ތެހެރާން (ސެޕްޓެމްބަރު 28) – "ވޭންދެނިވި ހަމަލާތަކެއް" އަމާޒުވެފައި ވާތީ، މެދުއިރުމަތި ދޫކޮށް ދާން އެމެރިކާއަށް މަޖުބޫރުވާނެ ކަމަށް އީރާނުގެ އެންމެ މަތީވެރިޔާ މުޖުތަބާ ޚާމަނާއީ ވިދާޅުވެއްޖެ އެވެ.
ފެބްރުއަރީ މަހުގެ ފަހުކޮޅު މެދުއިރުމަތީގައި ހަނގުރާމަ ފެށުނު ފަހުން އާންމުންގެ ކުރިމައްޗަށް ނުކުމެވަޑައިގެންފައިނުވާ މުޖުތަބާ މިހެން ވިދާޅުވީ ހަނގުރާމަ ހުއްޓާލުމަށް މަޝްވަރާތައް އަލުން ފެށުމަށް މަސައްކަތްކުރަމުން އަންނަ ދަނޑިވަޅެއްގަ އެވެ.
"ހޮރްމޫޒް ކަނޑުއޮޅީގެ ދިފާއުގައި ތިބި ހިތްވަރުގަދަ މުޖާހިދުންގެ ފަރާތުން ލިބުނު ވަރުގަދަ ހަމަލާތަކުގެ ސަބަބުން، ދުޝްމަނުންނަށް މިހާރު އަރަބި ކަނޑު ހުރަސްކޮށް ވަންނަން ވެސް ނުކެރޭ،"
"އަދި އެ މީހުން އެފަދަ ނުރައްކަލަކާ ކުރިމަތިލާން އުޅުނު ކޮންމެ ފަހަރަކު ލިބުނީ ބޮޑު ގެއްލުމެއް. އަރަބި ކަނޑުން ވެސް އެމެރިކާގެ ބާރު ކެނޑިގެންދާނެ ދުވަސް މާ ދުރެއް ނޫން،" އީރާނުގެ ދައުލަތުގެ ޓީވީން އާންމުކުރި ހިތާބެއްގައި މުޖުތަބާ ވިދާޅުވި އެވެ.
އަރަބި ޕެނިންސިއުލާ އިން ފެށިގެން އިރުމަތީ ފަރާތުން އިންޑިއާއާ ހަމައަށް ފެތުރިފައިވާ އަރަބި ކަނޑަކީ އީރާނުގެ އައްސޭރިފަށާއި ހޮރްމޫޒް ކަނޑުއޮޅިއާ ހަމައަށް ފެތުރިފައިވާ މުހިންމު ސަރަހައްދެކެވެ.
ފެބްރުއަރީ މަހު އެމެރިކާ އާއި އިޒްރޭލުން އީރާނަށް ދިން ހަމަލާތަކާ އެކު ފެށުނު ހަނގުރާމާގައި ވަނީ، ދުނިޔޭގެ ތެލާއި ގޭހުގެ ފަސްބައިކުޅަ އެއްބައި އުފުލާ މުހިންމު ސަރަހައްދެއް ކަމަށްވާ ހޮރްމޫޒް ކަނޑުއޮޅީގެ ބާރު ހޯދުމަށް އީރާނާއި އެމެރިކާގެ ވާދަވެރިކަން އުފެދިފަ އެވެ. އީރާނުން އެ ކަނޑުއޮޅި ބަންދުކުރުމާ ގުޅިގެން އެމެރިކާއިން ވަނީ އީރާނުގެ ބަނދަރުތައް ބަންދުކޮށްފަ އެވެ. -- އޭއެފްޕީ