ބާމިއުޑާއިން ބޮސްޓަންއަށް ދަތުރުކުރަނިކޮށް ގެއްލުނު މެޑިކަލް ޓްރާންސްޕޯޓް އެއާކްރާފްޓެއް ގެއްލިގެން ހޯދަމުން ދަނިކޮށް ބޯޓެއްގެ ބައިތައް ފެނިފައިވާ ކަމަށާއި، ބޯޓުން ދަތުރުކުރި ހަ މީހުން އަދިވެސް ނުފެންނަ ކަމަށް އެމެރިކާގެ ކޯސްޓްގާޑުން ހޮނިހިރު ދުވަހު ބުނެފި އެވެ.
'ސީ-ޖީއާރުޖޭޕީ' ޓެއިލް ނަންބަރު އޮތް ގަލްފްސްޓްރީމް ޖީ100 ބޯޓާ ގުޅުން ކެނޑިފައިވާ ކަމަށް ފެޑެރަލް އޭވިއޭޝަން އެޑްމިނިސްޓްރޭޝަނުން ހޮނިހިރު ދުވަހުގެ ހެނދުނުގެ ވަގުތެއްގައި އެންގި ކަމަށް ކޯސްޓްގާޑުން ނެރުނު ނޫސްބަޔާނެއްގައި ބުނެފައިވެ އެވެ.
"ކޯސްޓްގާޑުގެ ސާޗް ކްރޫއިންނަށް ފެނިފައިވާ ބައިތަކަކީ ގެއްލިގެން ހޯދަމުންދާ ބޯޓުގެ ބައިތަކެއްކަން ވަނީ ކަށަވަރުކުރެވިފައި،" އެ ބަޔާނުގައި ބުނެފައިވެ އެވެ.
"ކްރޫއިން އަންނަނީ ބޯޓުން ދަތުރުކުރި ހަ މީހުން ހޯދުމުގެ މަސައްކަތް އަދިވެސް ކުރަމުން."
އެ ބޯޓުގައި ދަތުރުކުރީ ކެނެޑާގެ ހަތަރު މީހަކާއި ބާމިއުޑާގެ ދެ މީހެއް ކަމަށް ކޯސްޓްގާޑުން ބުންޏެވެ.
ކެނެޑާގެ 'ލެޓިޓިއުޑް އެއާ އެމްބިއުލަންސް' އިން އޮޕަރޭޓްކުރާ މި ބޯޓު ގެއްލުނީ ދަންވަރު 1:30 ހާއިރު (1530 ޖީއެމްޓީ) ކަމަށް އެ ކުންފުނީގެ ތަރުޖަމާނު ކްލެރެންސް ޓޯގަރެޓްޒް އޭއެފްޕީއަށް ވިދާޅުވި އެވެ.
"ބޯޓުގައި ދަތުރުކުރީ ދެ ޕައިލަޓުންނާއި، ދެ މެޑިކަލް ސްޓާފުންނާއި، ބަލިމީހެއްގެ އިތުރުން އެ ބަލިމީހާގެ އާއިލާގެ މެންބަރެއް،" ޓޯގަރެޓްޒް ބުންޏެވެ.
އެ ކުންފުނީގެ ވެބްސައިޓުގައިވާ ގޮތުން، ދުނިޔޭގެ ކޮންމެ ތަނަކުންވެސް މީހުން އަނބުރާ ގައުމަށް ގެންދިއުމާއި މެޑިކަލް އިވެކުއޭޝަން ހިދުމަތް ފޯރުކޮށްދިނުމަށް 10 ބޯޓުގެ ފްލީޓެއް އެ ކުންފުނީގައި އޮވެ އެވެ. ކޯސްޓްގާޑުން ބުނީ ހޯދުމުގެ މަސައްކަތް މުޅި ރޭ ކުރިއަށްދާނެ ކަމަށާއި، އެންމެ ފަހުގެ މައުލޫމާތު ހިއްސާކުރުމަށް އާދީއްތަ ދުވަހުގެ ހެނދުނު ނޫސްވެރިންގެ ބައްދަލުވުމެއް ބޭއްވުމަށް ހަމަޖެހިފައިވާ ކަމަށެވެ. -- އޭއެފްޕީ