ޑޮލަރު މާރުކުރާ ގަވާއިދަށް އެއްވެސް ބަދަލެއް ނުގެނޭ: އެމްއެމްއޭ

ޓޫރިޒަމް ދާއިރާ އިން ލިބޭ ޑޮލަރު ރާއްޖޭގެ ބޭންކްތަކުން މާރުކުރަން ލާޒިމްކޮށް ހަދާފައިވާ ގަވާއިދަށް އެއްވެސް ބަދަލެއް މިހާތަނަށް ނުގެންނަ ކަމަށް މޯލްޑިވް މަނިޓަރީ އޮތޯރިޓީ (އެމްއެމްއޭ) އިން މިރޭ ބުނެފި އެވެ.

މަރުކަޒީ ބޭންކުން މިގޮތަށް ބުނީ، އެ ގަވައިދަށް ބަދަލުތަކެއް ގެނެސްގެން އުޅޭ ކަމަށް ސޯޝަލް މީޑިއާގައި އަޑު ފެތުރިފައި ވަނިކޮށެވެ.

އެމްއެމްއޭ އިން ބުނީ އެ އޮތޯރިޓީން އެކުލަވާލައި މި އަހަރުގެ އޮކްޓޫބަރު 1 ގައި ގެޒެޓްކުރި ގަވާއިދުގައިވާ ގޮތަށް، ވަރަށް ގިނަ ވިޔަފާރިތަކުން އެ އޮތޯރިޓީގައި ރަޖިސްޓްރީވެފައިވާ ކަމަށެވެ. ގަަވައިދު ތަންފީޒު ކުރުން ކުރިއަށް ގެންދާނީ ރައްޔިތުންގެ އަޑު އަހަމުން ކަމަށާއި އޮތޯރިޓީން ކުރާ މަސައްކަތްތަކާ ގުޅުން ހުރި ކޮންމެ ވިޔަފާރިއަކާއި ކޮންމެ ރައްޔިތަކަށް ވެސް މަޝްވަރާ ކުރުމުގެ ފުރުސަތު އޮންނާނެ ކަމަށް އެމްއެމްއޭ އިން ބުންޏެވެ.

އެމްއެމްއޭ އިން މިދިޔަ ބުރާސްފަތި ދުވަހު ބުނީ، ބޭރު ފައިސާއާ ބެހޭ ގަވައިދުގެ ދަށުން 173 ރިސޯޓަކުން ރަޖިސްޓްރީ ވެފައިވާ ކަމަށެވެ. މިވަގުތު ރާއްޖޭގައި ހިންގަނީ 174 ރިސޯޓެވެ.

ރާއްޖޭގެ ޓޫރިޒަމް ދާއިރާގެ އެންމެ ބޮޑެތި ބައެއް ވިޔަފާރިތަކުން ވަނީ އެ ގަވައިދަށް އަމަލު ނުކުރާނެ ކަމަށް ބުނެފަ އެވެ.

އެކަމަކު، ސަރުކާރުގެ ވިސްނުމަކީ އިގްތިސާދަށް ބޮޑު ފައިދާއެއް ލިބޭނެ ކަމަށް ލަފާކޮށްފައިވާ އެ ގަވާއިދުގައިވާ ގޮތަށް ކަންކަން ތަންފީޒު ކުރުން ކަމަށް ރައީސް ޑރ. މުހައްމަދު މުއިއްޒު ރޭ ވަނީ ވިދާޅުވެފަ އެވެ.

ސަރުކާރަށް އެއް އަހަރު ފުރުން ފާހަގަކުރަން ބޭއްވި ރަސްމިއްޔާތުގައި ރައީސް ވިދާޅުވީ "ގަވާއިދު ބަދަލު ކުރެވެން ނެތް" ކަމަށެވެ.

"ގަވައިދު ބަދަލުކުރާކަށް ނެތިން. ގަވައިދު ބަދަލެއް ނުކުރާނަން، ވަރަށް ސާފުކޮށް މި ދެންނެވީ،" ރައީސް ވިދާޅުވި އެވެ.

ރައީސް ވިދާޅުވީ މިދިޔަ އަހަރު އެކަނި ވެސް ޓޫރިޒަމް ސެކްޓާ އަށް 4.5 ބިލިއަން ޑޮލަރުގެ ޖުމްލަ އާމްދަނީއެއް ލިބުނު ކަމަށެވެ. އެކަމަކު އޭގެ ތެރެއިން ބޭންކުތަކަށް މާރުކުރީ 1.5 ޕަސެންޓެވެ. އަލަށް ކަނޑައަޅާފައިވާ ގަވައިދަށް ޑޮލަރު މާރުކުރާ ނަމަ އެ މަނިކުފާނު ވިދާޅުވި ގޮތުގައި އެއީ 15-20 ޕަސެންޓުގެ އިތުރު ވުމެކެވެ.

އެމްއެމްއޭ އިން މިހާރު ކަނޑައަޅާފައިވާ ގޮތަށް ރާއްޖޭގެ ބޭންކުތަކަށް ރިސޯޓުތަކުން ޑޮލަރު މާރުކުރާ ނަމަ ބޮޑު ފައިދާއެއް ވާނެ ކަމަށް ވެސް ރައީސް ވިދާޅުވި އެވެ.

Dollar maaru kuraa gavaaidhu badhaleh nukuraane, Raees dhekkevee eyge faidhaa thah

The most trusted news source in the Maldives

Mihaaru

މަރުކަޒީ ބޭންކް އެމްއެމްއޭ އިން އާންމުކުރި އާ ގަވާއިދުގައިވާ ގޮތުން، ޓޫރިޒަމް ދާއިރާގެ ހުރިހާ ވިޔަފާރިތަކުން ވެސް ކަނޑައަޅާފައިވާ ވަކި އަދަދެއް ބޭންކްތައް މެދުވެރިކޮށް މާރުކުރަން ޖެހޭނެ އެވެ.

ކެޓަގަރީ "އޭ" ގައި ހިމެނެނީ ރިސޯޓުތަކާއި ހޮޓާތަކާއި ޓޫރިސްޓް އުޅަނދުތަކެވެ. އެ ކެޓަގަރީގައި ހިމެނޭ ފަރާތްތަކުން ކޮންމެ ޓޫރިސްޓަކަށް، ބޮލަކަށް 500 ޑޮލަރުގެ ރޭޓުން، ރާއްޖޭގެ ބޭންކަކަށް ޖަމާކުރަން ލާޒިމްވާނެ އެވެ. އަދި ކެޓަގަރީ "ބީ" ގައި ހިމެނެނީ ގެސްޓް ހައުސްތަކުން ކޮންމެ ޓޫރިސްޓެއްގެ ބޮލަކަށް 25 ޑޮލަރުގެ ރޭޓުން ކޮންމެ މަހަކު އެ އަދަދު ބޭންކަކަށް ޖަމާކޮށް މާރުކުރަން ޖެހެ އެވެ.