މިދިޔަ މަހު އިޒްރޭލުގައި ބޭއްވި އާންމު އިންތިހާބާ ދިމާކޮށް، އަރަބި-އިޒްރޭލު ޕާޓީއެއްގެ މެންބަރުން ފްރޭމްކޮށް ބަދުނާމުކުރަން ބޮޑުވަޒީރު ބެންޖަމިން ނަތަންޔާހޫގެ އޮފީހުން މަސައްކަތް ކުރި ކަމަށް މީޑިއާތަކުން ރިޕޯޓްކުރުމާ ގުޅިގެން، އެއީ "ބަޣާވާތެއް ގެންނަން ކުރި މަސައްކަތެއް" ކަމަށް ބުނެ އިޒްރޭލުގެ އިދިކޮޅު ދެ ލީޑަރަކު މިއަދު ނަތަންޔާހޫއަށް ވަރަށް ބޮޑަށް ފާޑުކިޔައިފި އެވެ.
ކުރީގެ ގާނޫނު ހަދާ މަޖިލީހުގެ އިދިކޮޅު ލީޑަރު އަދި ބެޔާޗަދު ލިސްޓުގެ ކޯ-ޗެއާ ޔައިރު ލަޕިޑް އެކްސްގައި ކުރެއްވި ޕޯސްޓެއްގައި ވިދާޅުވީ، މި މައްސަލައިގެ ތަފްސީލުތައް ހާމަވަމުންދާ ވަރަކަށް ކަންކަން ވަރަށް ބޮޑަށް ސާފުވަމުންދާ ކަމަށެވެ.
"މިއީ ހަމައެކަނި އިންތިހާބަށް ހުރަސްއަޅަން ކުރި މަސައްކަތެއް ނޫން. މިއީ ބަޣާވާތެއް ގެންނަން ކުރި މަސައްކަތެއް،" ލަޕިޑް ވިދާޅުވި އެވެ.
އިޒްރޭލުގެ ޗެނަލް 12 އިން އިއްޔެ ރިޕޯޓްކޮށްފައިވާ ގޮތުގައި، އޮކްޓޫބަރު 27 ގައި ބޭއްވި އިންތިހާބުގެ އެއް ދުވަސް ކުރިން، ނަތަންޔާހޫގެ ޗީފް އޮފް ސްޓާފް އިޑޯ ނޯޑެން ވަނީ އަރަބި-އިޒްރޭލު ޕާޓީއެއް ކަމަށްވާ ރާމް ޕާޓީގެ މެންބަރުންތަކަކާ ގުޅޭ ޝަކުވާއެއް ފުލުހުންނަށް ހުށަހަޅައިފަ އެވެ. އަދި އިންޓެލިޖެންސް މަސްދަރެއްގެ ގޮތުގައި ނަތަންޔާހޫގެ އޮފީހުގެ ކުރީގެ މުވައްޒަފެއްގެ މައުލޫމާތު ނޯޑެން ފުލުހުންނަށް ދިން ކަމަށާއި، އެ މީހާ ދިން މައުލޫމާތުގެ މައްޗަށް ބިނާކޮށް ރާމް ޕާޓީގެ ތިން މެންބަރަކު ހައްޔަރުކުރި ކަމަށް ވެސް އެ ރިޕޯޓުގައިވެ އެވެ.
ނަމަވެސް، އެއީ އެއްވެސް އަސާސެއް ނެތް ދޮގު މައުލޫމާތުތަކެއްކަން ފުލުހުންނަށް އެނގުމުން، ފަހުން އެ ތިން މީހުން ވަނީ ދޫކޮށްލައިފަ އެވެ.
އިންތިހާބުގައި އަރަބި ޕާޓީތަކުން ރެކޯޑް އަދަދަކަށް ގޮނޑި ކާމިޔާބު ކުރުމާ ގުޅިގެން، އެ ޕާޓީތަކުން އިންތިހާބުގައި އޮޅުވާލާފައިވާ ކަމަށް ނަތަންޔާހޫ އޭރު ތުހުމަތުކުރި އެވެ. ނަމަވެސް، ނަތަންޔާހޫގެ ލިކޫޑް ޕާޓީން ވަނީ މި ފަހުން ފެންމަތިވި ތުހުމަތުތައް ދޮގުކޮށް ބަޔާނެއް ނެރެފަ އެވެ.
