ސައޫދީ އަރަބިއްޔާގެ ވެރިކަމުގެ ޒިންމާތައް އަދާކުރައްވާ ވަލީއަހުދު މުހައްމަދު ބިން ސަލްމާން، ޔޫއޭއީގެ ނާއިބު ރައީސް ޝައިޚް މަންސޫރު ބިން ޒައިދު އަލް ނަހްޔާންއާ ރިޔާޟުގައި އަންގާރަ ދުވަހު ބައްދަލުކުރައްވައިފި ކަމަށް ސައޫދީގެ ރަސްމީ މީޑިއާއިން ރިޕޯޓުކޮށްފި އެވެ.
މި ބައްދަލުވުން ބާއްވާފައިވަނީ ޔަމަނުގެ މައްސަލައިގައި ދެ ގައުމުގެ ގުޅުން ގޯސްވިތާ މަސްތަކެއް ފަހުންނެވެ.
މި ބައްދަލުވުން ބާއްވާފައި މި ވަނީ، ސައޫދީން ތާއީދުކުރާ ޔަމަނުގެ ސަރުކާރުގެ ބާރުތަކުގެ އަތުން ރަތްކަނޑުގެ އައްސޭރިފަށުގެ ބާރު ހޫތީން ހޯދުމަށް ފަހު، ސައޫދީގެ ތެޔޮ އުފުލާ ބޯޓުތަކަށާއި، ތެޔޮ އުފައްދާ ވަސީލަތްތަކަށާއި، އެއާޕޯޓުތަކުގެ އިތުރުން ވެރިރަށަށް ވެސް ދެމުންދާ ހަމަލާތަކާ ހުރެ ސައޫދީއަށް ބޮޑެތި ގޮންޖެހުންތަކަކާ ކުރިމަތިލާންޖެހިފައިވާ ދަނޑިވަޅެއްގަ އެވެ.
ސައޫދީ ޕްރެސް އޭޖެންސީން ބުނި ގޮތުގައި، ވަލީއަހުދާއި ނާއިބު ރައީސް ބައްދަލުކުރެއްވީ "އަޚުވަންތަ ގުޅުމާއި ސަރަހައްދީ ކަންކަމާ ބެހޭގޮތުން" މަޝްވަރާކުރުމަށެވެ.
މި ބައްދަލުވުމުގައި ސައޫދީގެ ޑިފެންސް މިނިސްޓަރު ޚާލިދު ބިން ސަލްމާން ވެސް ބައިވެރިވެވަޑައިގެންނެވި އެވެ.
މިދިޔަ ޑިސެމްބަރު މަހު، ސައޫދީން ވަނީ ޔަމަނުގެ ދެކުނުގެ ވަކިވެގަންނަން އުޅޭ ގުރޫޕްތަކަށް ޔޫއޭއީން ތާއީދުކޮށް، ސަރުކާރުގެ ކޮންޓްރޯލް އޮތް ސަރަހައްދުތަކަށް ހަމަލާ ދިނުމަށް އެހީތެރިވެދީ، ސައޫދީގެ ގައުމީ ސަލާމަތަށް ނުރައްކާކޮށްފައިވާ ކަމަށް ތުހުމަތުކޮށްފަ އެވެ. ނަމަވެސް ޖުލައި މަހު، ސައޫދީ އަދި ޔޫއޭއީގެ އިސް ވެރިންނާއި ވަޒީރުން ވަނީ ދެ ގައުމުގެ އެކުވެރިކަމާއި އެއްބައިވަންތަކަމުގެ މެސެޖުތައް ސޯޝަލް މީޑިއާގައި އާންމުކުރަން ފަށައި، ގުޅުން ރަނގަޅުވަމުންދާކަމުގެ އިޝާރާތެއް ދީފައެވެ.އެ މަހު، ހޫތީން ވަނީ ސައޫދީން ތާއީދުކުރާ ސަރުކާރުގެ ބާރުތަކާ ދެކޮޅަށް އާ ކެމްޕޭނެއް ފަށައި، ބޮޑު ސަރަހައްދެއްގެ ކޮންޓްރޯލް ހޯދައި، ސައޫދީގެ ބިމަށް ހަމަލާތައް ދޭން ފަށައިފަ އެވެ. އެއާ އެކު ޔަމަނުގެ ދާހިލީ ހަނގުރާމަ އަލުން ވަނީ ވަރުގަދަވެފަ އެވެ.
އީރާނުން ތާއީދުކުރާ މި ގުރޫޕުން ވަނީ ރަތްކަނޑުގައި ސައޫދީގެ އުޅަނދުފަހަރަށް ކަނޑުގެ ބްލޮކޭޑެއް އިޢުލާންކޮށްފަ އެވެ. ސައޫދީން ހޫތީންނަށް އަމާޒުކޮށް ހަމަލާތައް ދެމުން ދާއިރު ބައިނަލްއަގުވާމީ އެކުވެރި ގައުމުތަކުގެ އެހީތެރިކަމަށް ދަނީ އެދެމުންނެވެ.
ސައޫދީ އަރަބިއްޔާ އާއި ޔޫއޭއީ އަކީ ޔަމަނާއި ސޫދާނުން ފެށިގެން ހޯން އޮފް އެފްރިކާއާ ހަމައަށް، އިދިކޮޅު ބާރުތަކަށް ތާއީދުކުރުމުގެ މައްސަލާގައި ޚާރިޖީ ސިޔާސަތުގައި ދެބަސްވުންތައް އުފެދިފައިވާ ދެ ގައުމެވެ. -- އޭއެފްޕީ