ތަފްސީލު އާންމު ނުކުރިޔަސް، ހުރިހާ ރަށެއްގައި ޕްރޮޖެކްޓްތައް ހިންގާނަން: ޒަމީރު

ތަރައްގީގެ މަޝްރޫއުތައް ހިންގަން ކަނޑައަޅާފައިވަނީ ރައީސް ޑރ. މުހައްމަދު މުއިއްޒު އިސްކަން ދެއްވާ ލިސްޓުގެ ތަރުތީބުން ކަމަށާއި އަދި އަންނަ އަހަރު ރާއްޖޭގެ ހުރިހާ ރަށެއްގައި ޕްރޮޖެކްޓްތައް ހިންގާނެ ކަމަށް ފިނޭންސް މިނިސްޓަރު މޫސާ ޒަމީރު މިއަދު ވިދާޅުވެއްޖެ އެވެ.

މިއަދު ރައްޔިތުންގެ މަޖިލީހުގައި މެންބަރުންގެ ސުވާލުތަކަށް ޖަވާބު ދެއްވަމުން ޒަމީރު ވިދާޅުވީ ޕީއެސްއައިޕީ ޕްރޮޖެކްޓް ލިސްޓުގައި ކުޑަ އަދަދެއް ޖެހުމުން އެ މަސައްކަތް ކުރިއަށް ނުގޮސް ހުންނަތަން މީގެ ކުރީގެ ބަޖެޓުތަކުން ފާހަގަވާ ކަމަށެވެ. އަދި ބަޖެޓުގައި ޖާގަ ނެތިގެން ނުވަތަ ކޭޝް ފްލޯ ނެތިގެން ޕްރޮޖެކްޓްތައް ހުންނަތަން ފެންނަ ކަމަށް އޭނާ ވިދާޅުވި އެވެ.

"އަޅުގަނޑުމެންނަށް ފެނިގެން ދިޔަ އަހަރުތަކެއް ކުރިން އެމްޓީސީސީއަށް ވެސް ކޮންމެ ދުވަހަކު ވެސް ޕްރޮޖެކްޓެއް ހަވާލު ކުރެވިގެން އެންމެ ފަހުން ނިމިގެން ދިޔައިރު އެމްޓީސީސީގެ ޕައިޕްލައިންގައި ވެސް އެބައުޅޭ ގާތްގަނޑަކަށް 18 ބިލިއަން ރުފިޔާ ފައިނޭންސް ކުރެވޭނެ ގޮތެއް ނެތި،" އޭނާ ވިދާޅުވި އެވެ.

"އަޅުގަނޑު ދޭން އޮތް ޔަގީން ކަމަކީ، މިހާރު މި ގެންގުޅޭ ލިސްޓުގައި ވެސް އެއްވެސް ރަށެއް އުނިވެފައެއް ނޯންނާނެ. އަންނަ އަހަރު ތެރޭގައި ވެސް ޕްރޮޖެކްޓް ފަށަން ހުރިހާ ރަށެއް ސިޓީތަކާއި މާލެއާ ވެސް އެކުގައި އޮތީ ރޭވިފައި،" އޭނާ ވިދާޅުވި އެވެ.

ބަޖެޓުގައި ފޮތުގައިވާ ގޮތުން ޕީއެސްއައިޕީ މަޝްރޫއުތަކަށް 12.4 ބިލިއަން ރުފިޔާ ބަޖެޓުގައި ހިމަނާފައިވެ އެވެ. އޭގެ ތެރެއިން ސަރުކާރުން އަލަށް ހިމެނި ޕްރޮޖެކްޓްތަކަށް ތިން ބިލިއަން ރުފިޔާ ބަޖެޓުކުރި އެވެ.

ޒަމީރު ވިދާޅުވީ، ޕްރޮޖެކްޓްތަކަށް ބޭނުންވާ ފަންޑު ކަނޑައަޅައި، ރައީސަށް ހުށަހަޅުއްވާފައިވާ ކަމަށާއި އަދި ޕްރޮޖެކްޓްތައް ކުރިއަށް ގެންދާނީ އެމަނިކުފާނު ކަނޑައަޅާފައިވާ އިސްކަންދޭ ތަރުތީބުން ކަމަށެވެ.

"އަޅުގަނޑު ދޭން އޮތް ޔަގީން ކަމަކީ މިހާރު މި ގެންގުޅޭ ލިސްޓުގައި ވެސް އެއްވެސް ރަށެއް އުނިވެފައެއް ނޯންނާނެ. އަންނަ އަހަރު ތެރޭގައި ވެސް ޕްރޮޖެކްޓް ފަށަން ހުރިހާ ރަށެއް ސިޓީތަކާއި މާލެއާ ވެސް އެކުގައި އޮތީ ރޭވިފައި،" އޭނާ ވިދާޅުވި އެވެ.

ޒަމީރު ވިދާޅުވީ ޕްރޮޖެކްޓްތަކުގެ ތަފްސީލުތައް ބަޖެޓުން ޖާގަ ލިބޭ މިންވަރަކުން އިއުލާނު ކުރަމުން ދާނެ ކަމަށެވެ.

ވޭތުވެދިޔަ އަހަރުތަކުގެ ބަޖެޓުގައި ވަކިވަކި ރަށްރަށުގައި ހިންގާ ޕީއެސްއައިޕީ މަޝްރޫއުތަކުގެ ނަމާއި އެ މަޝްރޫޢުތަކަށް ކަނޑައަޅާފައިވާ ބަޖެޓާއި އެ ޕްރޮޖެކްޓްތައް މިހާރު އޮތް ސްޓޭޖް ވެސް އެނގެ އެވެ. ނަމަވެސް މި ސަރުކާރުގެ ފުރަތަމަ ބަޖެޓުގައި މަޝްރޫއުތަކުގެ ތަފްސީލުތައް ހިމަނާފައި ނުވާތީ މަޖިލީހުގެ ބައެއް މެންބަރުން ވެސް ވަނީ ކުރިން ކަންބޮޑުވުން ފާޅުކޮށްފަ އެވެ.

ބަޖެޓްގައިވާ ގޮތުން އެންމެ ބޮޑު އަދަދެއް ހާއްސަ ކޮށްފައިވަނީ ބޯހިޔާވަހިކަމުގެ މަޝްރޫއުތަކަށެވެ. އެފަދަ މަޝްރޫއުތަކަށް ވަނީ 1.5 ބިލިއަން ރުފިޔާ ހިމަނައިފަ އެވެ. އަދި އެއާޕޯޓް މަޝްރޫއުތަކަށް 600 މިލިއަން ރުފިޔާ އަދި ސިއްހީ ދާއިރާގެ މަޝްރޫއުތަކަށް 222 މިލިއަން ރުފިޔާ ހިމަނާފައިވެ އެވެ.

މިއަހަރު ޕީއެސްއައިޕީއަށް 11 ބިލިއަން ރުފިޔާ ބަޖެޓުކޮށްފައިވެ އެވެ. މިއީ މިއަހަރަށް އެންމެ ފުރަތަމަ ހުށަހެޅި ބަޖެޓުގެ އަދަދަށް ވުރެ އިތުރު އަދަދެކެވެ. އޭގެ ތެރޭގައި ގާތްގަނޑަކަށް 3،000 އެއްހާ މަޝްރޫއު ހިމެނެ އެވެ.