ދިރާގު އެޕްރެންޓިސްޝިޕް ޕްރޮގްރާމްގައި ބައިވެރިވުމުގެ ފުރުސަތު ހުޅުވާލައިފި

ދިރާގު އެޕްރެންޓިސްޝިޕް ޕްރޮގްރާމް 2025 ގައި ބައިވެރިވުމުގެ ފުރުސަތު ހުޅުވާލައިފި އެވެ.

މި ޕްރޮގްރާމަކީ ދިރާގުގެ ކޯޕަރޭޓް ސޯޝަލް ރެސްޕޮންސިބިލިޓީގެ ދަށުން ޒުވާނުން ބާރުވެރިކުރުމަށް ކުރިއަށް ގެންދާ ޕްރޮގްރާމެކެވެ. މިއީ ރާއްޖޭގައި ފުޅާ ދާއިރާއެއްގައި ތައާރަފްކުރި މިފަދަ ފުރަތަމަ ކޯޕަރޭޓް އެޕްރެންޓިސްޝިޕް ޕްރޮގްރާމެވެ.

ދިރާގުން ބުނީ މި ޕްރޮގްރާމުން ޒުވާނުން ވަޒީފާގެ މާހައުލަށް ހޭލުންތެރިކޮށް، ބައިވެރިންނަށް އެކި ތަމްރީނު ދީ، ވަޒީފާގެ މާހައުލުގައި ތަޖުރިބާ ހޯދުމުގެ ފުރުސަތު ލިބިގެންދާނެ ކަމަށެވެ. މި ޕްރޮގުރާމުގެ ދަށުން ދިރާގުގެ އެޑްމިނިސްޓްރޭޝަން އާއި މާކެޓިން އާއި ސޭލްސްގެ އިތުރުން ޕްރޮކިއުމެންޓާއި ކޯޕަރޭޓް ސާވިސް އާއި ފައިނޭންސްގެ އިތުރުން ހިއުމަން ރިސޯސަސް އަދި ޓެކްނޮލޮޖީގެ ދާއިރާތަކުން އާމްދަނީއާއެކު، ވަޒީފާގެ ތަޖުރިބާ އާއި ތަމްރީނު ހޯދުމުގެ ފުރުސަތު ލިބޭނެ ކަމަށް ވެސް ދިރާގުން ބުންޏެވެ.

މި ޕްރޮގުރާމްގައި ފުރުސަތު ދެނީ 18 އަހަރާއި 30 އަހަރާއި ދެމެދުގެ ދިވެހި ޒުވާނުންނަށެވެ. އޭލެވެލް ފުރިހަމަ ކުރުމަށް ފުލްޓައިމް ވަޒީފާ އަދާ ނުކުރާ ހުރިހާ ޒުވާނުންނަށް ވެސް މި ޕްރޮގްރާމްގައި ބައިވެރިވެވޭނެ އެވެ.

މި ޕްރޮގުރާމް މާލޭގެ އިތުރުން ފުވައްމުލައް ސިޓީ އާއި އައްޑޫ ސިޓީގެ އިތުރުން ކުޅުދުއްފުށި ސިޓީ އާއި ބ. އަތޮޅު އަދި އއ. އަތޮޅުތަކުގައި ގާއިމް ކޮށްފައިވާ ދިރާގުގެ އޮޕަރޭޝަން ސެންޓަރުތަކުގައި ވެސް މި ކުރިއަށް ގެންދާނެ އެވެ.. މި ޕްރޮގްރާމްގައި ބައިވެރިވާ ހުރިހާ ޒުވާނުންނަށް ވެސް އެ ފަރާތްތަކުގެ ސޮފްޓް ސްކިލްސް ތަރައްގީ ކުރުމަށާއި ވަގުތު މެނޭޖް ކުރުމަށާއި ޕްރޮޖެކްޓް ހިންގާނެ ގޮތް ފަދަ ވަޒީފާގެ މާހައުލުގައި ބޭނުންވާ މުހިންމު މައުލޫމާތުތައް ދިރާގުގެ އެކި މުވައްޒަފުންގެ ފަރާތުން ލިބޭނެ އެވެ.

ދިރާގު އެޕްރެންޓިސްޝިޕް ޕްރޮގްރާމަކީ 2009 ވަނަ އަހަރުން ފެށިގެން ދިރާގުން ހިންގަމުންދާ ޕްރޮގުރާމެކެވެ. މި ޕްރޮގުރާމުގެ ދަށުން މިހާތަނަށް 268 އަށް ވުރެ ގިނަ ޒުވާނުން ވަނީ ބައިވެރިވެފަ އެވެ.

ދިރާގު އެޕްރެންޓިސްޝިޕް ޕްރޮގްރާމްގެ ކުރީގެ ގިނަ ދަސްވެނިން ދިރާގާއި ރާއްޖޭގެ އެކި ކަންކޮޅުތަކުގެ އެކި އިދާރާތަކުގައި މަސައްކަތް ކުރަމުންދާކަން އެ ކުންފުނިން ފާހަގަކުރެ އެވެ.