ރާއްޖޭގެ އިގުތިސޯދު ފުޅާކުރުމުގެ މަސައްކަތުގެ ދަށުން ރީއެކްސްޕޯޓާއި ޓްރާންސްޝިޕްމަންޓުގެ ވިޔަފާރި އަށް ހާއްސަކޮށްގެން 100 ޕަސަންޓު ދިވެހި ކުންފުންޏެއް އުފައްދަން ސަރުކާރުން ނިންމައިފި އެވެ.
އިކޮނޮމިކް މިނިސްޓަރު މުހައްމަދު ސައީދު މިއަދު ވިދާޅުވީ ރާއްޖޭގެ އިގުތިސޯދީ ރައްކާތެރިކަން ކަށަވަރުކުރުމާއި ވެލިއުއެޑް ކުރުމާއި ޓްރާންޝިޕްމަންޓް އަދި ރިއެކްސްޕޯޓް ވިޔަފާރި އަށް ހާއްސަކޮށް 100 ޕަސެންޓު ދިވެހި ކުންފުންޏެއް، މޯލްޑިވްސް އިންޑަސްޓްރިއަލް ޑިވެލޮޕްމަންޓް ފްރީޒޯންގެ ނަމުގައި އުފެއްދެވުމަށް ރައީސް ޑރ. މުހައްމަދު މުއިއްޒު ނިންމަވާފައިވާ ކަމަށެވެ.
އެކަމުގެ އިތުރު ތަފްސީލު ދެއްވަމުން ސައީދު "މިހާރު" އަށް ވިދާޅުވި ގޮތުގައި އެއީ ޓޫރިޒަމާއި މަސްވެރިކަމުގެ އިތުރުން ރާއްޖޭގެ އިގުތިސޯދުގައި ތިން ވަނަ ހަރަކާތެއް އުފެއްދުމުގެ ފެށުމެކެވެ.
"ފްރީޒޯން ކުންފުންޏެއް ގޮތުގައި ރީއެކްސްޕޯޓާއި ޓްރާންސްޝިޕްމަންޓު ވިޔަފާރިއަށް ހާއްސަވެގެން މަސައްކަތް ކުރާނީ،" އޭނާ ވިދާޅުވި އެވެ.
މިނިސްޓަރު ވިދާޅުވީ ކުރިއަށް އޮތް ދެ ހަފުތާގެ ތެރޭގައި އެ ކުންފުނި އުފެއްދުމަށްޓަކައި ބިމާއި މުވައްޒަފުންނާއި ކެޕިޓަލް އަދި ވަސީލަތްތައް ހަމަޖައްސާނެ ކަމަށެވެ.
އެ ކުންފުނި އުފެއްދުމުގެ މައިގަނޑު ބޭނުމަކީ ސައީދު ވިދާޅުވި ގޮތުގައި ވެލިއުއެޑް ކުރުމާއި ޓްރާންޝިޕްމަންޓް ރިއެކްސްޕޯޓް ކުރުމަށް ބައިނަލްއަގުވާމީ ފަރާތްތަކާ އެކު ސީދާ ވިޔަފާރީގެ މުއާމަލާތުތައް ހިންގުމެވެ.
މިހާރު ބޭރުގެ އެކި ކުންފުނިތަކުން ކުރާ އެ ވިޔަފާރި، ދިވެހިންގެ އަތް މައްޗަށް އޭރުން ގެނެވޭނެ ކަމަށް ވެސް އޭނާ ވިދާޅުވި އެވެ.
