ލަކްނޯ (ސެޕްޓެމްބަރު 27) – އިންޑިއާގެ އުތުރުގެ ސަރަހައްދުތަކަށާއި ނޭޕާލަށް ކުރަމުންދާ ވިއްސާރާގައި ފެންބޮޑުވެ، ބިންގަނޑު ކަނޑައިގެން ގޮސް، ފާއިތުވި ތިން ދުވަސް ތެރޭގައި މަދުވެގެން 68 މީހުން މަރުވެއްޖެ ކަމަށް ކަމާބެހޭ އިދާރާތަކުން ބުނެފި އެވެ.
އިންޑިއާގެ އެންމެ އާބާދީ ބޮޑު، އުއްތަރު ޕްރަދޭޝް މާނިލާއިން އެކަނިވެސް 56 މީހުން މަރުވެ، 1،000 އަށްވުރެ ގިނަ ގެދޮރަށް ވަނީ ބޮޑެތި ގެއްލުންތަކެއް ވެފަ އެވެ.
ނޭޕާލްގެ ޑިޒާސްޓާ އޮތޯރިޓީން ބުނީ ބުރާސްފަތި ދުވަހުން ފެށިގެން ކުރަމުންދާ ވިއްސާރައިގައި 12 މީހުން މަރުވެ، ހަތް މީހަކު ގެއްލިގެން ހޯދަމުންދާ ކަމަށެވެ. މިއީ އޮގަސްޓު 26 ގައި ނޭޕާލަށް ދިމާވި ފެން ބޮޑުވުމުގެ ކުއްލި ކާރިސާއަށްފަހު އެގައުމަށް ކުރިމަތިވި ދެވަނަ ބޮޑު ވިއްސާރަ އެވެ.
އުއްތަރު ޕްރަދޭޝްއަށް އާދަޔާ ހިލާފަށް ގިނައިން ވާރޭވެހުނީ ބެންގޯލް ކަނޑުއޮޅީގައި އުފެދުނު ކޮޅިގަނޑެއް އަރައި ބާރުގަދަވުމުގެ ސަބަބުންނެވެ. ހުކުރު ދުވަހުން ފެށިގެން އާދީއްތަ ދުވަހުގެ ނިޔަލަށް އެ ސަރަހައްދަށް 66.5 މިލިމީޓަރުގެ ވާރޭވެހިފައިވެ އެވެ. މިއީ އާންމުކޮށް އެ ދުވަސްވަރު ވެހޭ 7.6 މިލިމީޓަރަށްވުރެ މާ އިތުރު އަދަދެކެވެ.
މި ވިއްސާރައިގެ ސަބަބުން ދަނޑުވެރިކަމަށް ބޮޑެތި ގެއްލުންތަކެއް ވެފައި ވާއިރު، އިންޑިއާގެ އިރުމަތީ އޮޑީޝާ މާނިލާގެ ތިރި ސަރަހައްދުތަކުގައި ދިރިއުޅޭ 70،000 އަށްވުރެ ގިނަ މީހުން ވަނީ ރައްކާތެރި ހިސާބުތަކަށް ބަދަލުކޮށްފަ އެވެ. -- އޭއެފްޕީ