އިޒްރޭލުގެ ބޮޑުވަޒީރު ބެންޖަމިން ނަތަންޔާހޫ އދ.ގެ އާންމު މަޖިލީހުގައި ވާހަކަ ދައްކަން ފެށުމުން މާލަން ދޫކޮށް ވަޑައިގެންނެވި ގައުމުތަކުގެ މަންދޫބުންނަކީ ރަނގަޅު ކަމަށް އަމިއްލައަށް ގަބޫލުކުރާ ކަންކަން ވެސް ކުރަން ނުކެރޭ ފިނޑިންގެ ގޮތުގައި ނަތަންޔާހޫ ސިފަކުރުމުން، އަސްލު ފިނޑިންނަކީ ކޮބައިކަން އައިސްލެންޑުން ނަތަންޔާހޫއަށް ކިޔައިދީފި އެވެ.
"އަސްލު ފިނޑިންނަކީ ބައިނަލްއަގުވާމީ ގާނޫނުތަކަށް އިހުތިރާމް ނުކުރާ ވެރިން،" އދ. ގެ އާންމު މަޖިލީހުގެ 81 ވަނަ ސެޝަންގައި ނަތަންޔާހޫ ދެއްކި ވާހަކައަށް ރައްދު ދެއްވަމުން އައިސްލެންޑުގެ ފޮރިން މިނިސްޓަރު ތޯރްގަރްދުރް ކަޓްރިން ގުންނާރްސްދޯއްޓިރް ވިދާޅުވި އެވެ.
އައިސްލެންޑުގެ ފޮރިން މިނިސްޓަރުގެ ތަގުރީރުގައި ވަނީ "މި ޕޯޑިއަމުން 'މޯރަލް ކަވާޑްސް' އޭ ބުނާ އަޑު އިވިއްޖެ ކަމަށް ވިދާޅުވެ ނަތަންޔާހޫއަށް ހޫނުކޮށް ރައްދު ދެއްވައިފަ އެވެ. ފިނޑިންނަކީ ކޮބައިކަން ދުނިޔެއަށް އެނގެންޖެހޭނެ ކަމަށް ވިދާޅުވެ އޭނާ ލިސްޓެއް އިއްވެވި އެވެ.
"މި ޕޯޑިއަމުން ވަނީ 'މޯރަލް ކަވާޑްސް' ގެ ބަސް އިވިފައި. އަޅުގަނޑުގެ ނަޒަރުގައި ފިނޑިންނަކީ ދާއިމީ ސުލްހައެއް ހޯދަން މަޝްވަރާއަށް އިށީންނަން ނުކުރެވޭ ލީޑަރުން. ދަތިހާލުގައި އުޅޭ މީހުންނަށް އިންސާނީ އެހީ ފޯރުކޮށްދިނުމަށް ހުރަސްއަޅާ މީހުން. ފިނޑިންނަކީ ބައިނަލްއަގުވާމީ ގާނޫނަށް އިހުތިރާމެއް ނުކޮށް ތަކުރާރުކޮށް އެއާ ހިލާފްވާ މީހުން،" ގުންނާރްސްދޯއްޓިރް ވިދާޅުވި އެވެ.
މީގެ އިތުރުން އޭނާގެ ތަގުރީރުގައި ވަނީ ޣައްޒާގެ ރައްޔިތުން އުފުލަމުންދާ ތަކުލީފުތަކަކީ ދުނިޔެއަށް އިވޭ "ބެކްގްރައުންޑް އަޑެއް" ގެ ގޮތުގައި ދޫކޮށްނުލުމަށް ގޮވާލައްވައިފަ އެވެ. އަދި މެދުއިރުމައްޗާއި ޔޫކްރެއިންގައި ހިނގަމުންދާ ބޮޑެތި ހަނގުރާމަތަކުގެ ސަބަބުން، ދުނިޔޭގެ އެހެން ސަރަހައްދުތަކުގައި ހުރި ނުރައްކާތެރި ކާރިސާތައް ފޮރުވިގެން ދިޔަ ނުދިނުމަށް ވެސް އޭނާ ބައިނަލްއަގުވާމީ މުޖުތަމައަށް އިލްތިމާސް ކުރެއްވި އެވެ.
އިޒްރޭލުން ޣައްޒާ އާއި ލުބުނާނަށް ދެމުންދާ ހަމަލާތަކާ ދެކޮޅު ހެދުމުގެ ގޮތުން، އޯގަނައިޒޭޝަން އޮފް އިސްލާމިކް ކޯޕަރޭޝަން (އޯއައިސީ) އަށް ނިސްބަތްވާ އަރަބި އަދި މުސްލިމް ގައުމުތަކުގެ ހުރިހާ ޑިޕްލޮމޭޓުން ކަހަލަ ގޮތަކަށް ހޯލުން ނުކުމެވަޑައިގަތެވެ. އދ. ގައި ހުންނަ ފަލަސްތީނުގެ މިޝަނުން ގައުމުތަކާ ވާހަކަ ދައްކައި، އިންތިޒާމްވެގެން ކުރިއަށް ގެންދިޔަ ހަރަކާތުގައި އދ. ގެ 193 މެންބަރު ގައުމުގެ ތެރެއިން ގިނަ ގައުމުތަކުން ބައިވެރިވި އެވެ.