އިޒްރޭލުގެ ގާނޫނު ހަދާ މަޖިލިސް (ނެސެޓް) އާ ދައުރަކަށް ހުޅުވުމުގެ ރަސްމިއްޔާތަށް ހުރަސްއަޅަން ހަރުކަށި ކަނާތުފިޔައިގެ ފަރާތްތަކުން ކުރި މަސައްކަތްތަކާ އެކު ވެސް، ރެކޯޑް އަދަދަކަށް އަރަބި ދަރިކޮޅުގެ މެންބަރުން އިއްޔެ މަގާމުގެ ހުވާކޮށްފި އެވެ.
މިދިޔަ މަހު ބޭއްވި އާންމު އިންތިހާބުގައި އަރަބި އާބާދީގެ ގިނަ ބަޔަކު ވޯޓުލާން ނުކުތުމުގެ ނަތީޖާއެއްގެ ގޮތުން، 120 މެންބަރުންގެ މައްޗަށް އެކުލެވޭ 26 ވަނަ ނެސެޓަށް އަރަބިން އިސްވެ ތިބެ އުފައްދާފައިވާ ދެ އިއްތިހާދު ކަމަށްވާ ޖޮއިންޓް ލިސްޓާއި ޔުނައިޓެޑް އަރަބް ލިސްޓް (ރާމް) އިން ހޮވުނު 19 މެންބަރުން ވަނީ ހުވާކުރައްވައިފަ އެވެ. މިއީ އިޒްރޭލުގެ ތާރީހުގައި ވެސް މަޖިލީހުގައި އަރަބި މެންބަރުން މިހާ ގިނަ އަދަދަކަށް ތަމްސީލުކުރާ ފުރަތަމަ ފަހަރެވެ.
މަޖިލިސް ހުޅުވުމުގެ ރަސްމިއްޔާތު ކުރިއަށް ދިޔަ ވަގުތު، ކަނާތުފިޔައިގެ ހަރުކަށި ޖަމާއަތެއް ކަމަށްވާ "އިމް ތިރްޒޫ" އިން، މަޖިލިސްކުރާ ގޭގެ ބޭރުގައި މުޒާހަރާކުރި އެވެ. ރަސްމިއްޔާތު ހުއްޓުވުމަށް ހަމަނުޖެހުން ހިންގާނެ ކަމުގެ އިންޒާރު ބައެއް ފަރާތްތަކުން ދީފައި އޮތް ނަމަވެސް، ބޭރުގައި ކުރިއަށް ދިޔަ އެއްވުން ނިމުނީ އެއްވެސް ހަމަނުޖެހުމެއް ނެތި އެވެ.
ނަމަވެސް މަޖިލީހުގެ ތަޅުމުގައި ވަނީ ހޫނު ޒުވާބުތަކެއް ހިނގައިފަ އެވެ. ހަރުކަށި ފިކުރުގެ ވަޒީރު އިޓަމާރް ބެން-ގްވީރާއި އޭނާގެ ޕާޓީގެ މެންބަރުން ވަނީ އަރަބި މެންބަރުންނަށް ނިސްބަތްކޮށް އަޑުގަދަކޮށް ފުރައްސާރަކޮށްފަ އެވެ. އަދި ރަސްމިއްޔާތު ނިންމަން އިޒްރޭލުގެ ގައުމީ ސަލާމް ކިޔަން ފެށުމުން، ރާމް ޕާޓީގެ ލީޑަރު މަންސޫރު އައްބާސް އާއި އެ ޕާޓީގެ ޔަހޫދީ މެންބަރު ޔޯއާވް ސެގަލޯވިޓްޒް ފިޔަވައި އަރަބި އެހެން ހުރިހާ މެންބަރުން ވަނީ ތަޅުން ދޫކޮށް ނުކުމެ އެވެ.
އިންތިހާބަށް ފަހު ސަރުކާރެއް އެކުލަވާލުމުގެ މަސައްކަތް އިޒްރޭލުގެ ރައީސް އައިޒަކް ހާޒޯގް ހަވާލުކުރީ ކުރީގެ އަސްކަރީ ވެރިޔާ އަދި ޔަޝާރު ޕާޓީގެ ލީޑަރު ގާދީ އައިޒެންކޮޓާ އެވެ. އެއީ 'ވަގުތީ' ބޮޑުވަޒީރު ބެންޖަމިން ނަތަންޔާހޫއަށް ވުރެ ގިނަ މެންބަރުންގެ ތާއީދު އައިޒެންކޮޓަށް ލިބުމުންނެވެ.
ނަމަވެސް ސަރުކާރެއް އެކުލަވާލަން ބޭނުންވާ 61 ގޮނޑީގެ އަޣުލަބިއްޔަތު މި ދެ ލީޑަރުންނަކަށް ވެސް އަދި ނުހޯދެ ނުވެ އެވެ. ނަތަންޔާހޫގެ ކޯލިޝަނަށް 53 ގޮނޑި ލިބިފައިވާއިރު، އައިޒެންކޮޓްގެ ހަތަރު ޕާޓީގެ އިއްތިހާދަށް ލިބިފައިވަނީ 48 ގޮނޑި އެވެ. އެހެންވެ 19 ގޮނޑިއާ އެކު އަރަބި ޕާޓީތައް ވަނީ ސަރުކާރެއް އެކުލަވާލުމުގައި އެންމެ މުހިންމު ބާރަކަށް ވެފަ އެވެ.
އަރަބި ޕާޓީތަކާ އެކު ކޯލިޝަން ނުހަދާނެ ކަމަށް ނަތަންޔާހޫ ބުނާއިރު، އައިޒެންކޮޓްގެ އިއްތިހާދުގައި ހިމެނޭ ކަނާތުފިޔައިގެ ބައެއް ލީޑަރުން ވެސް ވަނީ އަރަބި ޕާޓީތަކުގެ އެހީތެރިކަމާ އެކު އުފައްދާ ސަރުކާރެއްގައި ބައިވެރިނުވާނެ ކަމަށް ބުނެފަ އެވެ.
ސަރުކާރެއް އެކުލަވާލުމުގައި ހުރަސްތަކެއް ހުރި ނަމަވެސް، އަންނަ އަންގާރަ ދުވަހު ބާއްވާ މަޖިލީހުގެ ރައީސް ހޮވުމުގެ ވޯޓުގައި، އަރަބި މެންބަރުންގެ ތާއީދާ އެކު ޔަޝާރު ޕާޓީގެ މެންބަރު މަތަން ކަހާނާ އެ މަގާމަށް އިންތިހާބު ކުރެވޭނެ ކަމަށް އައިޒެންކޮޓްގެ އިއްތިހާދުން ވަނީ ބުނެފަ އެވެ.
މަޖިލިސް ހުޅުވުމާ އެކު ނަތަންޔާހޫ އާއި ކަނާތުފިޔައިގެ މުޒާހަރާގެ ބައިވެރިން ވަނީ އަރަބި ޕާޓީތަކަކީ "ޓެރަރިޒަމަށް ވާގިވެރިވާ" ބައެއް ކަމަށް ތުހުމަތުކޮށްފަ އެވެ. ނަމަވެސް ރާމް އާއި ޖޮއިންޓް ލިސްޓުން ވަނީ އެ ތުހުމަތުތައް ދޮގުކޮށް، އެ ޕާޓީތަކުން މަސައްކަތް ކުރަނީ ދެ ދައުލަތުގެ ހައްލެއްގެ ދަށުން ސުލްހަ ގާއިމުކުރުމަށް ކަމަށް ބުނެފަ އެވެ.