ވޮޝިންޓަން (ޑިސެމްބަރު 12) - މަޝްހޫރު މަޖައްލާ ޓައިމް އިން މި އަހަރުގެ ޝަހުސިއްޔަތުގެ މަގާމު ތިމާވެއްޓަށް މަސައްކަތްކުރާ ސްވިޑަންގެ އަންހެން އެކްޓިވިސްޓް ގްރެޓާ ތަންބާގަށް ދީފި އެވެ.
މޫސުމަށް އަންނަ ބަދަލުތަކާ ދެކޮޅަށް ދުނިޔޭގެ ފެންވަރުގައި މަސައްކަތްކުރަމުން އަންނަ 16 އަހަރުގެ މި ދަރިވަރަށް ޓައިމް މަޖައްލާގެ އަހަރުގެ އެންމެ ނުފޫޒު ގަދަ 100 މީހުންގެ ލިސްޓުން ވެސް ޖާގަ ދިނުމަށް ފަހު، ޓައިމް މެގަޒިނުން އަހަރުގެ ޝަހުސިއްޔަތުގެ ގޮތުގައި ކަނޑައަޅައި އެ މަޖައްލާގެ ބޭރުގަނޑުން ވެސް ޖާގަ ދީފައިވާ އިރު، ގްރެޓާ ސިފަކޮށްފައި ވަނީ "ޒުވާނުންގެ ބާރުގެ" ގޮތުގަ އެވެ.
ގްރެޓާ އަކީ ޓައިމް މެގަޒިނުން އަހަރުގެ ޝަހުސިއްޔަތު މިހާތަނަށް ދިން އެންމެ ޒުވާން ޝަހުސިއްޔަތުގެ ގޮތުގަ އެވެ.
ގްރެޓާއާ އެކު ޓައިމުން އަހަރުގެ ޝަހުސިއްޔަތުގެ މަގާމަށް ޝޯޓްލިސްޓް ކުރި ފަސް ޝަހުސިިއްޔަތުންގެ ތެރޭގައި އެމެރިކާގެ ގާނޫނު ހަދާ މަޖިލީހުގެ ރައީސް ނޭންސީ ޕެލޯސީ އާއި އެމެރިކާގެ ރައީސް ޑޮނަލްޑް ޓްރަމްޕްމާއި ހޮންކޮންގައި މުޒާހަރާކުރާ މީހުން ހިމެނެ އެވެ.
މޫސުމަށް ބަދަލު އަންނަ މައްސަލަތަކަށް ވަރަށް ފުޅާކޮށް އަޑުއުފުލައި، އެކިއެކި ހަރަކާތްތައް ވެސް ބާއްވަމުން އަންނަ އަދި އެފަދަ ހަރަކާތްތަކުގައި އިސްކޮށް ބައިވެރިވަމުން އަންނަ ގްރެޓާ އަށް މިހާތަނަށް ބައިނަލްއަގްވާމީ އެތައް އެވޯޑެއް ވެސް ލިބިފައިވެ އެވެ. އޭގެ ތެރޭގައި ރައިޓް ލައިވްލިހުޑް އެވޯޑް، އިންޓަނެޝަނަލް ޗިލްޑްރެންސް ޕީސް ޕްރައިޒް، ފެލޯ އޮފް ދަ ރޯޔަލް ސްކޮޓިޝް ޖިއޯގްރަފިކަލް ސޮސައިޓީ އަދި އެމްބެސެޑާ އޮފް ކޮންސައިންސް އެވޯޑް ހިމެނެ އެވެ.
މި އަހަރުގެ ނޯބެލް ޕީސް ޕްރައިޒް އެވޯޑަށް ވެސް ގްރެޓާ ނޮމިނޭޓްވި އެވެ.
މޫސުމަށް އަންނަ ބަދަލުތަކާ ދެކޮޅަށް ވަކާލާތުކުރާތީ، މި މައްސަލައާ ދެކޮޅު ދުނިޔޭގެ ނުފޫޒު ގަދަ ލީޑަރުން ގްރެޓާ ސިފަކުރަނީ ބޯހަމަނުޖެހޭ ކުއްޖެއްގެ ގޮތުގަ އެވެ. އެކަމަކު އޭނާ ވަނީ މި މަސައްކަތުގެ ތެރެއިން މުޅި ދުނިޔޭގެ ލޯބި ހޯދައިފަ އެވެ.