންޑިއާގެ އެޑިއުކޭޝަން މިނިސްޓަރު މަގާމުން ވަކިކުރުމަށް ސީޖޭޕީން ހިންގި ސޯޝަލް މީޑިއާ ކެމްޕޭން ކާމިޔާބުވެ، މިނިސްޓަރު ވަނީ މަގާމުން އިސްތިއުފާ ދެއްވަން މަޖުބޫރުވެފަ އެވެ.
ބޮޑުވަޒީރު ނަރެންދުރާ މޯދީ ސެލްފީ ވީޑިއޯތައް އާންމުކުރައްވައި ޒުވާނުންގެ ހިތްތައް އަތުލުމަށް މަސައްކަތް ކުރެއްވި ނަމަވެސް، އިންޓަނެޓުގައި ބީޖޭޕީއަށް މަލާމާތްކޮށް ހަދާފައިވާ މީމްތައް ހުއްޓުވޭގޮތް ވަނީ ނުވެފަ އެވެ.