ޓްވީޓާ ގުޅިގެން ޗައިނާގައި އޮޒިލް "މަނާވެއްޖެ"

ބެއިޖިން (ޑިސެމްބަރު 22) – ޗައިނާ އިން އުއިގޫރް މުސްލިމުންނާ މެދު އަނިޔާވެރިވާ ކަމަށް ބުނެ އާސެނަލްގެ ޖަރުމަން މިޑްފީލްޑަރު މެސުތު އޮޒިލް އެ ގައުމާ މެދު ރުޅިވެރިކަން ފާޅުކުރުމުން މަޝްހޫރު ފުޓްބޯޅަ ގޭމް، ޕްރޯ އިވޮލޫޝަން ސޮކާ (ޕެސް) މޯބައިލްގެ ޗައިނާ ވާޝަނުން އޭނާ އުނިކޮށްފި އެވެ.

ތުރުކީ ދަރިކޮޅަކަށް ނިސްބަތްވާ މުސްލިމެއް ކަމަށްވާ އޮޒިލް ވަނީ ޗައިނާ އިން އެ ގައުމުގެ ހުޅަނގު ސަރަހައްދުގެ ޒިންޖިއާންގައި މުސްލިމް މައިނޯރިޓީންނާ މެދު އަނިޔާވެރި އަމަލުތައް ހިންގާ ކަމަށް ތުހުމަތުކުރެވޭ މައްސަލައިގައި މުސްލިމް ގައުމުތައް ހަނުތިބޭތީ އެކަމަށް ވެސް ފާޑުކިޔައިފަ އެވެ.

އޮޒިލް ތުރުކީ ބަހުން ކުރި ޓްވީޓެއްގައި ބުނީ ގުރުއާން އަންދައި މިސްކިތްތައް ބަންދުކޮށް މުސްލިމް ސްކޫލްތައް މަނާކޮށް ފަހަރަކު މީހެއްގެ މަގުން ދީނީ އިލްމުވެރިން މަރައި ފިރިހެނުންތައް މަޖުބޫރުން ކޭމްޕްތަކަށް ފޮނުވަމުންދާ ކަމަށެވެ. އޭނާ އެ ވާހަކަތައް ލިޔެ ޓްވީޓްކުރީ ހަނދުފަޅިއަކާއި ތަރިއެއް ޖަހާފައިވާ ނޫ ކުލައިގެ ދިދައެއް ސިފަވާ ގްރެފިކެއްގަ އެވެ. އެއީ ވަކިވެގަތުމަށް މަސައްކަތްކުރާ އުއިގޫރުން ޒިންޖިއާން އަށް ނިސްބަތްކުރާ "އީސްޓް ތުރުކިސްތާން" ގެ ދިދަ އެވެ.

ޗައިނާ އިން ވަނީ ކޭމްޕްތަކެއް ނުހުންނާނެ ކުރިން ބުނެފަ އެވެ. ފަހުން ބޭރުގެ ޕްރެޝަރުތަކާ އެކު އެކަމަށް އެއްބަސްވި އެވެ. އެކަމަކު ބުނީ އެއީ ވޮކޭޝަނަލް ޓްރެއިނިން ކޭމްޕްތަކެއް ކަމަށެވެ. ފާޑުކިޔާ ފަރާތްތަކުން ބުނަނީ ޗައިނާ އިން އަންނަނީ އުއިގޫރުން އިސްލާމް ދީން ދޫކޮށް ކޮމިއުނިސްޓް ޕާޓީއަށް ތާއީދުކުރުމަށާއި ޗައިނާގެ މެޖޯރިޓީ ހާން ސަގާފަތަށް އުޅުމަށް މަޖުބޫރުކުރަމުން ކަމަށެވެ.

އޮޒިލް ކުޅޭ އިނގިރޭސި ޕްރިމިއާ ލީގުގެ އާސެނަލުން ވަނީ އޮޒިލްގެ ކޮމެންޓްތަކާ އެ ކްލަބާ ގުޅުމެއް ނެތް ކަމަށް ބުނެފަ އެވެ. ޗައިނާ އިން ފުރަތަމަ ބުނީ އޮޒިލްގެ ޓްވީޓްތަކުގައި ހަގީގަތެއް ނެތް ކަމަށާއި އޭނާ އަށް ލިބިފައިވަނީ ދޮގު ހަބަރުތަކެއް ކަމަށެވެ.

ޕެސް ގޭމްގެ ޗައިނާ ޑިސްޓްރިބިއުޓަރު ނެޓްއީސް އިން ބުނީ އެ ގޭމުން އޮޒިލް އުނިކުރީ ޗައިނާއާ މެދު ދެއްކި ވާހަކަތަކުގެ ސަބަބުން ކަމަށެވެ. އަދި އޮޒިލްގެ ވާހަކަތަކުން ޗައިނާ ސަޕޯޓަރުން މާޔޫސްކޮށްލައިފި ކަމަށާއި އަދި އެ ވާހަތަކުގެ ސަބަބުން ކުޅިވަރުގެ ރޫހު ކަމަށްވާ ލޯތްބާއި ސުލްހަ އަށް އަސަރުކޮށްފައިވާ ކަމަށް އެ ކުންފުނިން ބުނެ އެވެ.

ގޭމުން އޮޒިލް އުނިކުރުމަކީ ޗައިނާ އިން އޭނާއާ މެދު އެޅި ދެ ވަނަ ފިޔަވަޅެވެ. ފުރަތަމަ ފިޔަވަޅަކީ ޕްރިމިއާ ލީގުގައި މިދިޔަ ހަފުތާގައި އާސެނަލް ކުޅެން އޮތް މެޗު ޗައިނާ ސަރުކާރު ޓީވީން ނުދައްކާ ގޮތަށް ނިންމުމެވެ.

އޮޒިލް އަކީ، މުސްލިމުންގެ ހައްގުގައި ވާހަކަދައްކާ ލީޑަރެއް ކަމަށްވާ ތުރުކީގެ ރައީސް ރަޖަބް ތޮއްޔިބް އުރުދުޣާންގެ ގާތް އެކުވެރިޔެކެވެ. މިދިއަ އަހަރު އޮތް ވޯލްޑް ކަޕްގެ ދުވަސްކޮޅެއް ކުރިން އުރުދުޣާންއާ އެކު ފޮޓޯއެއް ނެގުމުން އޮޒިލްއަށް ޖަރުމަނުގެ ފާޑުކިޔުން އަމާޒުވި އެވެ. އަދި އެންމެ ފަހުން އޭނާ ވަނީ ޖަރުމަނުގެ ގައުމީ ޓީމަށް ކުޅުން ވެސް ހުއްޓާލައިފަ އެވެ. ފަހުން އޮޒިލްގެ ކައިވެނީގެ އޭނާގެ ފަރާތުން އެންމެ ގާތް އެކުވެރިއެއްގެ ގޮތުގައި އުރުދުޣާން ބައިވެރިވެވަޑައިގަތެވެ.