އިޒްރޭލުގެ ނޫހެއް ކަމަށްވާ "ހާރެޓްޒް" އިން ރިޕޯޓްކޮށްފައިވާ ގޮތުގައި، އަރަބި އަނެއް އިއްތިހާދު ކަމަށްވާ ޖޮއިންޓް ލިސްޓުގެ ލީޑަރުންގެ ފޯނު ކޯލްތައް އަޑުއެހުމުގެ ހުއްދައަކަށް އިޒްރޭލުގެ ދާހިލީ ސަލާމަތާ ބެހޭ އިދާރާ (ޝިން ބެޓް) ގެ ވެރިޔާ ޑޭވިޑް ޒީނީ އެދުނެވެ. ނަމަވެސް، އެކަށީގެންވާ ހެކި ނެތުމުން އެޓާނީ ޖެނެރަލް ވަނީ އެ ހުއްދަ ދިނުމަށް ދެކޮޅުހަދައިފަ އެވެ.
މި ރިޕޯޓާ ގުޅިގެން ޖޮއިންޓް ލިސްޓުގެ ލީޑަރު ޔޫސުފް ޖަބާރީން ވެސް ވަނީ މިއީ "ނަތަންޔާހޫ ގެންނަން އުޅުނު ބަޣާވާތެއް" ކަމަށް ބުނެފަ އެވެ.
"މި ހޯދުންތައް ކަށަވަރުވެއްޖެ ނަމަ، މިއީ އިންތިހާބުގެ ނަތީޖާ އޮޅުވާލުމަށް ސަރުކާރުގެ އެންމެ މަތީ ފަންތީގެ ތެރެއިން ހިންގާފައިވާ ޖިނާއީ ޖަރީމާއެއް. ނަތަންޔާހޫ ހިމެނޭހެން މިކަމުގައި ޒިންމާވާ އެންމެންނަށް ފިޔަވަޅު އަޅަން ޖެހޭނެ،" ޖަބާރީން އެކްސްގައި ބުނެފައިވެ އެވެ.
ރާމް ޕާޓީގެ ނައިބު ލީޑަރު އަދި ކުރީގެ ފުލުސް ޗީފް ޔޯއާވް ސެގަލޮވިޓްޒް ވަނީ މި މައްސަލައިގެ އަވަސް ތަހުގީގެއް ހިންގުމަށް ގޮވާލައިފަ އެވެ. އޭނާ ބުނީ، ނަތަންޔާހޫ އޭރު އަޑުއުފުލީ އޭނާގެ އަތުން އިންތިހާބު ވަގަށް ނަގަނީ ކަމަށް ބުނެ ކަމަށާއި، ނަމަވެސް ހަގީގަތުގައި މުޅި ގައުމު ވަގަށް ނަގަން މަސައްކަތް ކުރީ ނަތަންޔާހޫ ކަމަށެވެ.
ނަތަންޔާހޫއާ އެންމެ ބޮޑަށް ވާދަކުރާ ކުރީގެ އަސްކަރީ ޗީފް އޮފް ސްޓާފް ގާދި އައިޒެންކޮޓް އިއްޔެ ބުނީ، ވަގުތީ ބޮޑުވަޒީރުގެ މަގާމުގައި ނަތަންޔާހޫއަށް ދެން "އެންމެ މިނެޓަކު ވެސް ނުހުރެވޭނެ" ކަމަށެވެ.
މިދިޔަ މަހުގެ އިންތިހާބުގައި ސަރުކާރެއް އެކުލަވާލުމަށް ބޭނުންވާ 61 ގޮނޑި ނަތަންޔާހޫގެ ކޯލިޝަނަށް ވެސް އަދި އައިޒެންކޮޓްގެ އިދިކޮޅު އިއްތިހާދަށް ވެސް ކާމިޔާބު ކުރެވިފައެއް ނުވެ އެވެ. ނަމަވެސް، އަރަބި ދެ ޕާޓީ ކަމަށްވާ ޖޮއިންޓް ލިސްޓާއި ރާމް ޕާޓީން ވަނީ އައިޒެންކޮޓަށް ތާއީދުކުރާނެ ކަމުގެ އިޝާރާތެއް ދީފަ އެވެ. -- އޭއެފްޕީ